হিমাচল প্ৰদেশৰ পাহাৰীয়া চহৰবোৰ প্ৰচণ্ড বৰফৰ ফলত বিধ্বস্ত হৈ পৰিছে। তুষাৰপাতৰ বাবে বন্ধ কৰি দিয়া হৈছে পথ। ঘণ্টাৰ পিছত ঘণ্টা ধৰি ৰাস্তাত গাড়ী ৰখাই থোৱা হৈছে। হোটেলবোৰ পৰ্যটকেৰে ভৰি আছে। এই ছবিখন হিমাচল প্ৰদেশৰ জনপ্ৰিয় পৰ্যটনস্থলী মানালীৰ।
সূত্ৰৰ পৰা জানিব পৰা মতে, কোঠীৰ পৰা মনালীলৈ যোৱা ৮ কিলোমিটাৰ দৈৰ্ঘ্যৰ এটা পথত যান-জঁটৰ সৃষ্টি হৈছে। চৰকাৰৰ তথ্য অনুসৰি হিমাচল প্ৰদেশৰ মুঠ ৬৮৫ টা পথ বৰফ পৰাৰ বাবে বন্ধ হৈ পৰিছে।
২৩ জানুৱাৰীৰ পৰা ২৬ জানুৱাৰীলৈ — দীঘলীয়া ছুটীৰ বাবে বহু লোকে ফুৰিবলৈ মানালীলৈ গৈছিল। তেতিয়াই তুষাৰপাত আৰু বৰষুণ আৰম্ভ হ’ল। উষ্ণতাও হঠাতে কমি গ’ল। প্ৰতিকূল বতৰৰ বাবে হোটেলৰ পৰা ওলাই যাব পৰা নাই পৰ্যটকসকল। ফলত মানালীৰ হোটেলবোৰ প্ৰায় ১০০ শতাংশ ভৰ্তি হৈ পৰিছে। বহু পৰ্যটকে মানালীত স্থান নোপোৱাৰ বাবে কুল্লুৰ দিশে আগবাঢ়িছে।
কিন্তু, পথৰ অৱস্থা বেয়া। চৰকাৰী সূত্ৰৰ পৰা জানিব পৰা মতে, তুষাৰপাতৰ বাবে মানালিৰ মুঠ ৬৮৫ টা পথ বন্ধ হৈ আছে। ইয়াৰে ২৯২ টা লাহাউল-স্পিতিত, ১৩২ টা চাম্বাত, ১২৬ টা মাণ্ডিত, ৭৯ টা কুল্লুত, ২৯ টা ছিৰমৌৰত, ৪ টা কিন্নৌৰত, ২ টা উনাত আৰু এটা সোলানত।
সূত্ৰ অনুসৰি শুকুৰবাৰে বিয়লিৰ পৰা আৰম্ভ হোৱা যান-জঁট শনিবাৰে নিশালৈকে মুকলি নহ’ল। গাড়ীত আবদ্ধ হৈ আছে হাজাৰ হাজাৰ পৰ্যটক। শনিবাৰে নিজেই এই সতৰ্কবাণী জাৰি কৰিছে হিমাচল প্ৰদেশ চৰকাৰে। ২৮ তাৰিখ বুধবাৰলৈকে সমগ্ৰ ৰাজ্যতে এনে বতৰৰ পৰিস্থিতি অব্যাহত থাকিব বুলি জনোৱা হৈছে।
প্ৰায় চাৰি মাহৰ পাছত হিমাচল প্ৰদেশত বৰফ পৰিছে। কিন্নৌৰ জিলা আৰু শিমলাৰ কেইবাখনো ঠাইত বগা বৰফৰ চাদৰেৰে আৱৰি ধৰিছে। ভূমধ্য সাগৰত গঠিত পশ্চিমীয়া ঘূৰ্ণীবতাহ দেওবাৰলৈকে সক্ৰিয় হৈ থাকিব বুলি বতৰ বিজ্ঞান বিভাগে প্ৰকাশ কৰিছে। মাণ্ডি, সোলান, কাংৰা, বিলাসপুৰকে ধৰি কেইবাটাও স্থানত হালধীয়া সতৰ্কবাণী জাৰি কৰা হৈছে।
