হিমন্ত বিশ্ব শৰ্মাই বিটিচিত অশান্তি বিচাৰে। সেইবাবে জুই লগোৱা ৰাজনীতি কৰিব বিচাৰিছে। আমি অসমৰ ল’ৰা-ছোৱালীক স্ক’লাৰশ্বিপ দিব খোজো। হিমন্ত বিশ্ব শৰ্মাই হাতত বন্দুক তুলি দি হিংসাক প্ৰশ্ৰয় দিব খোজে। বিটিআৰ এলেকাত প্ৰাক-নিৰ্বাচনী সভাত অংশগ্ৰহণ কৰি অসম প্ৰদেশ কংগ্ৰেছৰ সভাপতি গৌৰৱ গগৈয়ে আজি কোকলাবাৰীত এইদৰে কয়।
কংগ্ৰেছ নেতাজনে কয়, কংগ্ৰেছ দলৰ চৰকাৰ থাকোতে বিটিচি চুক্তিৰ জৰিয়তে শান্তি আৰু সম্প্ৰতি আৰম্ভ কৰিছিল। কিন্তু এতিয়া নিজৰ গাদী সুৰক্ষাৰ স্বাৰ্থত বিজেপি চৰকাৰ আৰু মুখ্যমন্ত্ৰী হিমন্ত বিশ্ব শৰ্মাই বিটিচিত অশান্তি কৰিব বিচাৰিছে আৰু সমগ্ৰ অসমকে হিংসাৰে জৰ্জৰিত কৰিব বিচাৰিছে। ইয়াৰ বিৰুদ্ধে ৰাইজ সজাগ হ’ব লাগিব। নিজৰ পৰিয়ালৰ নামত সম্পত্তি বৃদ্ধি কৰা মুখ্যমন্ত্ৰীৰ ষড়যন্ত্ৰত এতিয়া অসমৰ শ্ৰমিক-কৃষক, আনকি মাজুলীৰ খেতিয়ক, কাজিৰঙাৰ চাহ শ্ৰমিকেও এতিয়া ‘মামী টেক্স’ দিবলগীয়া হৈছে।
গৌৰৱ গগৈয়ে আৰু কয় যে এই সময়ত ইউপিপিএল আৰু বিপিএফ নিমাতে আছে। বিৰোধিতা কৰিব বিচৰা নাই৷ কিয়নো তেওঁলোকৰ ৰিম’ট কণ্ট্ৰোল হিমন্ত বিশ্ব শৰ্মাৰ হাতত আছে৷ হিমন্ত বিশ্ব শৰ্মাৰ হাতত তিনিটা ফোন থাকে৷ এটা ফোন উঠাই অমিত শ্বাহক লগায়৷ এটা ফোন উলিয়াই বিপিএফৰ হাগ্ৰামা মহিলাৰীক ফোন কৰে৷ পিছৰ পকেটৰ পৰা ফোন উলিয়াই ইউপিপিএলৰ প্ৰমোদ বড়োৰ সৈতে কথা পাতে৷ হিমন্ত বিশ্ব শৰ্মাৰ হাতত আৰু এটা চিক্ৰেট ফোন আছে৷ কাইলৈ যদি বিধানসভাৰ নিৰ্বাচনৰ পিছত কংগ্ৰেছৰ নেতৃত্বত চৰকাৰ আহে, তেন্তে ফাইল যেতিয়া খোল খাব তেতিয়া নিজকে বচাবলৈ বিজেপি ত্যাগ কৰি কংগ্ৰেছৰ ওচৰলৈ আহিবলৈ এটা চিক্ৰেট ফোন তেওঁ ৰাখি থৈছে৷
আজিৰ ৰাজহুৱা সভাত প্ৰদেশ কংগ্ৰেছৰ সভাপতিগৰাকীয়ে ভোটাৰৰ অধিকাৰ সম্পৰ্কেও মন্তব্য দাঙি ধৰে। তেওঁ কয়, ”প্ৰতিটো নিৰ্বাচনেই গুৰুত্বপূৰ্ণ৷ নিৰ্বাচনত জনগণে দিয়া এটা এটা ভোট গুৰুত্বপূৰ্ণ৷ ভোট কেতিয়াও ব্যৰ্থ হৈ যাব নালাগে৷ এই ভোটৰ সৈতে আপোনালোকৰ ল’ৰা-ছোৱালীৰ ভৱিষ্যত জড়িত হৈ আছে৷ এই ভোটৰ সৈতে গণতান্ত্ৰিক অধিকাৰ জড়িত হৈ আছে৷ ভোটৰ সৈতে চৰকাৰে যোৱা ৫ বছৰত কি কাম কৰিলে সেই কথা জনাৰ অধিকাৰ আছে৷ নিৰ্বাচনী সভাত আপোনালোকে কথাবোৰ ভালদৰে শুনি ঘৰলৈ গৈ গাঁৱৰ মানুহৰ লগত সেইবোৰ আলোচনা কৰিব৷ গাঁৱৰ মানুহৰ মন্তব্য, চিন্তাধাৰা বুজিবলৈ চেষ্টা কৰা উচিত৷’’
