অহা ১ জুলাইৰ পৰা ৩ জুলাইলৈ জাপানৰ প্ৰধানমন্ত্ৰীয়ে গুৱাহাটী ভ্ৰমণ কৰাৰ কথা থকাৰ পৰিপ্ৰেক্ষিতত ৰাজ্য চৰকাৰে মহানগৰীত ব্যাপক সৌন্দৰ্যবৰ্ধনৰ প্ৰস্তুতি চলাইছে। পিছে এই সৌন্দৰ্যবৰ্ধনৰ নামত পকী পথ আৰু পদপথ ড্ৰিলিং মেচিনেৰে ফুটা কৰি কংক্ৰিটৰ মাজত গছপুলি ৰোপণ কৰা কাৰ্যই গুৱাহাটীত তীব্ৰ বিতৰ্কৰ সৃষ্টি কৰিছে। পৰিৱেশৰ ভাৰসাম্যৰ প্ৰতি লক্ষ্য নাৰাখি মাটিৰ সলনি শিলৰ গুড়ি ব্যৱহাৰ কৰি এনেদৰে ৰাজপথত গছপুলি ৰোৱা ব্যৱস্থাক সচেতন মহলৰ লগতে শিক্ষাৰ্থী আৰু ৰাজনৈতিক নেতাই ৰাজহুৱা ধনৰ অপব্যয় আৰু অবিবেচক কাণ্ড বুলি অভিহিত কৰিছে।
লোকনিৰ্মাণ বিভাগৰ উদ্যোগত মহানগৰীৰ জিএছ ৰোড, জু ৰোড, ফাঁচীবজাৰ আৰু মাছখোৱাকে ধৰি বিভিন্ন প্ৰধান পথত এই কাম চলি আছে। পথৰ দুয়োকাষৰ পদপথৰ গ্ৰীলসমূহত ৰং লগোৱাৰ লগতে ৰাজপথসমূহ নতুনকৈ কাৰ্পেটিং কৰা হৈছে। কিন্তু ইয়াৰ সমান্তৰালকৈ মূল পথ আৰু পদপথৰ দুই-তিনি ফুট অংশ আৱৰি কংক্ৰিটৰ দেৱাল নিৰ্মাণ কৰি গছপুলি ৰোৱাৰ ফলত অত্যাধিক যান-বাহন চলাচল কৰা পথসমূহ ক্ৰমান্বয়ে ঠেক হৈ পৰিছে। বিভাগীয় তথ্য অনুসৰি গুৱাহাটীৰ চাৰিটা সংমণ্ডলত অসমৰ লগতে কলকাতাৰ পৰা অনা গছপুলি ৰোপণ কৰা হৈছে যদিও প্ৰকৃত মাটিৰ পৰিৱৰ্তে গছৰ গুৰিত শিলৰ গুড়ি ব্যৱহাৰ কৰা কাৰ্যই সকলোকে আশ্চৰ্য্যান্বিত কৰিছে।
এই সমগ্ৰ বিষয়টোৱে ৰাজনৈতিক প্ৰেক্ষাপটতো চৰ্চা লাভ কৰিছে। সৌন্দৰ্যবৰ্ধনৰ নামত ৰাজপথৰ পকা ভাঙি গছ ৰোপণ কৰাৰ লগতে জনপ্ৰিয় শিল্পী জুবিন গাৰ্গৰ দেৱাল চিত্ৰ মচি পেলোৱা কাৰ্যৰ সৰৱ সমালোচনা কৰিছে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে। তেওঁ চৰকাৰৰ এই কাৰ্যপন্থাটোক এক আজব কাণ্ড বুলি অভিহিত কৰি চৰকাৰৰ আন্তৰিকতা আৰু ৰূপায়ণ প্ৰক্ৰিয়াক লৈ প্ৰশ্ন উত্থাপন কৰে।
জাপানৰ প্ৰধানমন্ত্ৰীৰ ভ্ৰমণক কেন্দ্ৰ কৰি লোকনিৰ্মাণ বিভাগে বৰ্তমান যুদ্ধকালীন তৎপৰতাৰে গুৱাহাটীৰ পথসমূহৰ সৌন্দৰ্যবৰ্ধনৰ কাম অব্যাহত ৰাখিছে। অৱশ্যে, প্ৰাকৃতিক ভাৰসাম্য আৰু বহনক্ষম উন্নয়নৰ পৰিৱৰ্তে কংক্ৰিটৰ মাজত গছপুলি ৰোপণ কৰি সেউজীয়া পৰিৱেশৰ যি কৃত্ৰিম ছবি দাঙি ধৰাৰ প্ৰয়াস কৰা হৈছে, সেয়া পৰৱৰ্তী সময়ত কিমান দূৰ সফল বা দীৰ্ঘম্যাদী হয়, সেয়া লক্ষণীয় হৈ পৰিছে।
