‘’২০২১’ৰ পিছত মই ৰাজনীতিত নাথাকো।‘’ সৰুসজাইত পঞ্চায়ত প্ৰতিনিধিৰ অভিনন্দন সমাৰোহত বৃহস্পতিবাৰে এই মন্তব্য কৰিছে ৰাজ্য বিত্ত, গড়কাপ্তানি, স্বাস্থ্য মন্ত্ৰী তথা নেডাৰ আহ্বায়ক হিমন্ত বিশ্ব শৰ্মাই। অনুষ্ঠানত ভাষণ দি মন্ত্ৰী শৰ্মাই কেইবাটাও গুৰুত্বপূৰ্ণ মন্তব্যও কৰে।
তেওঁ লগতে কয়, ‘’এইয়া পানীপথৰ শেষ যুদ্ধ। পিতৃৰ নামত শপত লৈ কৈছো ছয় জনগোষ্ঠীৰ জনজাতিকৰণ, অসম চুক্তিৰ ৬নং দফা কাৰ্যকৰী হ’লেহে অসম সুৰক্ষিত হ’ব। অনাগত দিনত সৰ্বানন্দ সোণোৱাল জাতীয় মহানায়ক হ’ব। মোদীয়ে পাপ কৰিব নোৱাৰে, দেশ বিক্ৰী কৰিব নোৱাৰে। সোণোৱালে জাতিক বিক্ৰী কৰিব নোৱাৰে।‘’
ক’লা পতাকা লৈ দৌৰা–দৌৰি কৰাটো এতিয়া অসমৰ পৰম্পৰা বুলি কটাক্ষ কৰি মন্ত্ৰী শৰ্মাই য’ত য’ত ক’লা পতাকা দেখুৱায় পিছদিনা তাতেই বগা পতাকা দেখুৱাবলৈ বিজেপি কৰ্মীসকলক আহ্বান জনায়। তদুপৰি, তেওঁ বিজেপি কৰ্মীসকলক লুকাই চুৰকৈ নহয়, মুকলিভাৱে বিধেয়কখনৰ সমৰ্থন কৰিবলৈ আহবান জনায়।
আনহাতে, অসমৰ ৰাজনীতিত বিজেপিৰ বিকল্প নাই বুলি মন্তব্য কৰি মন্ত্ৰী হিমন্ত বিশ্ব শৰ্মাই কয় যে কংগ্ৰেছ, অগপৰ অৱশিষ্ট নাই সেয়া প্ৰমাণ হৈছে। অহা ২০ বছৰলৈ বিজেপিয়ে অসমৰ ভাগ্য নিৰ্ণয় কৰিব, গতিকে আমাৰ কৰ্তব্য আৰু দায়িত্ব বাঢ়িল। আমাৰ সন্মুখত প্ৰত্যাহ্বান আছে, বিজেপিৰ উত্থানক শত্ৰুৱে সহজভাৱে ল’ব নোৱাৰে।
‘’আজি ৰাতি বহুত মানুহেই শুব নোৱাৰিব। কাইলৈ কি কুৎসা ৰটনা কৰিব পাৰি একাংশই তাকেই ভাবিব। কোনোবাই বজ্ৰনিনাদ দিছে, আমি বিকাশৰ নিনাদ কৰিম। লতাশিলত গৈ চিঞৰাৰ বিলাসিতা কৰাৰ এতিয়া সময় নাই,’’-মন্তৱ্য হিমন্ত বিশ্ব শৰ্মাৰ।
ইপিনে, বাংলাদেশী মুছলমানে সত্ৰত বেদখল কৰিছে বুলি উল্লেখ কৰি কেইবাজনো সত্ৰাধিকাৰক হত্যা কৰা হৈছে বুলিও তথ্য দাঙি ধৰে মন্ত্ৰী শৰ্মাই।
আনহাতে, অনুষ্ঠানত ভাষণ দি বিজেপিৰ কেন্দ্ৰীয় নেতা মহেন্দ্ৰ সিঙে কয় যে হিমন্ত বিশ্ব শৰ্মা মুখ্য মন্ত্ৰী সোণোৱালৰ সোঁহাত। তেওঁ লগতে কয়,’’মই ১৯খন ৰাজ্যত কাম কৰিছো, কিন্তু অসমৰ কাৰ্যকৰ্তা সকলোতকৈ শ্ৰেষ্ঠ। যেতিয়ালৈ ১৪খন লোকসভা আসন দখল নকৰো তেতিয়ালৈ উত্তৰ প্ৰদেশলৈ ঘুৰি নাযাওঁ।‘’
