সুদীৰ্ঘ ১৭ বছৰৰৰ অন্তত বৃহস্পতিবাৰে অনুষ্ঠিত হোৱা গুৱাহাটী প্ৰেছ ক্লাবৰ সাধাৰণ নিৰ্বাচনৰ চূড়ান্ত ফলাফল পুৱতি নিশা ঘোষণা কৰা হ’ল।
সভাপতি পদত মনোজ কুমাৰ নাথ আৰু অতুল্য মাধৱ গোস্বামীৰ মাজত মূল যুঁজখন হয় যদিও অৱশেষত ৪৪৯টা ভোট লাভ কৰি মনোজ কুমাৰ নাথ সভাপতি হিচাপে নিৰ্বাচিত হয়। গোস্বামীয়ে লাভ কৰে ৩২০টা ভোট।
উপ সভাপতি পদত বিনা প্ৰতিদ্বন্দ্বিতাই জয়ী হয় ধনীৰাম কলিতা। ধনীৰাম কলিতাই ৩৩১ টা ভোট লাভ কৰে।
উপ সভাপতি (মহিলাৰ বাবে সংৰক্ষিত) পদত জয়লাভ কৰে মৌচুমী শৰ্মা বৰুৱাই। তেওঁ ৩০১ টা ভোট লাভ কৰাৰ বিপৰীতে অৰুণিমা কলিতাই লাভ কৰে ২৭৭টা ভোট।
ইফালে সাধাৰণ সম্পাদক পদত ৪০৪ টা ভোট লাভ কৰি জয়ী হয় সঞ্জয় ৰয়। এই পদৰ বাবে সঞ্জয় ৰয় আৰু পাৰ্থ দেৱ গোস্বামীৰ মাজতে মূল যুঁজখন হৈছিল। গোস্বামীয়ে ২৭০ টা ভোট লাভ কৰে।
সহকাৰী সাধাৰণ সম্পাদক পদত জয় লাভ কৰে মনিন্দ্ৰ ডেকাই। তেওঁৰ আৰু প্ৰশান্ত কুমাৰ বৰুৱাৰ মাজত তীব্ৰ প্ৰতিদ্বন্দ্বিতা হৈছিল যদিও অৱশেষত মাত্ৰ দুটা ভোটৰ ব্যৱধানত জয়ী হয় ডেকা।
মনিন্দ্ৰ ডেকাই ২৯২ টা ভোট লাভ কৰাৰ বিপৰীতে বৰুৱাই লাভ কৰে ২৯০ টা ভোট।
আনহাতে সহকাৰী সাধাৰণ সম্পাদক (মহিলাৰ বাবে সংৰক্ষিত) পদত ৩০৪ টা ভোটৰ সহায়ত জয়ী হয় মনিষা কলিতাই। তেওঁৰ মূল প্ৰতিদ্বন্দ্বি ববিতা গগৈয়ে লাভ কৰে ২৬৭ টা ভোট।
সাংগঠনিক সম্পাদক পদত জয়ী হয় ৰাজু বৰুৱা। বৰুৱাই ২০৯ টা ভোট লাভ কৰাৰ বিপৰীতে তেওঁ নিকটৱৰ্তী প্ৰতিদ্বন্দ্বী ১৭৬ টা ভোট।
ইফালে কোষাধ্যক্ষ পদত বৃহৎ জয় সাব্যস্ত কৰিবলৈ সক্ষম হয় নয়ন প্ৰতিম কুমাৰ। তেওঁ ৩৫৫ টা ভোট লাভ কৰাৰ বিপৰীতে প্ৰশান্ত প্ৰতীম দত্তই লাভ কৰে ২৭০ টা ভোট।
সাংস্কৃতিক সম্পাদক পদত ৩৬৯ টা ভোটৰ সহায়ত বৃহৎ বিজয় সাব্যস্ত কৰে পল্লবী বৰাই। তেওঁৰ প্ৰতিদ্বন্দ্বি দীপক কুমাৰ বৰ্মনে লাভ কৰে ২০৩ টা ভোট।
ক্ৰীড়া সম্পাদক পদত তীব্ৰ প্ৰতিদ্বন্দ্বিতা হয় ধীৰাজ হাজৰিকা আৰু বিদ্যুৎ কলিতাৰ মাজত। মাত্ৰ দুটা ভোটৰ ব্যৱধানত বিদ্যুৎ কলিতাক পৰাস্ত কৰে ধীৰাজ হাজৰিকাই।
ধীৰাজ হাজৰিকাই ২৮২ টা ভোট লাভ কৰাৰ বিপৰীতে কলিতাই লাভ কৰে ২৮০ টা ভোট।
উল্লেখ্য যে বৃহস্পতিবাৰে ৰাতিপুৱা ১০ বজাৰ বিয়লি ৪ বজালৈ চলিছিল ভোটগ্ৰহণ। আৰু সন্ধিয়া ৫ বজাৰ পৰা ওৰে নিশা চলিছিল ভোট গণনা। নিৰ্বাচনত ৯৩.৪৪ শতাংশ ভোটদাতাই নিজৰ ভোটাধিকাৰ সাব্যস্ত কৰিছিল।
