কাষ চাপি আহিছে লোকসভা নিৰ্বাচন। সংসদত নিজৰ স্থান নিশ্চিত কৰাৰ বাবে এঘড়ী যুঁজিবলৈ সাজু হৈছে ৰাজনৈতিক নেতাসকল। আন কিছুৱে আকৌ চখ পূৰণৰ বাবে নিৰ্বাচনত অৱতীৰ্ণ হোৱাৰ মন মেলিছে। এনে এজন প্ৰাৰ্থী হৈছে কে পদ্মৰাজন।
তামিলনাডুৰ এই ব্যক্তিজনে একপ্ৰকাৰে সৃষ্টি কৰিছে অভিলেখ। বাৰে বাৰে নিৰ্বাচনত অৱতীৰ্ণ হৈ প্ৰতিবাৰেই পৰাজয়ৰ মুখ দেখাৰ পিছতো যেন ভাগৰি পৰা নাই পদ্মৰাজন। আশ্চৰ্যকৰভাৱে তেওঁ আকৌ জয়ৰ আশাৰেও নিৰ্বাচন নেখেলে।
প্ৰকাশিত খবৰ অনুসৰি, কে পদ্মৰাজনে ২৩৮ বাৰ নিৰ্বাচনত পৰাজয়ৰ মুখ দেখিছে। পদ্মৰাজন এজন মেৰামতিৰ দোকানৰ মালিক। বৰ্তমান ৬৫ বছৰীয়া পদ্মৰাজনে ১৯৮৮ চনত তামিলনাডুৰ গৃহ চহৰ মেট্টুৰৰ পৰা প্ৰথমবাৰ নিৰ্বাচনত অৱতীৰ্ণ হৈছিল।
ইয়াৰ পিছৰে পৰা পদ্মৰাজনে ৰাষ্ট্ৰপতি নিৰ্বাচনৰ পৰা আৰম্ভ কৰি স্থানীয় নিৰ্বাচনলৈকে, প্ৰতিটো নিৰ্বাচনত অংশগ্ৰহণ কৰি আহিছে। প্ৰাক্তন প্ৰধানমন্ত্ৰী অটল বিহাৰী বাজপেয়ী আৰু মনমোহন সিং, বৰ্তমানৰ প্ৰধানমন্ত্ৰী নৰেন্দ্ৰ মোদী আৰু কংগ্ৰেছ নেতা ৰাহুল গান্ধীৰ হাততো তেওঁ পৰাস্ত হৈছে।
এইবাৰ ১৯ এপ্ৰিলৰ পৰা আৰম্ভ হ’বলগীয়া সাধাৰণ নিৰ্বাচনত তেওঁ তামিলনাডুৰ ধৰ্মপুৰী জিলাৰ সংসদীয় আসনত প্ৰতিদ্বন্দ্বিতা আগবঢ়াব। ‘নিৰ্বাচন ৰজা’ হিচাপে জনপ্ৰিয় হৈ পৰা পদ্মৰাজনৰ বাবে আকৌ বিজয় মুখ্য নহয়। বৰং পৰাজয়তহে সুখী হয় তেওঁ। তেওঁৰ মতে, নিৰ্বাচনত নমাটোৱেই তেওঁৰ বাবে জয়।
তেওঁৰ প্ৰতিপক্ষ কোন, সেই ভাবিও পদ্মৰাজনে মূৰ নঘমায়। এতিয়া পদ্মৰাজনৰ মূল লক্ষ্য হৈছে তেওঁৰ পৰাজয়ৰ ধাৰা বৃদ্ধি কৰা। অৱশ্যে ইয়াৰ বাবে তিনি দশকৰো অধিক সময়ৰ মনোনয়ন মাচুলত তেওঁ হাজাৰ হাজাৰ টকাও খৰচ কৰিব লগা হৈছে।
‘লিমকা বুক অৱ ৰেকৰ্ডছ’ত ভাৰতৰ সৰ্বাধিক অসফল প্ৰাৰ্থী হিচাপে ইতিমধ্যে স্থান লাভ কৰিছে পদ্মৰাজনে। তেওঁৰ সৰ্বোত্তম প্ৰদৰ্শন আছিল ২০১১ চনত। সেইবাৰ তেওঁ মেট্টুৰত বিধানসভা নিৰ্বাচনত থিয় দিছিল আৰু ৬,২৭৩টা ভোট লাভ কৰিছিল।
কিন্তু পদ্মৰাজনে আকৌ আশা কৰা নাছিল এটাও ভোটৰ। ছয় সহস্ৰাধিক ভোট লাভ কৰাৰ পিছত তেওঁ প্ৰতিক্ৰিয়া প্ৰকাশ কৰি কয় যে ইয়াৰ দ্বাৰা মানুহে যে তেওঁক গ্ৰহণ কৰিছে সেয়া প্ৰমাণিত হৈছে।
টায়াৰ মেৰামতি কৰা দোকানৰ উপৰিও পদ্মৰাজনে হোমিঅ’পেথিক চিকিৎসা প্ৰদান কৰে আৰু স্থানীয় সংবাদ মাধ্যমৰ সম্পাদক হিচাপে কাম কৰে। কিন্তু তেওঁৰ সকলো কৰ্মৰ ভিতৰত নিৰ্বাচনত যুঁজ দিয়াটোৱেই আছিল আটাইতকৈ গুৰুত্বপূৰ্ণ।
অৱশ্যে এই আশ্চৰ্যকৰ চখৰ আঁৰত তেওঁৰ এক অন্য উদ্দেশ্য আছে বুলি জানিবলৈ দিছে পদ্মৰাজনে। তেওঁৰ মতে, মানুহে নিৰ্বাচনত নিজৰ মনোনয়ন দিবলৈ দ্বিধাবোধ কৰে। গতিকে মই আদৰ্শ হ’ব বিচাৰো, সজাগতা সৃষ্টি কৰিব বিচাৰো।”
এতিয়ালৈকে তেওঁ নিৰ্বাচনত অসংখ্য চিহ্ন প্ৰাৰ্থী প্ৰতীক হিচাপে ব্যৱহাৰ কৰিছে। মাছ, আঙঠি, টুপী, টেলিফোন ইত্যাদি চিহ্ন ব্যৱহাৰৰ পিছত এইবাৰ তেওঁৰ নিৰ্বাচনী প্ৰতীক হ’ব টায়াৰ।
পদ্মৰাজনে কয় যে তেওঁ শেষ উশাহলৈকে নিৰ্বাচনত যুঁজি থাকিব। কিন্তু যদি তেওঁ কেতিয়াবা জয়ী হয় তেন্তে তেওঁ স্তম্ভিত হৈ পৰিব বুলিহে মন্তব্য কৰে পদ্মৰাজনে। নিৰ্বাচনত কেনেবাকৈ জয়ী হ’লে হাৰ্ট এটেকহে আহিব বুলিহে পদ্মৰাজনে ব্যঙ্গ কৰি কয়।
