বিগ বাজেটৰ পূজা! গুৱাহাটীত দৰ্শকৰ আকৰ্ষণ হ’ব ভাৰত মাতা,বাহুবলী, ফিফা ৱৰ্ল্ডকাপ,পিৰামিড

এইবাৰ পূজা চাবলৈ যদি মন যায়, তেন্তে আপুনি আহক গুৱাহাটীলৈ। অন্য বছৰসমূহৰ দৰেই এইবাৰো গুৱাহাটীত দেখিবলৈ পাব নতুন নতুন আটকধুনীয়া মণ্ডপৰ সমাহাৰ।

বিগ বাজেটৰ পূজা কমিটিসমূহে এইবছৰ দৰ্শকক আকৰ্ষণ কৰাৰ বাবে ভাৰত মাতাৰ মূৰ্তি, বাহুবলী, ফিফা ৱৰ্লডকাপ, পিৰামিড,বেলুৰ মঠৰ আকাৰত নিৰ্মাণ কৰি উলিয়াইছে পূজা মণ্ডপসমূহত। যেন পূজা মণ্ডপসমূহ নিৰ্মাণৰ নামত কমিটিসমূহৰ মাজত অঘোষিত প্ৰতিযোগিতাহে চলিছে।

দৰ্শকৰ বিনোদনৰ বাবে চেষ্টা কৰি পূজা কমিটিসমূহে লক্ষাধিক টকা খৰচ কৰি ভিন্ন আকাৰত সাজি উলিয়াইছে পূজা মণ্ডপসমূহ।

যোৱাবছৰ ১০২ ফুট দুৰ্গা মুৰ্তি নিৰ্মাণ কৰি জাকত-জিলিকা মণ্ডপ হিচাপে স্বীকৃতি পোৱা বিষ্ণুপুৰ পূজা কমিটিয়ে এইবাৰ নিৰ্মাণ কৰিছে ভাৰত-মাতাৰ ৭৬ ফুট দৈৰ্ঘ্যৰ মূৰ্তি সম্বলিত পূজা মণ্ডপ। ইয়াৰোপৰি উক্ত মণ্ডপৰ ভিতৰত দেখিবলৈ পাব মহাত্মা গান্ধী, নেতাজী সুভাষ চন্দ্ৰ বসুকে ধৰি অন্য স্বাধীনতা সংগ্ৰামীৰ প্ৰতিচ্ছবি।

৬৮ তম বিষ্ণুপুৰ পূজা মণ্ডপৰ এই মুৰ্তিটো ছয়গাঁৱৰ শিল্পী মনজিৎ কলিতাই ছয়গাঁৱৰ ১২ জন যুৱকৰ সৈতে লগ লাগি  নিৰ্মাণ কৰি উলিয়াইছে। এইবাৰ বিষ্ণুপুৰ পূজা কমিটিৰ বাজেট ৩৫ লাখ টকা।

তদুপৰি গুৱাহাটীৰ বিমলানগৰত নিৰ্মাণ কৰা হৈছে বাহুবলী মহিষমতিৰ সাম্ৰাজ্যৰ আকাৰত পূজাৰ মণ্ডপ। ৮৩ বছৰত ভৰি দিয়া বিমলানগৰ পূজা কমিটিয়ে লক্ষাধিক টকা ব্যয় কৰি নিৰ্মাণ কৰি উলিয়াইছে মহিষমতিৰ সাম্ৰাজ্যৰ আৰ্হিৰ পূজা মণ্ডপ।

আনহাতে, বেলতলা লক্ষ্মীমন্দিৰত এইবাৰ বাঁহেৰে নিৰ্মাণ কৰি উলিওৱা হৈছে পূজাৰ মণ্ডপ। মণ্ডপৰ লগতে সংগতি ৰাখি ২৪০ ফুট দীঘল এখন পাহাৰো সাজি উলিওৱা হৈছে। পূজা কমিটিৰ কাৰ্য্যকৰী সভাপতি ভাগ্যৰাম টেৰণে আমাক জনোৱা মতে উক্ত পাহাৰতে হাতী মানুহৰ সংঘাতৰ কাৰণ, ডাইনী হত্যা-অন্ধ বিশ্বাস ইত্যাদি বিষয়ৰ প্ৰতিমূৰ্তি নিৰ্মাণ কৰি উলিওৱা হ’ব।

