জুবিন গাৰ্গৰ মৃত্যুৰ ন্যায়ৰ দাবীত ৰাজ্যজুৰি চলি থকা প্ৰতিবাদৰ মাজতে শনিবাৰে ১ নৱেম্বৰত মৰিগাঁৱত উপস্থিত হৈ মুখ্যমন্ত্ৰী হিমন্ত বিশ্ব শৰ্মাই বহুকেইটা গুৰুত্বপূৰ্ণ আৰু বিস্ফোৰক মন্তব্য আগবঢ়ায়।
মৰিগাঁৱৰ মিকিৰভেটাত মুখ্যমন্ত্ৰী মহিলা উদ্যমিতা অভিযানৰ চেক বিতৰণ অনুষ্ঠানত সংবাদ মাধ্যমৰ আগত সৰৱহৈ পৰে মুখ্যমন্ত্ৰী শৰ্মা। জুবিন গাৰ্গৰ মৃত্যুৰ সন্দৰ্ভত চলি থকা এছ আই টি (SIT) তদন্ত সন্দৰ্ভত মুখ্যমন্ত্ৰীয়ে আস্থা প্ৰকাশ কৰি কয় যে তদন্ত সঠিক পথেৰে আগবাঢ়িছে।
এছ আই টিয়ে সঠিক পথত আগবাঢ়িছে। বহুত বিস্ফোৰক তথ্য আমাৰ হাতত পৰিছে। মই ভাবোঁ যে ১০ ডিচেম্বৰৰ ভিতৰত বা তাৰ আগতেই জুবিনৰ ঘটনা সম্পূৰ্ণ ৰাইজৰ মাজলৈ আমি আনিব পাৰিম বুলি উল্লেখ কৰে মুখ্যমন্ত্ৰী শৰ্মাই
তেওঁ লগতে কয় যে চার্জশ্বিট দাখিল হোৱাৰ পিছত ৰাইজে এই ঘটনাৰ সন্দৰ্ভত সঠিক তথ্য লাভ কৰিব। তেওঁ দৃঢ়তাৰে কয় যে ১০ ডিচেম্বৰৰ ভিতৰত জুবিনক ন্যায় দিয়াৰ আচল পদক্ষেপ হিচাপে এছ আই টিৰ চার্জশ্বিট দাখিল কৰা হ’ব। ইয়াৰ পিছতে ৰাইজে বহু বছৰজুৰি জুবিনৰ লগত হৈ থকা বহুত দুখ আৰু বেদনা জড়িত কাহিনী গম পাব। তেওঁ আৰু কয় যে ১০ ডিচেম্বৰৰ পাছত মোৰ মুখখন যেতিয়া খুলিব তেতিয়া বেলেগৰ মুখ বন্ধ হ’ব।
মৰিগাঁৱত পদুম ফুলৰ ছবিৰ লগতে জুবিন গাৰ্গ ‘অমৰ হওক’ বুলি দেৱালত লিখা সন্দৰ্ভত সোধা প্ৰশ্নৰ উত্তৰত মুখ্যমন্ত্ৰীয়ে বিজেপি সদস্যসকলক জুবিনৰ ‘প্ৰকৃত অনুৰাগী’ বুলি আখ্যা দিয়ে। তেওঁ ৰাইজৰ দলৰ বিধায়ক অখিল গগৈৰ নাম লৈ কয় যে অখিল গগৈয়ে ৰাজনীতি কৰিব পাৰিলে বিজেপিয়েও জুবিন গাৰ্গৰ প্ৰতি সমৰ্থন জনাব পাৰে।
তেওঁ লগতে কয় যে “এতিয়া যিবিলাক মিঞা মুছলমান জুবিনৰ অনুৰাগী আগবাঢ়ি আহিছে, তেওঁলোক জীৱনকালত কেতিয়াও জুবিনৰ অনুৰাগী নাছিল। তেওঁলোক ডুপ্লিকেট অনুৰাগী।”
তেওঁ দাবী কৰে যে তেওঁলোকে পূজা-সভাত জুবিনৰ ফটো ৰাখে, কিন্তু কোনো মিঞা মুছলমানে ধৰ্মীয় সভাত জুবিন গাৰ্গৰ ফটো ব্যৱহাৰ নকৰে। তেওঁ অভিযোগ কৰে যে মিঞা সমাজৰ এচামে গধূলি জুবিনৰ সমাধিত আহি জুবিনক কষ্ট দিয়া কাম কৰি থাকে। মুখ্যমন্ত্ৰীয়ে লগতে কয় যে নিৰ্বাচন শেষ হোৱাৰ পিছত এই ‘নকল অনুৰাগীবিলাক’ নাইকিয়া হ’ব।
ইয়াৰোপৰি গৌৰৱ গগৈৰ পাকিস্তান লিংক সন্দৰ্ভত কৰা প্ৰশ্নৰ উত্তৰত মুখ্যমন্ত্ৰীয়ে কয় যে এতিয়া জুবিন গাৰ্গৰ ন্যায় প্ৰথম, তাৰ পাছতহে গৌৰৱ গগৈক যি কৰিব লাগে কৰা হ’ব। তেওঁ মহাভাৰতৰ উদাহৰণ দি কয়: “মই চৰাইৰ চকুটো চাইহে আগবাঢ়োঁ… মই চকুটো চাই আছোঁ।”
মিঞা সমাজৰ একাংশৰ ওপৰত আক্ৰমণাত্মক মন্তব্য কৰি মুখ্যমন্ত্ৰীয়ে কয় যে “মই যেতিয়ালৈকে মুখ্যমন্ত্ৰী হৈ থাকিম মিঞা মুছলমানৰ লগত মোৰ যুদ্ধ চলি থাকিব। কোনো ক্ষেত্ৰতে ৰক্ষা নাপাব।” “আমি দুই হাতেৰে শৰ মাৰিব পাৰোঁ। এফালে জুবিন গাৰ্গকো ন্যায় দিম, আনফালে মিঞা মুছলমানসকলকো কষ্ট দি থাকিম বুলি মন্তব্য কৰে।
