শনিবাৰে নাগালেণ্ডৰ ৰাজধানী চহৰ কোহিমাৰ পৰা ১০ কিঃমিঃ দূৰত অৱস্থিত কিছামা হেৰিটেজ ভিলেজত উদ্বোধন হোৱা হৰ্নবিল মহোৎসৱত দেশৰ বিভিন্ন স্থানৰ উপৰিও দেশৰ বাহিৰৰ পৰা অহা ৬০,০০০ হেজাৰৰো অধিক দৰ্শকে ভীৰ কৰিছেহি। নাগালেণ্ডৰ পৰ্যটন বিষয়া এগৰাকীয়ে এই কথা সদৰি কৰিছে ।
নাগালেণ্ডৰ পৰ্যটন বিভাগৰ সহকাৰী সঞ্চালক টি খাকিহে ছুমিয়ে (T Khakihe Sumi) কৈছে যে হৰ্নবিল মহোৎসৱৰ দ্বিতীয় দিনালৈকে সৰ্বমুঠ ৬৩,০৩২ পৰ্যটক এই মহোৎসৱত উপস্থিত হৈছে।
তেওঁ আৰু কৈছে যে উদ্বোধনীৰ দিনা মহোৎসৱত ১৯,৯৫৩ গৰাকী দৰ্শক উপস্থিত হৈছিল আৰু দেওবাৰে দৰ্শকৰ সংখ্যা ৪৩,০৭৯ গৰাকী হৈছিলগৈ।
মুঠ দৰ্শনাৰ্থীসকলৰ ভিতৰত ৭৮০গৰাকী বিদেশী, ৮২৪১গৰাকী দেশী আৰু ৫৪,০১১গৰাকী স্থানীয় দৰ্শনাৰ্থী আছিল। বিষয়াগৰাকীয়ে জনাইছে।
জাতীয় নৃত্য আৰু সংগীত দিৱস উপলক্ষে দেওবাৰে উত্তৰ পূব মণ্ডল সাংস্কৃতিক কেন্দ্ৰই (NEZCC) হৰ্নবিল উৎসৱ অনুষ্ঠিত হোৱা কিছামা হেৰিটেজ ভিলেজত এটা সাংস্কৃতিক কাৰ্যসূচীৰ আয়োজন কৰিছিল।
এই সাংস্কৃতিক কাৰ্যসূচীৰ অংশ হিচাপে উৰিষ্যা, অসম, মণিপুৰ, চত্তীছগড়, মধ্য প্ৰদেশ, মেঘালয় আৰু জম্মু আৰু কাশ্মীৰৰ পৰা অহা সাংস্কৃতিক দলে বিভিন্ন লোক নৃত্য পৰিৱেশন কৰিছিল। পূব মাণ্ডলিক সাংস্কৃতিক কেন্দ্ৰক প্ৰতিনিধিত্ব কৰা উৰিষ্যাই দেলখাই নৃত্য পৰিৱেশন কৰিছিল, অসমৰ সাংস্কৃতিক দলে গুমৰাগ নৃত্য, দক্ষিণ মধ্য সাংস্কৃতিক মণ্ডলক প্ৰতিনিধিত্ব কৰা মধ্য প্ৰদেশৰ সাংস্কৃতিক দলে বাৰেদি নৃত্য আৰু মণিপুৰৰ সাংস্কৃতিক দলে হাং তা নৃত্য পৰিৱেশন কৰিছিল। নাগাসকলৰ ভিন্ন ভিন্ন জনজাতিসকলৰ প্ৰতিনিধি দলে তেওঁলোকৰ পাৰম্পৰিক নৃত্য পৰিৱেশন কৰিছিল।
