এগৰাকী মৌ পালক। নাম তেওঁৰ অৰুণ মিত্ৰ।মৰিগাঁও জিলাৰ সীমামূৰীয়া কামৰূপ জিলাৰ ১নং ঔজাৰী গাঁৱৰ এই গৰাকী উদ্যমী মৌ পালকে পৰিভ্ৰমী পদ্ধতিৰে যোৱা ২০১০ চনৰে পৰা পালন কৰি আহিছে ভাৰতীয় আৰু ইটালীয়ান প্ৰজাতিৰ মৌ।
ৰাজ্যখনৰ বিভিন্ন প্ৰান্তত বিভিন্ন সময়ত মৌ বাহ সমূহ কঢ়িয়াই মৌ পালন কৰি আহিছে। একেদৰে এই বছৰো মৌ পালক গৰাকীয়ে মায়ঙৰ কালশিলা পথাৰত সৰিয়হৰ খেতিৰ মাজত মেলিছে মৌৰ বাহ।
মৌ পালক গৰাকীয়ে ইটালীয়ান প্ৰজাতিৰ ৫০ চাক আৰু ভাৰতীয় প্ৰজাতিৰ ৩০ চাক মৌ পালন কৰিছে।
এনেদৰে প্ৰতিবছৰে মৌ পালক গৰাকীয়ে পৰিভ্ৰমী পদ্ধতিৰে সৰিয়হ, ধনীয়া, কুজী তিল, তিলৰ খেতিৰ লগতে লিচু, ৰবৰ বাগান আদিত মৌ ফাৰ্ম খুলি বছৰি ইটালীয়ান মৌৰ পৰা ২০-২৫ কুইণ্টল আৰু ভাৰতীয় মৌৰ পৰা ৪-৫ কুইণ্টল মৌ উপাৰ্জন কৰি আহিছে।
ইয়াৰোপৰি তেওঁ প্ৰতি চাক ইটালীয়ান মৌ আৰু বাহ সহ ৭-৮ হাজাৰ টকা আৰু ভাৰতীয় প্ৰতি চাক মৌ আৰু বাহ সহ ৩ হাজাৰৰ পৰা ৩৫০০ শ টকাত বিক্ৰী কৰিও ভাল উপাৰ্জন কৰাৰ লগতে বহুকেইগৰাকী লোকক কৰ্মমসংস্থাপন দিবলৈ সক্ষম হৈছে।
আনহাতে, তেওঁৰ মৌৰ বাহ নিৰ্মাণ কৰা এটা ক্ষুদ্ৰ উদ্যোগো আছে।মুঠতে এইগৰাকী মৌ পালকে মৌ ৰস আৰু বাহ সহ মৌ চাক বিক্ৰী কৰি বছৰি ৮-১০লাখ টকা পৰ্যন্ত উপাৰ্জন কৰিছে।
তেওঁৰ মৌ ৰস,মৌ আৰু মৌ বাহ ৰাজ্যখনৰ উপৰিও মেঘালয়, নগালেণ্ড, অৰুণাচল, দক্ষিণ ভাৰত আদি লৈয়ো গৈছে।
ছাত্ৰ জীৱনতে ষাঠি টকাত মৌ বাহ কিনি মৌ পালন অব্যাহত ৰখা উদ্যমী লোকজনে বিভিন্ন সময়ত এই সন্দৰ্ভত কেইবাটাও প্ৰশিক্ষণ লৈছিল। তাৰ পাছৰে পৰা ব্যৱসায় ভিত্তিত দেশী আৰু বিদেশী প্ৰজাতিৰ মৌ পালন কৰি অধিক লাভাম্বিত হৈছে।
তেওঁ বৰ্তমান সময়ত নিবনুৱা যুৱক-যুৱতী সকলে চৰকাৰী চাকৰিৰ পিছত দৌৰি নাথাকি মৌ পালন কৰি অৰ্থনৈতিক স্বাৱলম্বিতাৰ পথ তৈয়াৰ কৰিব পৰা আমাৰ অসমত সুন্দৰ পৰিবেশ আছে বুলি দোহাৰি নিৱনুৱাসকলক ওলাই আহিবলৈ আহ্বান জনায়।
