“ভৱিষ্যতৰ হেলমেট” বিষয়ক গৱেষণাৰ বাবে গুগলৰ মুখ্য কাৰ্য্যালয় আৰু ষ্টেনফ’ৰ্দ বিশ্ববিদ্যালয়ৰ আমন্ত্ৰণৰ লগতে আন বহুকেইটা গৱেষণাত বিশ্বৰ পদাৰ্থ বিজ্ঞানী সমাজৰ পৰা বিৰল স্বীকৃতি লাভ কৰিছে গুৱাহাটীৰ অসম জাতীয় বিদ্যালয়ৰ নৱম শ্ৰেণীৰ ছাত্ৰ কৌস্তুভ বি আৰ্য্যই।
হেলমেট উন্নীতকৰণৰ ক্ষেত্ৰত বিশ্বৰ আগশাৰীৰ পদাৰ্থ বিজ্ঞানীৰ সৈতে সহযোগিতামূলক গৱেষণাৰ সুযোগো লাভ কৰিছে ১৫ বছৰীয়া আৰ্য্যই।
Theory of Direction, গাড়ীৰ ধূলি নিষ্কাষণত বাধা, ভৱিষ্যৎ FD হেলমে’ট, Naval vest—আৰ্য্যৰ এই আটাইকেইটা গৱেষণাকে মৌলিক ৰূপে স্বীকৃতি দি ছাত্ৰজনক সদস্যভুক্ত কৰিছে বিশ্বৰ পদাৰ্থ বিজ্ঞানীসকলৰ অন্যতম মূল সংগঠন এমেৰিকান ফিজিকেল চচাইটিয়ে।
আনহাতে বিশ্ববিখ্যাত জাৰ্নেল SciVisionৰ অন্তৰ্গত Nanotechnology and applicationত তেওঁৰ Theory of Direction গৱেষণা পত্ৰ হিচাপে প্ৰকাশ পাব। এই পত্ৰ “সৰ্বকনিষ্ঠ গৱেষক”ৰ পত্ৰৰূপে স্বীকৃত হোৱাৰ লগতে এই গৱেষণাক “যুগান্তকাৰী” আখ্যা দিছে জাৰ্নেলখনে।
“Naval vest” আৰু “Theory of Direction”ৰ বাবে ক্ৰমে ফিনলেণ্ড (১৫ৰ পৰা ১৭ অক্তোবৰ) আৰু ইটালি (২১-২৩ অক্তোবৰ)ত হ’ব লগা ৩১ সংখ্যক Material science conference আৰু World Magnetic Material Summitত নিজৰ গৱেষণাৰ বিষয়ে বক্তৃতা দিয়াৰ বাবে বিশ্বৰ সৰ্বকনিষ্ঠ গৱেষকৰূপেও আমন্ত্ৰিত হৈছে আৰ্য্য।
নুনমাটিৰ অসম জাতীয় বিদ্যালয়ত বৃহস্পতিবাৰে আয়োজিত এক সংবাদমেলত ছাত্ৰজনে লাভ কৰা এই দুৰ্লভ স্বীকৃতিৰ বিষয়ে সদৰী কৰে বিদ্যালয় কৰ্তৃপক্ষই। সংবাদমেলখনত ছাত্ৰ আৰ্য্যৰ উপৰি তেওঁৰ শিক্ষক-শিক্ষয়িত্ৰী আৰু মাক-দেউতাকো উপস্থিত আছিল।
আৰ্য্য গুৱাহাটীৰ কুইন তালুকদাৰ বৈশ্য আৰু ডা০ বসন্ত কুমাৰ বৈশ্যৰ সন্তান।