শীত নামিছে। শীত নামিছে সমগ্ৰ বিশ্বতে। শীতৰ লগতে নামিছে বৰফ। প্ৰবল তুষাৰপাত আৰু বৰফে ঢাকি ধৰিছে উত্তৰ আমেৰিকাৰ বক্ষ। বৰফৰ লগতে হৈছে ঘূৰ্ণী বতাহ।
উত্তৰ আমেৰিকা আৰু কানাডাত প্ৰবল শীত আৰু ঘূৰ্ণী বতাহত বিধ্বস্ত হৈ পৰিছে জনজীৱন। আমেৰিকাৰ নেশ্যনেল ৱেদাৰ চাৰ্ভিচে প্ৰদান কৰা তথ্য অনুসৰি দেশৰ মিনেছ’টা ৰাজ্যৰ তাপমাত্ৰা মাইনাছ ৩৮ ডিগ্ৰী চেলছিয়াছ পৰ্যন্ত নামিছে। আনহাতে পশ্চিম কানাডাত তাপমাত্ৰা জমাতকৈ ৫৩ ডিগ্ৰী তললৈ নামি আহিছে।
আমেৰিকাৰ অধিকাংশ অঞ্চল তুষাৰপাতৰ ফলত ক্ষতিগ্ৰস্ত হৈছে। এই পৰ্যন্ত দেশত ৪৯ জন লোকে প্ৰাণ হেৰুৱাইছে। ইয়াৰে কেৱল নিউয়ৰ্কৰ ইৰি কাউন্টিত ২৭ জন লোকৰ মৃত্যু হৈছে। অহাইঅ’ ৰাজ্যত মৃত্যু হৈছে ৯ জন লোকৰ।
আনহাতে, কেন্টাকি ৰাজ্য আৰু কেনছাছ চহৰত তিনিজনকৈ মৃত্যু হৈছে। মৃতকৰ সংখ্যা আৰু বৃদ্ধি পোৱাৰ আশংকা কৰা হৈছে।
তুষাৰপাতৰ ফলত বিমান পৰিবহণত বাধাৰ সৃষ্টি হৈছে। স্থানীয় সময় অনুসৰি বুধবাৰে পুৱালৈকে আমেৰিকাত প্ৰায় ২৯০০ খন বিমান বাতিল কৰা হৈছে।
নিউয়ৰ্কৰ বাফেলোৰ ৰাজপথত নিয়ৰৰ মাজত আবদ্ধ হৈ আছে হাজাৰ হাজাৰ গাড়ী। এই তুষাৰপাতক ১৯৭৭ চনত বাফেলোত হোৱা তুষাৰপাতৰ সৈতে তুলনা কৰা হৈছে। নিউয়ৰ্কৰ গৱৰ্ণৰ কেথী হোকুলে কয় যে এই ধুমুহা বাফেলোৰ ইতিহাসত আটাইতকৈ বিধ্বংসী ধুমুহা।
হোকুলে স্থানীয়ভাৱে যান-বাহন বন্ধৰ নিৰ্দেশনা মানি চলিবলৈ অনুৰোধ জনাইছে। ৰাস্তাত বৰফ পৰিষ্কাৰ কৰাৰ কাম অব্যাহত ৰখাৰ লগতে পথত পৰিত্যক্ত হৈ পৰি থকা বহু গাড়ী আঁতৰাই নিয়াৰ ব্যৱস্থা কৰিব বুলিও তেওঁ প্ৰতিশ্ৰুতি প্ৰদান কৰিছে।
ইফালে PowerOutage.US ৰ তথ্য অনুসৰি সোমবাৰে বিয়লিলৈকে আমেৰিকাৰ প্ৰায় ৭৫ হাজাৰ গ্ৰাহক বিদ্যুৎ বিহীন হৈ পৰিছে বৰফৰ ধুমুহাৰ বাবে। তুষাৰপাত আৰম্ভ হোৱাৰ পিছত এটা সময়ত এই সংখ্যাই ১০ লাখ অতিক্ৰম কৰিছে।
তুষাৰপাতৰ ফলত ক্ষতিগ্ৰস্ত নিউয়ৰ্কলৈ জৰুৰী কেন্দ্ৰীয় সাহায্য প্ৰদানৰ কথা ঘোষণা কৰিছে আমেৰিকাৰ ৰাষ্ট্ৰপতি জো বাইডেনে। এটা টুইটত তেওঁ লিখিছে, ‘এই ছুটীৰ সপ্তাহৰ শেষত যিসকলে আপোনজনক হেৰুৱাইছে তেওঁলোকৰ প্ৰতি মোৰ আন্তৰিক সমবেদনা।’
