‘কা’ বিৰোধী আন্দোলনৰ সময়ত ৰাজপথত টায়াৰ জ্বলাবলৈ আহ্বান জনোৱা আৰু অসম বন্ধৰ আহ্বান জনোৱাৰ বাবে ১১ মাহে কাৰাগাৰত বন্দী হৈ আছে নেকি অখিল গগৈ? এই প্ৰশ্ন এইবাবেই উত্থাপন কৰিছো কিয়নো ৰিপাব্লিক টিভিৰ সাংবাদিক অৰ্ণৱ গোস্বামীক সমৰ্থন জনাবলৈ গৈ এক মন্তব্য কৰে হিমন্ত বিশ্ব শৰ্মাই।
হিমন্তই সংবাদ মাধ্যমৰ আগত কয়, ‘অখিল গগৈ আৰু অৰ্ণৱ গোস্বামীৰ মাজত পাৰ্থক্য আছে। অখিল গগৈ আন্দোলনকাৰী। অৰ্ণৱ গোস্বামীৰ এনে ভিডিঅ’ ক্লিপ আছে নেকি ৰাস্তাত টায়াৰ জ্বলাই দিয়ক, সৰ্বাত্মক বন্ধ কৰি দিয়ক এনেকৈ কোৱা?’
‘কা আন্দোলনৰ সময়ত জুই বিলাক আমি নিজেই দেখা পাইছো। অৰ্ণৱ গোস্বামীয়ে ক’ত জুই জ্বলাব গৈছে? অৰ্ণৱে ক’ত কৈছে টায়াৰ লৈ ৰাস্তা জ্বলাই দিয়ক।‘ হিমন্তই লগতে কয়।
এই মন্তব্যৰ পৰাই স্পষ্ট হৈ পৰিছে যে ৰাজপথত টায়াৰ জ্বলাই প্ৰতিবাদ সাব্যস্ত কৰিবলৈ আহ্বান জনোৱা আৰু অসম বন্ধৰ আহ্বান জনোৱাৰ বাবেই অখিল গগৈক কাৰাগাৰলৈ নিক্ষেপ কৰিলে ৰাজ্য চৰকাৰে।
ইপিনে, অৰ্ণৱ গোস্বামীয়ে মহাৰাষ্ট্ৰত ড্ৰাগছ ৰমৰমীয়া বেহাৰ বিৰুদ্ধে মাত মতাৰ বাবেহে তেওঁক জেইললৈ নিক্ষেপ কৰিলে বুলি দাবী কৰে মন্ত্ৰী হিমন্ত বিশ্ব শৰ্মাই।
‘ড্ৰাগছৰ বিৰুদ্ধে আন্দোলন আৰু অন্য আন্দোলনৰ মাজত পাৰ্থক্য আছে। অৰ্ণৱ গোস্বামীয়ে দুৰ্নীতি পোহৰলৈ আনিছিল, ড্ৰাগছ মাফিয়াৰ নাম পোহৰলৈ আনিছিল। ৰাস্তাত ট্ৰায়াৰ জ্বলোৱা আৰু অৰ্ণৱ গোস্বামীৰ কামৰ মাজত কেনেকৈ তুলনা কৰিব পাৰি?’ হিমন্তই এইদৰে কয়।
অহা দুই-তিনি দিনত অৰ্ণৱ গোস্বামী মুকলি আকাশৰ তললৈ আহিব বুলি দাবী কৰি হিমন্তই মহাৰাষ্ট্ৰৰ শিৱসেনা আৰু কংগ্ৰেছৰ চৰকাৰক কটাক্ষ কৰি কয়, ‘অৰ্ণৱ গোস্বামীক গ্ৰেপ্তাৰ কৰি মহাৰাষ্ট্ৰ চৰকাৰ কিমান দুৰ্বল সেইটো প্ৰমাণ কৰিলে। এতিয়া মোৰ বিপক্ষে কিমান সংবাদ মাধ্যমে লিখে কেতিয়াবা আমি সেইবোৰক লৈ বেয়া চিন্তা কৰিছো নেকি? মোৰ ল’ৰা-ছোৱালী পত্নী কাকোৱেই এৰি নিদিয়ে।‘
‘গণতন্ত্ৰত চতুৰ্থ স্তম্ভক আমি এটা স্বাধীনতা দিব লাগিব। নহ’লে দেশখন বাছি নাথাকিব। মহাৰাষ্ট্ৰত ড্ৰাগছৰ খেলা উন্মোচন কৰাৰ বাবেই অৰ্ণৱ গোস্বামীৰ ওপৰত আক্ৰমণ চলিছে।‘ হিমন্তই কয়।