জিম্বাৱৱেৰ ক্ৰিকেট কিংবদন্তি হিথ ষ্ট্ৰিক জীয়াই আছে। সমগ্ৰ ক্ৰিকেট বিশ্বই প্ৰাক্তন ক্ৰিকেটাৰগৰাকীৰ মৃত্যুৰ ঘটা বুলি শোকাকুল হৈ পৰিছিল যদিও এই খবৰ সম্পূৰ্ণ ভুৱা বুলি জানিবলৈ দিছে হিথ ষ্ট্ৰিকে নিজেই। এই ভুৱা খবৰত হতাশ অনুভৱ কৰা বুলিও ষ্ট্ৰিকে লগতে মন্তব্য কৰিছে।
ষ্ট্ৰিকৰ মৃত্যুৰ কথা ঘোষণা কৰাৰ কেইঘণ্টামানৰ পাছতে তেওঁৰ একালৰ সতীৰ্থ হেনৰী অ’লংগাই আন এক টুইট যোগে তেওঁ পূৰ্বে প্ৰকাশ কৰা খবৰ নাকচ কৰে আৰু কিংবদন্তি তাৰকাগৰাকী জীয়াই আছে বুলি সদৰী কৰে।
অ’লংগাই নতুনকৈ পোষ্ট কৰা টুইটটোত কয় যে, ষ্ট্ৰিকৰ মৃত্যুৰ খবৰ অতিৰঞ্জিত কৰি প্ৰচাৰ কৰা উৰাবাতৰি আৰু তেওঁ এতিয়া ষ্ট্ৰিকৰ সৈতে কথা পাতিছে। ক্ৰিকেটীয় ভাষাৰে অ’লংগাই লগতে ষ্ট্ৰিকক তৃতীয় আম্পায়াৰে উভতাই আনিছে বুলি ব্যঙ্গ কৰে।
উল্লেখ্য যে, আজি পুৱা অ’লংগাৰ টুইটটোৰ পিছতে ষ্ট্ৰিকৰ মৃত্যু ঘটা বুলি প্ৰচাৰ হৈছিল। ইয়াৰ পিছতে জিম্বাৱৱেৰ লগতে অন্যান্য আন্তঃৰাষ্ট্ৰীয় ক্ৰিকেটাৰ কেইবাজনো ক্ৰিকেট তাৰকাই ষ্ট্ৰিকৰ মৃত্যুত দুখ প্ৰকাশ কৰিছিল।
মৃত্যুৰ খবৰ মিছা হ’লেও অৱশ্যে প্ৰাক্তন তাৰকাগৰাকী কেঞ্চাৰৰ সৈতে যুঁজি থকাৰ খবৰ সত্য। বিগত মে’ মাহত ষ্ট্ৰিকৰ স্বাস্থ্যৰ অধিক অৱনতি ঘটাৰ বাবে পৰিয়ালে তেওঁক তৎক্ষণাত চিকিৎসালয়ত ভৰ্তি কৰাইছিল বুলি জানিবলৈ দিছিল। তাৰকাগৰাকীয়ে এই যুঁজত জয়ী হ’ব বুলি পৰিয়ালে আশা প্ৰকাশ কৰিছে।
উল্লেখ্য যে, আফ্ৰিকান দেশখনক ক্ৰিকেট বিশ্বৰ মানচিত্ৰত এক শক্তি হিচাপে আত্মপ্ৰকাশ কৰোৱাত ষ্ট্ৰিকৰ ভূমিকা আছিল অনবদ্য। জিম্বাৱৱেক প্ৰতিনিধিত্ব কৰি ষ্ট্ৰিকে আন্ত:ৰাষ্ট্ৰীয় কেৰিয়াৰত ৬৫খন টেষ্ট, ১৮৯খন এদিনীয়া মেচত অংশগ্ৰহণ কৰিছিল।
এই সময়ছোৱাত তেওঁ দেশৰ হৈ ৪৯৩৩ ৰান সংগ্ৰহ কৰাৰ লগতে ৪৫৫টা উইকেট দখল কৰিছিল। টেষ্টত ১০০০ ৰান আৰু ১০০ উইকেটৰ ডাবল আৰু এদিনীয়াত ২০০০ ৰান আৰু ২০০ উইকেট দখল কৰা ষ্টিকেই হৈছে জিম্বাৱৱেৰ একমাত্ৰ ক্ৰিকেটাৰ।
দুৰ্নীতি বিৰোধী ভংগৰ বাবে আইচিচিয়ে আঠ বছৰৰ বাবে নিষেধাজ্ঞা জাৰি কৰাত ষ্ট্ৰিকৰ কেৰিয়াৰ ম্লান হৈ পৰিছিল। অৱসৰৰ পিছত অৱশ্যে ষ্ট্ৰিক পুনৰ ক্ৰিকেটৰ সৈতে জড়িত হৈ পৰে।
জিম্বাৱৱে, স্কটলেণ্ড, বাংলাদেশৰ লগতে ইণ্ডিয়ান প্ৰিমিয়াৰ লীগৰ ফ্ৰেন্সাইজি গুজৰাট লায়ন্স আৰু কলকাতা নাইট ৰাইডাৰ্ছৰ প্ৰশিক্ষকৰ ভূমিকা গ্ৰহণ কৰিছিল প্ৰাক্তন তাৰকাগৰাকীয়ে।
