সংখ্যালঘু ভোট নোলোৱাকৈয়ে চৰকাৰ গঠন কৰিব নেকি বিজেপিয়ে?
২০২১ চনৰ বিধানসভা নিৰ্বাচনৰ পূৰ্বে বাঘবৰ-জনীয়া দক্ষিণ শালমৰা আৰু জলেশ্বৰলৈ ভোট বিচাৰি নাযায় প্ৰতাপী মন্ত্ৰী ড০ হিমন্ত বিশ্ব শৰ্মা।
লোকসভা নিৰ্বাচনৰ পূৰ্বেও বাঘবৰ, জনীয়া ইত্যাদি সংখ্যালঘু অধ্যুষিত সমষ্টিৰ প্ৰসংগৰে ৰাজ্যৰ ৰাজনীতি উত্তাল কৰি অহা মন্ত্ৰী হিমন্তৰ মুখতে এইবাৰ সেই অঞ্চললৈ ভোট বিচাৰি নোযোৱাৰ প্ৰসংগ উত্থাপন হৈছে।
প্ৰশ্ন হৈছে, কিয় সংখ্যালঘু অধ্যুষিত সমষ্টিলৈ ভোট বিচাৰি নাযায় মন্ত্ৰী হিমন্ত বিশ্ব শৰ্মা? সংখ্যালঘু লোকে বিজেপিক বেয়া পায় নেকি? নে সংখ্যালঘু ভোট নোলোৱাকৈয়ে বিজেপিয়ে গঠন কৰিব চৰকাৰ?
সংবাদমেলত হিমন্ত বিশ্ব শৰ্মাৰ স্পষ্ট মত ‘‘মই বাঘবৰ, জনিয়া, জলেশ্বৰলৈ ভোট বিচাৰি নাযাওঁ, গ’লেও তেওঁলোকে বিজেপিক ভোট নিদিয়ে। সেই সমষ্টিৰ ছাত্ৰ-ছাত্ৰীয়ো বিনামূলীয়া নামভৰ্তিৰ সুবিধা লাভ কৰিছে। ৰাজনীতি মানুহৰ আশীৰ্বাদ লাভৰ বাবে কৰিব লাগে অভিশাপৰ বাবে নহয়।’’
‘বাঘবৰ, জনিয়া, দক্ষিণ শালমাৰা আদিৰ অৰুণোদয় আঁচনিৰ হিতাধিকাৰীয়ে বিজেপিক ভোট দিব নেকি? জলেশ্বৰত ১৬ হাজাৰ পৰিয়ালে অৰুণোদয় আঁচনিৰ সুবিধা পাব তেওঁলোকে আমাক ভোট দিব নেকি? বুলিও প্ৰশ্ন কৰে হিমন্তই।
ইপিনে, জনীয়া সমষ্টিত ১০ হাজাৰ ছাত্ৰ-ছাত্ৰীক বিনামূলীয়া নামভৰ্তিৰ সুবিধা কৰি দিয়াৰ পাছতো তেওঁলোকে বিজেপিক ভোট নিদিলে বুলি দাবী কৰে হিমন্তই।
আনহাতে, হিমন্তৰ এই মন্তব্যৰ বিপৰীতে ২১ত সংখ্যালঘুৰ সহায়েৰে বিজয় সাব্যস্ত কৰাৰ ইতিমধ্যে লক্ষ্য লৈছে বিজেপিৰ ৰাজ্যিক সভাপতি ৰঞ্জিত দাসে।
ইতিমধ্যে, বহু সংখ্যালঘু অধ্যুষিত এলেকাত গৈ বিজেপিয়ে আৰম্ভ কৰিছে প্ৰচাৰ অভিযান। বহু সংখ্যালঘু নেতাক বিজেপিত গেৰুৱা সাজৰে আদৰি আনিছে বিজেপিৰ মজিয়ালৈ। তাৰ ভিতৰত বহু কংগ্ৰেছ, অগপ আৰু এআইয়ুডিএফৰ নেতৃত্বও থকা পৰিলক্ষিত হৈছে।
ৰঞ্জিত দাসৰ দাবী ’২০ খন সংখ্যালঘু অধ্যুষিত এলেকাত বিজেপিয়ে প্ৰাৰ্থী থিয় কৰাব আৰু কমেও ৭ খন আসনত সংখ্যালঘু প্ৰাৰ্থী জয়ী কৰাই আনিব বিজেপিয়ে।‘
তেনেক্ষেত্ৰত হিমন্ত বিশ্ব শৰ্মাৰ এনেবোৰ মন্তব্যই নিশ্চয়কৈ কেৰুণ আনিব ৰঞ্জিত দাসৰ ২১ ক লৈ দেখা সপোনত।
