বড়োভূমিৰ নিৰ্বাচনত বৃহৎ জয় লাভ কৰাৰ পিছত মুখ্য কাৰ্যবাহী বিষয়া হিচাপে শপত গ্ৰহণ কৰিবলৈ ওলাইছে বড়োলেণ্ড পিপুল’ছ ফ্ৰন্টৰ নেতা হাগ্ৰামা মহিলাৰী।
মুখ্যমন্ত্ৰী হিমন্ত বিশ্ব শৰ্মাই জনোৱা মতে, অহা ৫ অক্টোবৰত বিটিচিৰ শপত গ্ৰহণ অনুষ্ঠান অনুষ্ঠিত হ’ব।
৩ অক্টোবৰত কোকৰাঝাৰত হোৱা এখন সভাৰ পিছত সাংবাদিকক সম্বোধন কৰে হাগ্ৰামা মহিলাৰীয়ে। উক্ত সংবাদমেলত তেওঁ কয় যে যদিহে এনডিএৰ পৰা প্ৰমোদ বড়োৰ দল ইউনাইটেড পিপলছ পাৰ্টি লিবাৰেল (ইউপিপিএল)ক আঁতৰাই দিয়ে তেন্তে বিপিএফ-এ এনডিএ-ত যোগদান কৰিব। যদিহে বিজেপিয়ে এনডিএ-ৰ পৰা ইউপিপিলক বহিষ্কাৰ নকৰে তেন্তে বিপিএফ-এ অকলেই চৰকাৰ চলাব।
ইয়াৰ উপৰিও মহিলাৰীয়ে বিপিএফৰ নিৰ্বাচনী ইস্তাহাৰত দিয়া প্ৰতিশ্ৰুতিসমূহ পূৰণ কৰা সন্দৰ্ভতো আলোচনা কৰে। বিপিএফে উল্লেখ কৰা মূল প্ৰতিশ্ৰুতিবোৰৰ ভিতৰত আছে বড়োলেণ্ডৰ জনসাধাৰণক ভূমি পট্টা প্ৰদান কৰা, বডোলেণ্ড টেৰিটৰিয়েল কাউন্সিল (বিটিচি)ৰ অধীনত থকা ১৬টা বিভাগ পুনৰুজ্জীৱিত কৰা, বিটিচিলৈ সম্পূৰ্ণ প্ৰশাসনিক ক্ষমতা পুনৰ ঘূৰাই অনা।
