‘শ্বেৰমান আলীক বৰ্তমান জেইলত দিলে তেওঁক হিৰ’ বনোৱা হ’ব, তেওঁ সেইটোৱে বিচাৰিছে। তেওঁ বাঘবৰত কেইটামান বেছি ভোট পাই জিকিব বিচাৰিছে, তেওঁ মিঞাৰ নেতা হ’ব বিচাৰিছে। তেওঁ বিচৰা কামতো আমি নকৰো’। এই মন্তব্য মন্ত্ৰী হিমন্ত বিশ্ব শৰ্মাৰ।
তেওঁ লগতে কয়, ‘২০২১ চনৰ পিছত শ্বেৰমান আলীক এশ শতাংশ জেইলত পঠিয়াম আৰু জেইলৰ পৰা ওলাব নোৱাৰাকৈ ভৰাম’।
আজি বিশ্বনাথৰ সাকোমঠা চাহ বাগিচা আৰু প্ৰতাপগড় চাহ বাগিচাত মন্ত্ৰী হিমন্ত বিশ্ব শৰ্মাই একে দিনাই দুখনকৈ আদৰ্শ উচ্চ মাধ্যমিক বিদ্যালয়ৰ আধাৰশিলা স্থাপন কৰিবলৈ আহি এই মন্তব্য কৰে।
উল্লেখ্য যে অসমৰ চাহ বাগিচাৰ ছাত্ৰ-ছাত্ৰীৰ বাবে ১১৯ খন আদৰ্শ উচ্চ বিদ্যালয় স্থাপনৰ অংশ হিচাপে প্ৰথম দুখন বিদ্যালয়ৰ আধাৰশিলা স্থাপন কৰে মন্ত্ৰী হিমন্ত বিশ্ব শৰ্মাই।
বিশ্বনাথৰ সাকোমঠা চাহ বাগিচা আৰু প্ৰতাপগড় চাহ বাগিচাত আধাৰশিলা স্থাপন কৰি কংগ্ৰেছক তীব্ৰ সমালোচনা কৰাৰ লগতে মিঞাই অসমৰ ভাষা সংস্কৃতিৰ প্ৰতি ভাবুকি কঢ়িয়াই অনাৰ বাবে আন সকলো জাতি-জনগোষ্ঠীক এক হ’বলৈ আহ্বান জনায় মন্ত্ৰী গৰাকীয়ে।
মন্ত্ৰী গৰাকীয়ে কয়, ‘স্বাধীনতাৰ ৭০ বছৰৰ পিছত প্ৰথমবাৰৰ বাবে চাহ বাগিচাত পথ নিৰ্মাণৰ কাম আৰম্ভ হৈছে। মই যেতিয়া বিদেশলৈ যাও তেতিয়া তাত বিদেশৰ ৰেষ্টুৰেণ্টত অসমৰ চাহ খাব নেকি বুলি শুধিলে মোৰ মন গৌৰাম্বিত হৈ পৰে। চাহ জনজাতি সকলৰ উন্নয়ন আৰু বিকাশৰ ক্ষেত্ৰত স্বাধীনতাৰ পিছৰপৰা কোনো এখন চৰকাৰেই গুৰুত্ব নিদিলে’।
‘বিজেপি আমাৰ চৰকাৰ অহাৰ পিছত আমি গুৰুত্ব প্ৰদান কৰিছো। অসমৰ বিভিন্ন চাহ বাগিচাত আজি একে সময়তে ১১৯ খন চৰকাৰী হাইস্কুলৰ কামৰ শুভাৰম্ভ কৰিবলৈ ইয়াত সমবেত হৈছো। এই বিদ্যালয় সমূহৰ নিৰ্মাণৰ কাম ৬মাহৰ ভিতৰত সমাপ্ত হ’ব। চাহ বাগিচাৰ শিক্ষাৰ ক্ষেত্ৰত আমি যথেষ্ট গুৰুত্ব দিছো। আৰু ইয়াৰ এক সাহসী পদক্ষেপ হৈছে বাগিচাত শিক্ষাৰ সম্প্ৰসাৰণ’, এই মন্তব্য কৰে মন্ত্ৰী শৰ্মাই।
মন্ত্ৰী শৰ্মাই লগতে কয়, ‘বাগিচাত একোখনকৈ হাইস্কুল স্থাপন কৰিম। ১২২ কোটি টকা খৰছ কৰি এই নিৰ্মাণ কাৰ্য কৰা হ’ব আৰু অহা বৰ্ষৰ মে’ মাহৰ পৰা শ্ৰেণী আৰম্ভ হ’ব’।
আনহাতে ২০২২ চনৰ ভিতৰত এই বিদ্যালয়সমূহক উচ্চতৰ মাধ্যমিক বিদ্যালয়লৈ সম্প্ৰসাৰণ কৰা হ’ব বুলিও মন্তব্য কৰে।
ইফালে মিঞা মিউজিয়াম কলাক্ষেত্ৰত স্থাপন কৰিলে তেওঁলোকৰ ঠিকনা জেইলত হ’ব বুলি উল্লেখ কৰে মন্ত্ৰী গৰাকীয়ে।
আমাৰ মাজত বিভাজনৰ সুযোগ লৈ মিঞাই আমাৰ সভ্যতা সংস্কৃতি ধ্বংস কৰিবলৈ চেষ্টা কৰিছে বুলিও বিস্ফোৰক মন্তব্য কৰে হিমন্ত বিশ্ব শৰ্মাই।
নৱেম্বৰৰ শেষৰ ফালে বিশ্বনাথৰ মেডিকেল কলেজৰ কামৰো শুভাৰম্ভ কৰা হ’ব আৰু শীঘ্ৰেই বিশ্বনাথ ঘাটৰ পৰা উমাটুমনিলৈ ৰোপ ৱে’ৰ কামো আৰম্ভ হ’ব।
আনহাতে বিশ্বনাথ সমষ্টিত ১৬ হাজাৰ পৰিয়াল অৰুণোদয় আঁচনিৰ জৰিয়তে উপকৃত হ’ব বুলিও মন্তব্য কৰে।
আজিৰ এই অনুষ্ঠানত মন্ত্ৰী গৰাকীক সংগ দিয়ে মন্ত্ৰী ৰঞ্জিত দত্ত, সাংসদ পল্লব লোচন দাস, বিধায়ক প্ৰমোদ বৰঠাকুৰ আৰু বিধায়ক উৎপল বৰাৰ লগতে উপস্থিত থাকে চৰকাৰৰ বিভিন্ন বিষয়া-কৰ্মচাৰী সকল।
