গুৱাহাটী বিশ্ববিদ্যালয়ৰ অধীনৰ দূৰ আৰু মুক্ত শিক্ষা প্ৰতিষ্ঠান (IDOL)ৰ দুৰ্নীতি আৰু ব্যাপক অৰাজকতাৰ তদন্ত ৰাজহুৱা কৰাৰ দাবীৰ লগতে বিশ্ববিদ্যালয়খনৰ বিভিন্ন মৌলিক সমস্যা সমাধানৰ দাবীৰে গুৱাহাটী বিশ্ববিদ্যালয় আছু গোট আৰু বিশ্ববিদ্যালয় আইন মহাবিদ্যালয় আছু গোটে বিশ্বিবিদ্যালয়ৰ উপাচাৰ্য্যৰ হাতত এখন স্মাৰক পত্ৰ দাখিল কৰে।
গুৱাহাটী বিশ্ববিদ্যালয় আছু গোট আৰু বিশ্ববিদ্যালয় আইন মহাবিদ্যালয় আছু গোটৰ তৰফৰ পৰা উপাচাৰ্য্যৰ হাতত অৰ্পন কৰা স্মাৰক পত্ৰখনত মুঠ আঠটা সমস্যা সমাধানৰ বাবে দাবী উত্থাপন কৰা হৈছে।
স্মাৰক পত্ৰত উল্লেখ কৰা দাবীসমূহ এনেধৰণৰ-
১) গুৱাহাটী বিশ্ববিদ্যালয়ৰ অধীনৰ দূৰ আৰু মুক্ত শিক্ষা প্ৰতিষ্ঠাৰ দুৰ্নীতি আৰু ব্যাপক অৰাজকতাৰ তদন্ত কৰিবলৈ উপাচাৰ্য্যই বিশ্ববিদ্যালয়ৰ অধ্যাপকৰ দ্বাৰা গঠিত সাত জনীয়া তদন্ত প্ৰতিবেদন ৰাজহুৱা নকৰাটো দুৰ্ভাগ্যজনক। ছাত্ৰ সন্থাই তদন্তৰ প্ৰতিবেদন ৰাজহুৱা কৰিবলৈ দাবী জনায়।
২) গুৱাহাটী বিশ্ববিদ্যালয়ৰ অধীনৰ বন্ধ কৰি দিয়া ফুড চায়েঞ্চ, এম বি এ ইকোনোমিকছ আৰু এম টেক বায়োটেকন’লোজি বিষয়ৰ পাঠ্যক্ৰম পুনৰ প্ৰৱৰ্তনৰ দাবী।
৩) ছাত্ৰ-ছাত্ৰীৰ সুবিধাৰ্থে বিশ্ববিদ্যালয়ৰ কেণ্টিনসমূহৰ উন্নত মানদণ্ডৰ খাদ্যৰ সামগ্ৰী ৰেহাই মূল্যত যোগান ধৰাৰ লগতে ছাত্ৰাৱাস আৰু ছাত্ৰীনিৱাস সমূহত ৰাজসাহায্যযুক্ত ৰন্ধনগেছ আৰু খাদ্য সামগ্ৰী যোগান ধৰাৰ দাবী।
৪) বিশ্ববিদ্যালয়ৰ সৌন্দৰ্য্যবৰ্ধনৰ প্ৰতি লক্ষ্য ৰাখি জলাশয় আৰু উদ্যানসমূহৰ সৌন্দৰ্য্যবৰ্ধন আৰু ৰাজহুৱা স্থানত বায়ো টয়লেট নিৰ্মান কৰাৰ দাবী।
৫) বিশ্ববিদ্যালয়ৰ নিৰাপত্তাৰ প্ৰতি লক্ষ্য ৰাখি শীঘ্ৰেই ক্ল’জ কেম্পাছ, নিশা গ্ৰন্থাগাৰ খোলা ৰখা, খেলুৱৈ সকলৰ বাবে স্থায়ী প্ৰশিক্ষক নিযু্ক্তিৰ দাবী।
৬) মহাবিদ্যালয় আইন মহাবিদ্যালয়ত স্থায়ী শিক্ষক নিযুক্তি, আন্তঃগাঠনিৰ উন্নয়ন, গ্ৰন্থাগাৰিক নিযুক্তিৰ দাবী।
ইয়াৰ উপৰিও স্মাৰক পত্ৰৰ যোগেৰে আইন মহাবিদ্যালয়ৰ ছাত্ৰ-ছাত্ৰীক উচ্চতম ন্যায়ালয়, সংসদ ভৱন দৰ্শন কাৰ্য্যসূচীৰ পুনৰ প্ৰৱৰ্তন, প্ৰশাসনীয় পৰীক্ষাৰ প্ৰশিক্ষণ কেন্দ্ৰ স্থাপন আদি দাবীসমূহো উত্থাপন কৰা হয়।