পিতৃ তৰুণ গগৈক স্মৰণ কৰি গৌৰৱ গগৈয়ে কয় যে তৰুণ গগৈৰ কথা মনত পৰিলেই আজিও সেই হাঁহি থকা মুখখন দেখা পাও৷ সৰলতা মনত পেলাও৷ অসমৰ প্ৰতিটো জাতি-জনগোষ্ঠীৰ প্ৰতি থকা মৰমৰ কথা মনত পেলাও৷ তৰুণ গগৈক বিৰোধীয়ে ৰাজনৈতিকভাৱে সমালোচনা কৰিলেও বিৰোধীয়ে এই কথা স্বীকাৰ কৰে যে ২০০৩ চনত তৰুণ গগৈ ক্ষমতা অহাৰ পিছতে অসমলৈ শান্তি ঘূৰি আহিল৷ সেই শান্তি আমি সকলোৱে অনুভৱ কৰিছো৷
গগৈয়ে কয়, ”তৰুণ গগৈ চৰকাৰৰ আগৰ সময়খিনি ২০০১ চনৰ আগত মানুহে সন্ধিয়া ওলাবলৈ ভয় কৰিছিল৷ সেই ভয় তৰুণ গগৈয়ে নাইকিয়া কৰিলে৷ আৰক্ষীৰ বল, বন্দুক বা গুলীৰে নহয়৷ সকলোকে মাতি আনি ৰাজনৈতিকভাৱে গণতান্ত্ৰিকভাৱে সেই কাম কৰিছে৷ বিটিচিত নিৰ্বাচনৰ সময়ত তৰুণ গগৈক একাংশ লোকে কৈছিল যে কেন্দ্ৰত আমাৰ চৰকাৰ, ৰাজ্যত আমাৰ চৰকাৰ৷ বিটিচিত আমি সকলো আঞ্চলিক ৰাজনীতিক শেষ কৰি দিও৷ তেতিয়া তৰুণ গগৈয়ে কৈছিল যে আমি ৰাজনীতি ক্ষমতাৰ কাৰণে কৰি থকা নাই৷ আমি কংগ্ৰেছ দল, ইতিহাস থকা দল৷ স্বাধীনতা সংগ্ৰামৰ সময়ত জন্ম হোৱা দল৷ আমি কংগ্ৰেছে ৰাজনীতি কৰিছো সাধাৰণ লোকৰ জীৱনত পৰিৱৰ্তন আনিবলৈ৷ বিটিচিৰ মানুহে কিবা যদি বিচাৰিছে সেয়া হৈছে শান্তি আৰু সম্প্ৰীতি৷ আমি আঞ্চলিক শক্তিবোৰক আগুৱাই লৈ গ’লে শান্তি আহিব৷’’
কংগ্ৰেছ নেতাগৰাকীয়ে আৰু কয় যে সেই সময়ত বিটিচিত শান্তিৰ বাবে কংগ্ৰেছে ৰাজনৈতিক বলিদান দিলে৷ আজি কেন্দ্ৰত বিজেপি, ৰাজ্যত বিজেপি কিন্তু বিটিচিৰ প্ৰতি কংগ্ৰেছৰ দৰে একে উদাৰভাৱ মই দেখা নাই৷ শান্তিৰ পক্ষে তেওঁলোকে কথা নকয়৷ ক্ষমতাৰ কাৰণে বিজেপিয়ে যিকোনো পৰ্যায়লৈ যাব পাৰে বুলিও কয় প্ৰদেশ কংগ্ৰেছৰ সভাপতিগৰাকীয়ে।
তেওঁ কয় যে বিজেপিয়ে মানুহৰ মাজত সংঘাত লগাব পাৰে৷ এতিয়া কেৱল ক্ষমতাৰ কাৰণে মানুহৰ মাজত বন্দুক বিতৰণ কৰিব বিচাৰিছে৷ এয়া হৈছে হিমন্ত বিশ্ব শৰ্মাৰ ৰাজনীতি৷ অসমৰ মানুহৰ মাজত বন্দুক বিতৰণ কৰি মানুহৰ মাজ গুলীয়াগুলি হওক আৰু তেওঁলোকে তাক লৈ ৰাজনীতি কৰিব৷ সিদ্ধান্ত আপোনালোকে ল’ব লাগিব৷ গগৈয়ে কয়, ”হিমন্ত বিশ্ব শৰ্মাই নিজৰ ল’ৰাৰ হাতত বন্দুক নিদিয়ে৷ মন্ত্ৰী-বিধায়কৰ হাতত বন্দুক নিদিয়ে৷ তেওঁলোকৰ সন্তানক বিদেশলৈ পঢ়ুৱাবলৈ পঠাব৷ ভাল ভাল চাকৰি দিব৷ আৰু বন্দুক দিব আমাৰ দুখীয়া অঞ্চলৰ ল’ৰা-ছোৱালীৰ হাতত৷ বিজেপিৰ ভোট দিয়া মানে কিছুদিন পিছত আমি ল’ৰা-ছোৱালীৰ হাতত একে-৪৭ দেখা পাম৷ বিজেপিক ভোট দিয়া মানে কোনোবা ল’ৰাই মদ খাই নিজৰ পৰিয়ালৰ ওপৰতে বন্দুক চলাব৷ বিজেপিক ভোট দিয়া মানে চিণ্ডিকেট কৰি থকাসকলে বন্দুক দেখুৱাই আৰু ধন কাঢ়ি নিবলৈ সুবিধা কৰি দিয়াৰ দৰে হ’ব৷
