যোৱা দুবছৰত অসমৰ অসমৰ চৰকাৰে বিজ্ঞাপনৰ বাবে ১৩০.৫৯ কোটি টকা ব্যয় কৰিছে। পূৰ্বৰ চৰকাৰৰ তুলনা কৰিলে সৰ্বানন্দ সোণোৱালৰ চৰকাৰে ইয়াৰ সম্পূৰ্ণ পাঁচ বছৰীয়া কাৰ্যকালত মাত্ৰ ১২৫.৬ কোটি টকা ব্যয় কৰিছিল। এনেদৰে হিমন্ত বিশ্ব শৰ্মাৰ চৰকাৰে বিজ্ঞাপনৰ ক্ষেত্ৰত প্ৰাক্তন মুখ্যমন্ত্ৰীৰ ৫ বছৰৰ অভিলেখ ২ বছৰতে ভংগ কৰিলে।
অসম চৰকাৰৰ হৈ বিধানসভাত এই তথ্য প্ৰদান কৰা হৈছে। নিৰ্দলীয় বিধায়ক অখিল গগৈৰ এক প্ৰশ্নৰ উত্তৰত তথ্য আৰু জনসম্পৰ্ক মন্ত্ৰী পীয়ুষ হাজৰিকাই সদৰী কৰে যে মুখ্যমন্ত্ৰী শৰ্মাৰ নেতৃত্বৰ বৰ্তমানৰ চৰকাৰে ২০২১-২২ আৰু ২০২২-২৩ বৰ্ষত বিজ্ঞাপনৰ বাবে তেওঁৰ বিভাগলৈ মুঠ ১৩২ কোটি টকা মুকলি কৰিছে।
লগতে পঢ়ক: ৰাজ্যিক বাজেট ২০২৩-২৪: বিধানসভাত বিত্তমন্ত্ৰী অজন্তা নেওগৰ বাজেট দাখিল; কি প্ৰতিশ্ৰুতি?
তেওঁ কয় যে ২০১৬-১৭ বৰ্ষৰ পৰা ২০২০-২১ বৰ্ষলৈ সকলো চৰকাৰী প্ৰকাশিত বিজ্ঞাপনৰ মুঠ ব্যয় আছিল ১২৫.৬ কোটি টকা।
তথ্য আৰু জনসম্পৰ্ক বিভাগে যোৱা দুটা বিত্তীয় বৰ্ষত এতিয়ালৈকে বিভিন্ন মাধ্যমত ১৩০.৫৯ কোটি টকাৰ বিজ্ঞাপন প্ৰদান কৰিছে। মন্ত্ৰী পীয়ুষ হাজৰিকাই কয় যে এই বিজ্ঞাপনসমূহ বাতৰি কাকত, আলোচনী, টিভি চেনেল, এফএম ৰেডিঅ’ আৰু অন্যান্য মাধ্যমত দিয়া হৈছে।
সেইদৰে, ২০১৬ চনত শাসনলৈ অহাৰ পিছত বিজেপিয়ে অসমত বিজ্ঞাপনৰ বাবে মুঠ ২৫৬.১৯ কোটি টকা ব্যয় কৰিছে।