তদুপৰি ৫০ বছৰত ভৰি দিয়া বেলতলা লক্ষ্মীমন্দিৰ পূজা মণ্ডপৰ ভিতৰভাগত ডলা-চালনী, মাছ ধৰা সামগ্ৰী যেনে-জাকৈ, খালৈ ইত্যাদি অতি আটকধুনীয়াকৈ সাজি উলিওৱা হৈছে।

উল্লেখ্য যে, ৫০ লাখ বাজেটেৰে আয়োজন কৰা  স্থানীয় শিল্পীসকলেই এই পুজা মণ্ডপ নিৰ্মাণ কৰা বুলি আমাক কমিটিৰ সদস্যই জানিবলৈ দিয়ে।

আনহাতে, পুজাৰ বতৰত ফিফা ৱৰ্ল্ড কাপ চাবলৈ হ’লে এইবাৰ প্ৰাগজ্যোতিষ মহাবিদ্যালয়ৰ সন্মুখলৈ আহিলেই হ’ব। মহানগৰীৰ ভৰলুস্থিত প্ৰাগজ্যোতিষ মহাবিদ্যালয়ৰ সন্মুখতে শান্তিপুৰ শ্লুইছ গেট পুজা কমিটিয়ে এইবাৰ ফিফা ৱৰ্ল্ড কাপৰ আৰ্হিৰে নিৰ্মাণ কৰি ওলিয়াইছে পুজা মণ্ডপ। মণ্ডপটো নিৰ্মাণ কৰোঁতে কাঁচ ব্যৱহাৰ কৰা হৈছে বুলি জানিব পৰা গৈছে।

তদুপৰি এই মণ্ডপৰ কাষতে লাচিতৰ মোমাই কটা গড়ো নিৰ্মাণ কৰি থকা হৈছে। লগতে পুজাৰ দিনকেইটাত ডকমকা কাণ্ডত মৃত্যুক সাবটি লোৱা নীলোৎপল-অভিজিতকো শ্ৰদ্ধাঞ্জলি জনোৱা হ’ব বুলি আয়োজক কমিটিয়ে জানিবলৈ দিয়ে।

আনহাতে, ১৮ লাখ বাজেটেৰে আয়োজন কৰা পুজা মণ্ডপটি নিৰ্মাণ কৰিবৰ বাবে কলকাতাৰ শম্ভু সিনহা নামৰ শিল্পীগৰাকীক মাতি অনা হৈছে।

ইপিনে বৃন্দাবনত নিৰ্মীয়মাণ কৃষ্ণ মন্দিৰৰ আৰ্হিত এইবাৰ সাজি উলিওৱা হৈছে লতাশিল পুজা মণ্ডপ।  এইবাৰ লতাশিল সাৰ্বজনীন পূজা কমিটিৰ খৰচ ১৬ লাখ টকা। লগতে যোৱা ৩৮ বছৰ ধৰি লতাশিল খেলপথাৰত লতাশিল সাৰ্বজনীন পূজা কমিটিয়ে পূজা অনুষ্ঠিত কৰি আহিছে।

আনহাতে, ৪৩ বছৰ গৰকা গীতানগৰ সাৰ্বজনীন পূজা কমিটিয়ে এইবেলি ২৫ লাখ টকা বাজেটেৰে নিৰ্মাণ কৰি উলিয়াইছে ৰামকৃষ্ণ বেলুৰ মঠ আৰ্হিত পূজাৰ মণ্ডপ।

ইয়াৰোপৰি কাহিলীপাৰা কলনিৰ ভৈৰৱতলাত এইবছৰ পিৰামিডৰ আকাৰত নিৰ্মাণ কৰি উলিওৱা হৈছে পূজাৰ মণ্ডপ। লগতে ৪৩ বছৰ অতিক্ৰম কৰা পূজা কমিটিখনে ২০ লাখ ব্যয় কৰি মিচৰৰ প্ৰাচীন সভ্যতা তুলি ধৰাৰ চেষ্টা কৰিছে।

মুঠতে লক্ষাধিক টকা খৰচ কৰি হ’লেও পূৰ্বৰ বছৰৰ নিচিনাকৈ অতি ধুম-ধামেৰে পূজাৰ প্ৰস্তুতি চলাইছে মহানগৰীৰ পূজা কমিটিসমূহে।