ছত্তীশগড়ৰ নাৰায়ণপুৰ জিলাত এজনী ১১ বছৰীয়া কিশোৰীক যৌন নিৰ্যাতন চলাই কুঠাৰেৰে ঘপিয়াই হত্যা কৰাৰ এক জঘন্য ঘটনা পোহৰলৈ আহিছে। এই সন্দৰ্ভত আৰক্ষীয়ে সঞ্জু কুমেটি নামৰ এজন ২২ বছৰীয়া যুৱকক গ্ৰেপ্তাৰ কৰিছে।
নাৰায়ণপুৰৰ আৰক্ষী অধীক্ষক ৰবিনছন গুৰিয়াই জনোৱা মতে, কিশোৰীগৰাকী যোৱা ৩১ ডিচেম্বৰ, ২০২৫-ৰ পৰা নিৰুদ্দেশ হৈ আছিল। পৰিয়ালৰ লোক আৰু চুবুৰীয়াই কেইবাদিনো ধৰি বিচাৰ-খোচৰ কৰাৰ পাছত যোৱা দেওবাৰে সন্ধিয়া এখন কৃষি পথাৰত কিশোৰীগৰাকীৰ মৃতদেহ উদ্ধাৰ হয়। মৃতদেহটোত আঘাতৰ স্পষ্ট চিন আছিল আৰু লগে লগে আৰক্ষীক খবৰ দি মৰণোত্তৰ পৰীক্ষাৰ বাবে প্ৰেৰণ কৰা হয়।
আৰক্ষীৰ সূত্ৰ অনুসৰি, অভিযুক্ত সঞ্জু কুমেটি ভুক্তভোগী পৰিয়ালটোৰ চিনাকি আছিল আৰু তেওঁ প্ৰায়ে কিশোৰীগৰাকীৰ ঘৰলৈ আহিছিল। কিশোৰীগৰাকীৰ পিতৃয়ে আৰক্ষীক জনোৱা মতে, ৩১ ডিচেম্বৰত যিটো স্থানত মৃতদেহ উদ্ধাৰ হৈছিল, তাৰ সমীপতে তেওঁ সঞ্জুক হাতত এখন কুঠাৰ লৈ থকা অৱস্থাত দেখিছিল। অঞ্চলটোৰ জনপ্ৰিয় পানীয় ‘চালফি’ খাবলৈ তেওঁ প্ৰায়ে কিশোৰীগৰাকীৰ ঘৰলৈ অহা-যোৱা কৰিছিল।
আৰক্ষীৰ কঠোৰ জেৰাৰ সন্মুখত অভিযুক্তই নিজৰ অপৰাধ স্বীকাৰ কৰিছে। সঞ্জুৱে আৰক্ষীক জনোৱা মতে, যৌন নিৰ্যাতন চলোৱাৰ পাছত কিশোৰীগৰাকীয়ে ঘৰত সকলোকে এই বিষয়ে কৈ দিব বুলি ভয় খাই ভয়ৰ বাবেই কিশোৰীগৰাকীক হত্যা কৰাৰ সিদ্ধান্ত লয়।
অভিযুক্তৰ বিৰুদ্ধে ভাৰতীয় ন্যায় সংহিতা , ২০২৩ আৰু পকচো (POCSO) আইন, ২০১২-ৰ প্ৰাসংগিক ধাৰাৰ অধীনত গোচৰ ৰুজু কৰা হৈছে।
