ইণ্ডোনেছিয়াৰ জাকাৰ্টাত অনুষ্ঠিত হৈ যোৱা এছিয়ান গেইমছ ২০১৮’ত স্বৰ্ণ কন্যা হিমা দাসে লাভ কৰা অভূতপূৰ্ব সাফল্যৰ পিছত অসমবাসী আনন্দত উল্লাসিত হৈ পৰিছিল। সমগ্ৰ দেশৰ লগতে অসমবাসীৰ বাবে এয়া আছিল এক গৌৰৱৰ মুহূৰ্ত।
ধিঙৰ কান্ধুলিমাৰীৰ স্বৰ্ণকন্যা গৰাকীক সঠিকভাৱেই ‘ধিং এক্সপ্ৰেছ’ হিচাপে আখ্যায়িত কৰি উষ্ম আদৰণি জনোৱা হৈছিল।
ইয়াৰ পিছতে অসম চৰকাৰে মহানগৰীৰ কলাক্ষেত্ৰৰ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত এক বিশাল অভিনন্দন অনুষ্ঠানৰ আয়োজন কৰিছিল।
একেদৰে সদৌ অসম ছাত্ৰ সন্থায়ো লতাশিল খেল পথাৰত এক বিশাল সম্বৰ্দ্ধনা অনুষ্ঠানৰ আয়োজন কৰিছিল। উল্লেখনীয় যে হিমা আছুৰ ধিং শাখাৰ ক্ৰীড়া সম্পাদক আছিল।
হিমাই ভাৰতৰ ৰাষ্ট্ৰপতি ৰামনাথ কোবিন্দৰ পৰা অৰ্জুন বঁটা গ্ৰহণ কৰাৰ লগতে ‘বৰ্ষশ্ৰেষ্ঠ ভাৰতীয় যুৱ বঁটা’কে ধৰি কেইবাটাও বঁটাৰে সন্মানিত হৈছে।
হিমা দাসক ভাৰতীয় তেল নিগমে এইচ আৰৰ চাকৰিও প্ৰদান কৰিলে। হিমাৰ ফটোৱে কেইবাখনো আগশাৰীৰ আলোচনীৰ বেটুপাতৰো শোভাবৰ্দ্ধন কৰিলে।
এই সকলোবোৰ ঠিকেই আছিল। কিন্তু ইয়াৰ পিছতে এতিয়া ভৱিষ্যতৰ যুৱ এথলেটগৰাকীৰ বাবে সম্বৰ্দ্ধনা, সাক্ষাৎকাৰ, গামোচা, শৰাই লোৱা পৰ্ব-অনুষ্ঠানবোৰে যেন খেলুৱৈগৰাকীক মূল লক্ষ্যৰ পৰা আঁতৰাই আনিছে।
অলিম্পিকৰ প্ৰত্যাহ্বান সন্মুখত ৰাখি এইদৰে সময় অপব্যয় কৰাটোৱে তেওঁৰ প্ৰস্তুতিৰ দিশত বাধাৰ সৃষ্টি কৰিছে আৰু অলিম্পিক পদক লাভৰ সপোনকো যেন স্তিমিত কৰি তুলিব সেয়া স্পষ্ট হ’বলৈ ধৰিছে।
অৱশেষত এথলেটিকছ ফেডাৰেশ্যন অৱ ইণ্ডিয়াৰ সভাপতি আদিল ছুমাৰিঅ’ৱালাৰ মন্তব্য কৰিছে, “হিমাই খেলত মনোযোগ নিদি যদি অন্য বঁটা বাহন,অনুষ্ঠান আদিত ব্যস্ত থাকে তেতিয়া হিমা আগন্তক টকিঅ’ অলিম্পিকৰ সপোন সপোন হৈয়ে থাকিব।”
পাটিয়ালা শিবিৰত অসম কন্যা গৰাকীয়ে নিদিষ্ট সময়ত অনুশীলনত যোগদান নকৰিলে টকিঅ’ অলিম্পিকত যোগদানৰ ক্ষেত্ৰত সমস্যাৰ সন্মুখীন হ’বও পাৰে বুলি প্ৰকাশ কৰিছে এথলেটিকছ ফেডাৰেশ্যন অৱ ইণ্ডিয়াই।
জানিব পৰা মতে হিমাৰ প্ৰশিক্ষক গেলিনা পেট্ৰ’ভা বুখাৰিনাই শিৱিৰত যোগদান কৰিছে আৰু হিমাৰ বাবে অপেক্ষা কৰিছে।
অৱশ্যে হিমাই এই সম্পৰ্কত বিভাগীয় কৰ্তৃপক্ষৰ সৈতে ফোন যোগে বাৰ্তালাপ কৰিছে। ৰাজ্য চৰকাৰে হিমাক অহা ১৮ অক্টোবৰত প্ৰশিক্ষণলৈ উভতি যাবলৈ নিৰ্দেশ দিয়া বুলি এক সূত্ৰ অনুসৰি জানিব পৰা গৈছে।
