মুখ্য নিৰ্বাচন আয়ুক্ত জ্ঞানেশ কুমাৰ আৰু নিৰ্বাচন আয়োগৰ কাৰ্যকলাপৰ বিৰুদ্ধে সমগ্ৰ দেশত তীব্ৰ প্ৰতিবাদ অব্যাহত থকাৰ মাজতে দিল্লী আৰক্ষীয়ে লোকসভাৰ বিৰোধী দলৰ দলপতি ৰাহুল গান্ধী আৰু কংগ্ৰেছ সাংসদ প্ৰিয়ংকা গান্ধী ৱাদ্ৰাৰ বিৰুদ্ধে দুখনকৈ এজাহাৰ ৰুজু কৰিছে। ভোটাৰ তালিকাৰ বিশেষ সংক্ষিপ্ত সংশোধনী প্ৰক্ৰিয়াত ব্যাপক অনিয়ম আৰু ভোটাৰৰ নাম কৰ্তনৰ অভিযোগ তুলি ইণ্ডিয়া মিত্ৰজোঁটৰ সাংসদসকলে মঙলবাৰে (৬ অক্টোবৰ) আৰু বুধবাৰে (৭ অক্টোবৰ) প্ৰতিবাদ সাব্যস্ত কৰিছিল। নিৰ্বাচন আয়োগৰ কাৰ্যালয় আৰু যন্তৰ-মন্তৰলৈ যোৱাৰ পথত প্ৰতিবাদকাৰীসকলক বাধা প্ৰদান কৰাৰ লগতে আৰক্ষীয়ে তেওঁলোকক আটক কৰিছিল।
দিল্লী আৰক্ষীয়ে বুধবাৰে আকাশবাণী ভৱন চৌহদত ‘অনধিকাৰ প্ৰৱেশ’ কৰাৰ অভিযোগত প্ৰথমখন আৰু বৃহস্পতিবাৰে পুৱা উইণ্ডছৰ চাৰ্কলত প্ৰতিবাদৰ সময়ত আৰক্ষীক আক্ৰমণ কৰা আৰু চৰকাৰী কামত বাধা দিয়াৰ অভিযোগত ৰাহুল গান্ধী আৰু প্ৰিয়ংকা গান্ধীৰ বিৰুদ্ধে দ্বিতীয়খন এফআইআৰ ৰুজু কৰে। আৰক্ষীৰ তথ্য অনুসৰি, বুধবাৰৰ প্ৰতিবাদৰ সময়ত কেইবাগৰাকীও সাংসদ আৰু নেতাসহ মুঠ ৯১ জন লোকক আটক কৰা হয়। ইপিনে, তৃণমূল কংগ্ৰেছৰ নেত্ৰী মহুৱা মৈত্ৰ আৰু প্ৰিয়ংকা গান্ধী ৱাদ্ৰাকে ধৰি কেইবাগৰাকীও সাংসদে প্ৰতিবাদৰ সময়ত আৰক্ষীৰ সৈতে হোৱা হতাহতিত আঘাতপ্ৰাপ্ত হোৱা বুলি দাবী কৰিছে।
ইফালে, ককৰোচ জনতা পাৰ্টী আৰু আইছা, এছএফআই তথা এআইএছএফকে ধৰি কেইবাটাও ছাত্ৰ সংগঠনে মুখ্য নিৰ্বাচন আয়ুক্তৰ পদত্যাগৰ দাবীত অহা ১০ অক্টোবৰত যন্তৰ-মন্তৰত এক বৃহৎ প্ৰতিবাদী কাৰ্যসূচীৰ আহ্বান জনাইছে। অৱশ্যে আৰক্ষীয়ে এই প্ৰতিবাদৰ বাবে আনুষ্ঠানিক অনুমতি প্ৰদান কৰা নাই। বাতৰি অনুসৰি, দিল্লী আৰক্ষীয়ে নাগৰিকসকলক এই প্ৰতিবাদত অংশগ্ৰহণ নকৰিবলৈ আহ্বান জনাই বিভিন্ন ছাত্ৰাৱাসৰ গৰাকী, বজাৰ সমিতি আৰু আৱাসিক কল্যাণ সমিতিসমূহৰ সৈতে বৈঠক অনুষ্ঠিত কৰিছে। লগতে, জুলাই মাহত হোৱা প্ৰতিবাদত অংশ লোৱা ‘অপৰাধমূলক পটভূমি’ৰ প্ৰায় ২৮০০ লোকক আৰক্ষীয়ে নিৰীক্ষণত ৰখা বুলি জানিব পৰা গৈছে। চিজিপিৰ মুখপাত্ৰ আশুতোষ ৰাংকাই অভিযোগ কৰা মতে, ১০ অক্টোবৰৰ প্ৰতিবাদত অংশগ্ৰহণ কৰাত বাধা দিবলৈ মহাৰাষ্ট্ৰ, উত্তৰ প্ৰদেশ আৰু পশ্চিমবংগত তেওঁলোকৰ হাজাৰ হাজাৰ স্বেচ্ছাসেৱকক আৰক্ষীয়ে আটক কৰিছে।
দেশজুৰি অব্যাহত থকা এই প্ৰতিবাদৰ পৰিপ্ৰেক্ষিতত মুখ্য নিৰ্বাচন আয়ুক্ত জ্ঞানেশ কুমাৰৰ নিৰাপত্তা ব্যৱস্থা যথেষ্ট কটকটীয়া কৰা হৈছে। বৰ্তমানৰ ‘জেড প্লাছ’ (Z+) নিৰাপত্তাৰ লগতে তেওঁৰ বাসভৱনৰ বাহিৰত অতিৰিক্ত আৰক্ষী বাহিনী মোতায়েন কৰা হৈছে। আনহাতে, দিল্লীত পৰিস্থিতি নিয়ন্ত্ৰণৰ বাবে কেন্দ্ৰীয় চৰকাৰে পশ্চিমবংগ, ছত্তীশগড় আৰু জম্মু-কাশ্মীৰৰ পৰা প্ৰায় ১২,০০০ কেন্দ্ৰীয় ৰিজাৰ্ভ আৰক্ষী বাহিনীৰ জোৱানক বিমানেৰে ৰাজধানীলৈ অনাৰ ব্যৱস্থা কৰিছে বুলি কেন্দ্ৰীয় গৃহ মন্ত্ৰালয়ৰ সূত্ৰই প্ৰকাশ কৰিছে।
