আহিযা নামৰ বাহন ভাৰা দিয়া কাম্পেনিটোৰ পৰা জাহ্নৱী শইকীয়াই ভাৰাত লোৱা স্কুটিৰে বুধবাৰে গুৱাহাটীত চলিছিল আলফা-স্বাধীনৰ গ্ৰেনে’দ বিস্ফোৰণ অভিযান।
জু তিনিআলিত মুখ্য কাৰ্য্যালয় থকা থলুৱা কাম্পেনিটোৰ পৰিচালন সঞ্চালক উপকূল তালুকদাৰে শনিবাৰে সংবাদমেলযোগে এই কথা ৰাজহুৱা কৰিছে।
বিস্ফোৰণৰ দিনাই দুপৰীয়া প্ৰায় ১২ বজাত শইকীয়াই প্ৰতিষ্ঠানটোৰ বাহনখন (নং AS 01DQ 4420) ভাৰালৈ লৈছিল।
“তেওঁ (জাহ্নৱী) নিজৰ পেন কাৰ্ড, আধাৰ কাৰ্ড আৰু ড্ৰাইভিং লাইচেন্সৰ জেৰক্স দি এদিনৰ বাবে ৪৫০ টকাত ভাড়াত লৈছিল বাহনখন,” তালুকদাৰে জনায়।
ঘটনাৰ পিছত বাতৰিত স্কুটিখন দেখা পাই আহিযাই বিষয়টো অসম আৰক্ষী সঞ্চালকপ্ৰধানক অৱগত কৰে।
“পিছত উপ আৰক্ষী আয়ুক্তৰ সৈতে আমি আলোচনাত বহোঁ,” তালুকদাৰে কয়।
একেদিনাই ওভতাব লগা বাহনখন পিছদিনাও ঘূৰাই নিদিয়াত কাম্পেনিটো অধিক সন্দিহান হৈ পৰে।
তেওঁ লগতে জনাই যে বিস্ফোৰণৰ সময়ত স্কুটিখনৰ অৱস্থান উক্ত স্থানতে দেখা পোৱা গৈছিল। গ্ৰাহকৰ অৱস্থান জনাৰ বাবে আন কাম্পেনিৰ দৰে আহিযাৰ বাহনসমূহতো জি পি এচ-সংযোগ কৰা থাকে।
তদন্তৰ সুবিধাৰ বাবে আৰক্ষীক স্কুটিখনৰ সকলো ল’কেচনৰ তথ্য যোগান ধৰা হৈছে বুলিও সঞ্চালক তালুকদাৰে সদৰী কৰে।
স্কুটিখন ক’ত ক’ত গৈছিল সেই সম্পৰ্কে সাংবাদিকৰ প্ৰশ্নৰ উত্তৰ দিবলৈ তেওঁ অপাৰগতা প্ৰকাশ কৰে। “আৰক্ষীৰ তদন্তৰ স্বাৰ্থত সেয়া আমি ক’বলৈ অপাৰগ।”
বিস্ফোৰণটোত আঘাত পাই চিকিৎসাধীন হৈ থকা ব্যক্তিসকলক আহিযাৰ ফালৰ পৰা চিকিৎসাৰ বাবদ ১লাখ টকা প্ৰদান কৰা হ’ব বুলিও তালুকদাৰে সংবাদমেলত প্ৰকাশ কৰে।
বিস্ফোৰণৰ সময়ত জাহ্নৱী শইকীয়া ঘটনাথলীতে আছিল বুলি ইতিমধ্যে খবৰ প্ৰকাশিত হৈছে।
শইকীয়াৰ ম’বাইল আৰু স্কুটিখনৰ ল’কেচনৰ ৰিজনিয়ে বিস্ফোৰণৰ সৈতে মহিলাগৰাকীৰ সম্পৰ্ক স্থাপনত অসম আৰক্ষীক সহায় কৰিব পাৰে।
লগতে পঢ়িব পাৰে— এমেৰিকান বায়ুসেনা বাহিনী নিয়ন্ত্ৰিত জি পি এচ কি?
লগতে পঢ়িব পাৰে– বিস্ফোৰণত জড়িত নহয় প্ৰাণময়-জাহ্নৱী, আৰক্ষীয়ে “মে’কিং” কৰিছে