অৱশেষত নগাঁৱৰ পুৰণিগুদামস্থিত বৰ মছজিদৰ মিনাৰটোৰ পুনঃসংস্থাপনৰ কাম প্ৰায় সম্পূৰ্ণ হোৱাৰ দিশত।
বিগত প্ৰায় এমাহৰ পৰা প্ৰতিকূল বতৰকো নেওচি হাৰিয়ানাৰ ‘আৰ আৰ এণ্ড চনচ” নামৰ কোম্পানীটোয়ে ক্ষিপ্ৰ গতিত কাম চলাই মিনাৰটো পূৰ্বৰ স্থানৰ পৰা ৭৫ফুট স্থানান্তৰ কৰি নিৰ্ধাৰিত স্থান নি পোৱাইছে।
এতিয়া মাত্ৰ বাকী আছে মিনাৰটোক নিৰ্মিয়মান চাৰিলেনযুক্ত ৩৭নং ৰাষ্ট্ৰীয় ঘাইপথছোৱাৰ সমান্তৰালকৈ ৰাখিব পৰাকৈ মাটিৰ পৰা পাঁচ ফুট ওখকৈ ভেটি নিৰ্মাণৰ কাম। বতৰ অনুকূলে থাকিলে আৰু প্ৰায় দহ দিনৰ ভিতৰত পুনঃসংস্থাপন প্ৰক্ৰিয়া সম্পূৰ্ণ হ’ব বুলি এই সমগ্ৰ কামৰ সৈতে আৰম্ভণিৰ পৰা জড়িত পুৰণিগুদামৰ আঞ্জুমান-ই-ইছলামিয়া নামৰ সংগঠনটোৱে জানিবলৈ দিয়ে।
উল্লেখযোগ্য যে, ৩৭নং ৰাষ্ট্ৰীয় ঘাইপথক চাৰিলেনযুক্ত পথলৈ সম্প্ৰসাৰণ কৰাৰ কাম হাতত লোৱাৰ পিছত ঘাইপথছোৱাৰ সমীপত থকা ১৯০২ চনতে ঢাকাৰ মিস্ত্ৰীৰ হতুৱাই চিমেন্টৰ পৰিৱৰ্তে হাঁহৰ কণী, ধূণা, মাটি মাহ, বৰা চাউল আৰু লোৰ ৰদৰ ঠাইত পকা বাঁহেৰে নিৰ্মাণ কৰা মিনাৰটোৰ প্ৰতি ভাবুকি নামি আহিছিল।
পুনঃসংস্থাপনৰ কাম সম্পূৰ্ণ হোৱাৰ পিছত পৱিত্ৰ ইদৰ দিনটোতে ৰাইজৰ বাবে ঐক্য-সম্প্ৰতিৰ ধ্বজাবাহক স্বৰূপ বৰ মছজিদৰ মিনাৰটো মুকলি কৰি দিয়া হ’ব বুলি আঞ্জুমান-ই-ইছলামিয়াৰ কৰ্তৃপক্ষই জানিবলৈ দিয়ে।
ইফালে মিনাৰটোৰ স্থানান্তৰ প্ৰক্ৰিয়াত সংবাদ মাধ্যমৰ সমৰ্থন তথা বিগত বহুদিন ধৰি ধাৰাবাহিক বাতৰি পৰিৱেশনৰ ফলত অসমৰ বিভিন্ন প্ৰান্তৰ ৰাইজে সহায় সহযোগ আগবঢ়ালে বুলি কৈ স্থানীয় আঞ্জুমান-ই-ইছলামিয়া কৰ্তৃপক্ষই সংবাদ মাধ্যম সমূহলৈ ধন্যবাদ জ্ঞাপন কৰে।