বাক্সা জিলাৰ তামুলপুৰ আৰক্ষী থানাৰ অন্তৰ্গত ডিমিলাপাৰ আৰু শালমাৰা গাঁৱত তামুলপুৰ আৰক্ষীয়ে আজি পুৱাৰে পৰা অভিযান চলাই বৃহৎ পৰিমাণৰ চুৰি হোৱা ছুপাৰিৰ বস্তা পুখুৰীৰ পানীৰ পৰা আৰু গুদামৰ পৰা উদ্ধাৰ কৰিবলৈ সক্ষম হয়।
উল্লেখযোগ্য যে ৩০ অক্টোবৰৰ নিশা চিৰাং জিলাৰ বিজনীৰ পৰা নৰ্থ ইষ্ট ট্ৰেভেল এজেন্সিৰ ১২ চকীয়া য়ুপি ৭৮ চিএন ৪৫৫৮ নম্বৰৰ ট্ৰাক এখনেৰে লক্ষ্ণৌলৈ ছুপাৰি নি থকা অৱস্থাত কোকৰাঝাৰ জিলাৰ পাতগাঁও আৰক্ষী চকীৰ সমীপত ৰাষ্ট্ৰীয় ঘাইপথৰ পৰা আচিনাক্ত দুৰ্বৃত্তই ড্ৰাইভাৰ আৰু হেণ্ডিমেনসহ হাইজেক কৰিছিল।
দুৰ্বৃত্তৰ দলটোৱে এখন বলেৰ’ গাড়ীত ড্ৰাইভাৰ আৰু হেণ্ডিমেনজনক উঠাই লৈ ট্ৰাকখন নিশা বিভিন্ন ঠাইত ঘূৰাই ফুৰাইছিল আৰু ছুপাৰিখিনি ট্ৰাকখনৰ পৰা বিভিন্ন ঠাইত কেইবাখনো সৰু সৰু গাড়ীত নমাই ৰাখিছিল।
ছুপাৰিখিনি ট্ৰাকৰ পৰা নমাই হোৱাৰ পিছত ট্ৰাকৰ ড্ৰাইভাৰ আৰু হেণ্ডিমেনজনক গোৱালপাৰাৰ ওচৰত ঘন জংঘলত পেলাই থৈ দুৰ্বৃত্তৰ দলটো পলায়ন কৰিছিল।
কালি নিশা বাক্সা জিলাৰ তামুলপুৰ আৰক্ষী থানাৰ আৰক্ষীয়ে আৰক্ষীৰ উচ্চ পদস্থ বিষয়াৰ পৰা খবৰ লাভ কৰে যে পাতগাঁৱৰ পৰা চুৰি হোৱা ৩২০ বস্তা ছুপাৰি তামুলপুৰ অঞ্চলত লুকুৱাই ৰখা হৈছে।
উচ্চ পদস্থ আৰক্ষী বিষয়াৰ পৰা খবৰ লাভ কৰি তামুলপুৰ আৰক্ষী থানাৰ ভাৰপ্ৰাপ্ত বিষয়া আৰক্ষী পৰিদৰ্শক অসীম বৰাৰ নেতৃত্বত যোৱা আৰক্ষীৰ দলে তামুলপুৰ আৰক্ষী থানাৰ অন্তৰ্গত ডিমিলাপাৰ আৰু শালমাৰা গাঁৱত নিশাই অভিযান চলায় যদিও সফল নহল।
ইয়াৰ পিছত আজি পুৱা পুনৰ তামুলপুৰ আৰক্ষীয়ে অভিযান চলাই ডিমিলাপাৰ গাঁৱত অমূল্য কলিতাৰ ঘৰত অভিযান চলাই ঘৰৰ পিছফালে থকা পুখুৰীৰ পৰা প্ৰায় ৭০ বস্তা চুৰি হোৱা ছুপাৰি উদ্ধাৰ কৰে।
তাৰোপৰি আৰক্ষীয়ে ডিমিলাপাৰ গাঁৱৰ এটা ৰাইছ মিলৰ পৰা ৪০ বস্তা আৰু ডিমিলাপাৰ গাঁৱৰ সমীপৰ শালমাৰা গাঁৱৰ জনৈক আলী উপাধিৰ লোক এজনৰ ঘৰৰ পৰা ৮০ বস্তা ছুপাৰি উদ্ধাৰ কৰিবলৈ সক্ষম হয়।
আনহাতে বাতৰি লিখা সময়লৈকে আৰক্ষীয়ে অমূল্য কলিতাৰ ঘৰৰ পুখুৰীত অভিযান অব্যাহত ৰাখিছে।
ইতিমধ্যে নৰ্থ ইষ্ট ট্ৰেভেল এজেঞ্চিৰ কৰ্মচাৰী আহি তামুলপুৰত উপস্থিত হৈছে। আনহাতে তামুলপুৰ আৰক্ষীয়ে এই ঘটনাৰ লগত জড়িত থকাৰ সন্দেহত কেইবাজনো লোকক আটক কৰি সোধ-পোছ অব্যাহত ৰাখিছে। আৰক্ষীয়ে তদন্তৰ খাতিৰত আটকাধীন লোককেইজনৰ নাম প্ৰকাশ কৰাৰ পৰা বিৰত থাকে।
৪০ বস্তা ছুপাৰি উদ্ধাৰ হোৱা মিলটোৰ মালিকে জানিব দিয়া মতে ডিমিলাপাৰ গাঁৱৰ প্ৰাণজিত দাস নামৰ এজন যুৱকে ৪০ বস্তা চুপাৰি তেওঁৰ মিলিত থৈছিল আৰু তাৰ বিনিময়ত তেওঁক ভাড়া দিয়া হ’ব বুলি জনাইছিল।
ইপিনে চুৰি হোৱা ট্ৰাকখন মঙলদৈৰ ওচৰত উদ্ধাৰ কৰা বুলি নৰ্থ ইষ্ট ট্ৰেভেল এজেঞ্চিৰ কৰ্মচাৰীয়ে সংবাদ মাধ্যমক জানিবলৈ দিছে।
আনহাতে ট্ৰাক হাইজেক কৰি ছুপাৰি চুৰি কৰা কাণ্ডৰ লগত এক বৃহৎ চক্ৰ জড়িত থকা বুলি তামুলপুৰ আৰক্ষীয়ে সন্দেহ প্ৰকাশ কৰিছে আৰু এই বিষয়ত আৰক্ষীয়ে জোৰদাৰ তদন্ত অব্যাহত ৰাখিছে।
