অসমৰ সাংস্কৃতিক প্ৰাণকেন্দ্ৰ গুৱাহাটীত পুনৰবাৰ বহিব এছীয়ান চলচ্চিত্ৰৰ বিশাল মেলা। সোমবাৰে মহানগৰীত আয়োজিত এক সংবাদমেলত গুৱাহাটী এছিয়ান ফিল্ম ফেষ্টিভেল চমুকৈ গ্ৰাফৰ (GAFF) দ্বিতীয় সংস্কৰণৰ বাবে নিৰ্বাচিত ছবিসমূহৰ তালিকা আনুষ্ঠানিকভাৱে মুকলি কৰা হয়। যোৱা বৰ্ষৰ অভূতপূৰ্ব সফলতাৰ পাছত এইবাৰ এই আন্তঃৰাষ্ট্ৰীয় চলচ্চিত্ৰ মহোৎসৱখনি অহা ২২ জানুৱাৰীৰ পৰা ২৫ জানুৱাৰীলৈ গুৱাহাটীৰ জ্যোতি চিত্ৰবনত অনুষ্ঠিত হ’ব।
এই মহোৎসৱ ট্ৰেণ্ডিং নাও মিডিয়াৰ উদ্যোগত আৰু কেন্দ্ৰীয় চৰকাৰৰ তথ্য আৰু সম্প্ৰচাৰ মন্ত্ৰালয়ৰ লগতে এন এফ ডি চিৰ সহযোগত আয়োজন কৰা হৈছে।
এইবাৰ মহোৎসৱৰ উদ্বোধনী ছবি হিচাপে উজবেকিস্তানৰ ছবি ‘চানডে’ প্ৰদৰ্শন কৰা হ’ব, যাৰ পৰিচালনা কৰিছে শ্বকীৰ খোলিকোভাই। আনহাতে মহোৎসৱৰ সামৰণি পৰিব ইৰাণৰ চিনেমা ‘ইন দ্য লেণ্ড অৱ ব্ৰাডাৰ্ছ’ৰ জৰিয়তে।
এই বৰ্ষৰ মহোৎসৱত মুখ্য অতিথি হিচাপে উপস্থিত থাকিব ভাৰতীয় চলচ্চিত্ৰ জগতৰ প্ৰসিদ্ধ পৰিচালক গিৰীশ কাচাৰাৱলী। ইয়াৰ উপৰি সামৰণি অনুষ্ঠানত বিশেষ আমন্ত্ৰিত অতিথি হিচাপে জনপ্ৰিয় অভিনেত্ৰী সোণালী কুলকাৰ্ণী উপস্থিত থাকিব বুলি উদ্যোক্তাসকলে জানিবলৈ দিছে।
এছীয়ান চিনেমাৰ বিচিত্ৰ পৰম্পৰাক বিশ্বৰ দৰবাৰত চিনাকি কৰাই দিয়াৰ লক্ষ্যৰে এই চলচ্চিত্ৰ মহোৎসৱত ১০ খন এছীয়ান দেশৰ উৎকৃষ্ট ছবি প্ৰদৰ্শন কৰা হ’ব। ইয়াৰ ভিতৰত ভিয়েটনাম, মংগোলিয়া, উজবেকিস্তান, দক্ষিণ কোৰিয়া, হংকং, জাপান, ম্যানমাৰ, ইৰাণ, কাজাখস্তান আৰু চীন দেশৰ ছবি অন্যতম। কেৱল আন্তঃৰাষ্ট্ৰীয় ছবিয়েই নহয়, ভাৰতৰ বিভিন্ন প্ৰান্তৰ মাৰাঠী, মালয়ালম, হিন্দী আদি ভাষাকে ধৰি উত্তৰ-পূবৰ অসমীয়া, কাৰ্বি, বড়ো, মিচিং, মণিপুৰী আৰু বাংলা আদি বহুতো ভাষাত নিৰ্মিত ছবি ইয়াত উপভোগ কৰিব পৰা যাব।
চাৰিদিনীয়া এই মহোৎসৱত মুঠ ২৬ খন ছবি প্ৰদৰ্শন কৰা হ’ব, যাৰ ভিতৰত আঠখন ছবিয়ে প্ৰতিযোগিতামূলক শাখাত অংশ ল’ব। ছবি প্ৰদৰ্শনৰ সমান্তৰালভাৱে ছবি পৰিচালনা, কাহিনী কথন আৰু চিনেমাৰ আধুনিক ধাৰা সম্পৰ্কে বিভিন্ন মাষ্টাৰক্লাছ আৰু আলোচনা চক্ৰৰো আয়োজন কৰা হৈছে।
মহোৎসৱৰ সঞ্চালিকা মনিতা বৰগোহাঁইয়ে জানিবলৈ দিয়া মতে, এইবাৰ মহোৎসৱৰ বাবে ২০০ৰো অধিক আবেদন লাভ কৰা হৈছিল, যাৰ মাজৰ পৰা শ্ৰেষ্ঠ ছবিসমূহ নিৰ্বাচন কৰা হৈছে। উত্তৰ-পূব ভাৰতৰ একমাত্ৰ এনেধৰণৰ এছীয়ান চলচ্চিত্ৰ মহোৎসৱ হিচাপে গ্ৰাফে ইতিমধ্যে এক সুকীয়া পৰিচয় গঢ়ি তুলিবলৈ সক্ষম হৈছে।
