দিচপুৰ আৰক্ষীয়ে মঙলবাৰে আবেলি এক অভিযান চলাই গুৱাহাটী ভৰলুমুখৰ শান্তিপুৰ অঞ্চলৰ পৰা এ টি এম কার্ড চুৰি কৰাৰ অভিযোগত এজন যুৱকক আটক কৰে।
ভৰলুমুখ আৰক্ষীৰ সহযোগত দিচপুৰ আৰক্ষীয়ে শান্তিপুৰৰ এটা ভাৰাঘৰৰ পৰা আটক কৰা সঞ্জয় ঠাকুৰ (২৭) নামৰ যুৱকজনৰ ঘৰ বিহাৰৰ সমষ্টিপুৰত বুলি আৰক্ষীয়ে জানিবলৈ দিয়ে।
দিচপুৰ সংমণ্ডলৰ সহকাৰী আৰক্ষী আয়ুক্ত হিমাংশু দাসে সংবাদ মাধ্যমক জনোৱা মতে যোৱা ১৬ আগষ্টত খানাপাৰাৰ এছ বি আই এ টি এমত মহানগৰিৰ বশিষ্ঠৰ সতিশ তালুকদাৰ নামৰ এজন লোকৰ পৰা অভিযুক্ত যুৱকজনে ছলনা কৰি তেওঁৰ এ টি এম কাৰ্ডখন সৰকাই নিয়ে।
পিছত ‘অভিযুক্ত যুৱকজনে ছয়মাইলৰ এছ বি আই এ টি এমৰ পৰা ৪০,০০০ টকা উলিয়াঁওতে তালুকদাৰৰ মোবাইলত মেছেজ যোৱাত তেওঁ তৎক্ষণাত থানালৈ আহি এখন এফ আই আৰ দাখিল কৰে।‘ দাসে কয়।
আনহাতে, নৰ্থ-ইষ্ট নাওৰ আগত তালুকদাৰে কয়, ‘উক্ত দিনা মই এ টি এমৰ পৰা পইছা উলিওৱাৰ সময়ত এ টি এমৰ ভিতৰত দুজন লৰাও সোমাই আছিল। কিন্তু এ টি এমৰ পৰা পইছা উলিওৱাত মোৰ কিছু অসুবিধা হোৱাত ল’ৰাকেইজনে সহায় কৰাৰ ছলেৰে মোৰ এ টি এম কাৰ্ডখন সলাই পেলায়।‘
ঘটনা সংক্ৰান্তত ভাৰতীয় দণ্ডবিধিৰ ৪২০ আৰু ৩৭৯ ধাৰাৰ অধীনত দিছপুৰ আৰক্ষী থানাত ২৩৬১/১৮ নম্বৰৰ এটা গোচৰ ৰুজু কৰা হৈছে বুলি জানিবলৈ দি এ চি পি দাসে ঘটনাৰ তদন্তৰ বাবে যুৱকজনক আৰক্ষীৰ জিম্মালৈ অনা হ’ব বুলি উল্লেখ কৰে।
