আৰম্ভ হোৱাৰ দুদিন পাছতেই কাৰিকৰী বিজুতি হৈছিল গুৱাহাটীৰ ৰ’পৱেৰ ইঞ্জিনত।
তাৰ পাছৰে পৰা মুঠ পাঁচদিনে বন্ধ হৈ আছিল এই ৰ’পৱেৰ চলাচল।
ইয়াৰ ফলত ৰ’পৱেৰে যাত্ৰা কৰিম বুলি ভবা যাত্ৰীসকল বিমুখ হৈয়ে ঘৰলৈ উভতিছিল।
অৱশ্যে, আজি পুৱাৰ ভাগত আহিছে ভাল খবৰটো। কাৰ্যক্ষম হৈ উঠিল ৰ’পৱে অৰ্থাৎ পাঁচদিন অভিযন্তা আৰু মেকানিকসকলৰ পৰিশ্ৰমৰ ফলত পুনৰ কাৰ্যক্ষম হৈ পৰিল ৰ’পৱে সেৱা।
আজিৰে পৰা পুৱা ৯ বজাৰ পৰা সন্ধ্যা ৫ বজালৈকে এই ৰ’পৱে চলাচল কৰিব।
ৰ’পৱে কেবিনত এবাৰত সীমিত সংখ্যক যাত্রীৰে চলাচল কৰিব বুলি এক সূত্ৰই জনায়।
উল্লেখযোগ্য যে, বুধবাৰৰ পুৱাৰে পৰা বন্ধ ৰখা হৈছিল ৰ’পৱেৰ চলাচল।
কন্ট্ৰ’ল পেনেলৰ ইঞ্জিনৰ কিছু বিজুতি হোৱাৰ বাবে বিদ্যুতৰ যোগানত ব্যাঘাত জন্মিছিল বুলি এক সুত্ৰত প্ৰকাশ পাইছে।
৫৬ কোটি টকা ব্যয় সাপেক্ষে নিৰ্মাণ কৰি উলিওৱা হৈছিল এই ৰ’পৱে সেৱা।
মন্ত্ৰী হিমন্ত বিশ্ব শৰ্মা আৰু সিদ্ধাৰ্থ ভট্টাচাৰ্য্যই যোৱা ২৪ আগষ্টত এই ৰ’পৱে সেৱা গুৱাহাটীবাসী ৰাইজৰ বাবে মুকলি কৰি দিছিল।
উল্লেখযোগ্য যে, ২০০৯ চনত তৰুণ গগৈৰ চৰকাৰৰ দিনতে আধাৰশিলা স্থাপন কৰাৰ সুদীৰ্ঘ ১১ বছৰৰ পাছত ২৪ আগষ্টৰ পৰা ৰাইজৰ বাবে মুকলি কৰা হৈছিল এই ৰ’পৱে সেৱা।
১৮২০ মিটাৰ দৈৰ্ঘ্যৰ এই ৰ’পৱেটোৱেই হৈছে গুৱাহাটী-উত্তৰ গুৱাহাটী সংযোগী নদীৰ ওপৰত থকা দেশৰ দীৰ্ঘতম ৰ’পৱে।
উল্লেখ্য, নিৰ্মাণ সম্পূৰ্ণ হোৱাৰ পাছতো লকডাউনৰ বাবে ৰ’পৱেটো মুকলি কৰিব পৰা হোৱা নাছিল।
এই ৰ’পৱেৰে এবাৰত ৩২ জন যাত্ৰীয়ে যাত্ৰা কৰিব পাৰে।
ৰ’পৱেৰে কেৱল এবাৰ যাত্ৰা কৰাৰ বাবদ প্ৰতি গৰাকী যাত্ৰীৰ পৰা ৬০ টকাকৈ ভাড়া লোৱা হয় আৰু একোজন যাত্ৰীয়ে অহা-যোৱাৰ বাবদ সমুদায় ১০০ টকা ভৰিব লাগে।