দিল্লীৰ ৱাজিৰাবাদ অঞ্চলত শেহতীয়াকৈ এক অতি চাঞ্চল্যকৰ আৰু বিৰল ঘটনা সংঘটিত হৈছে। এজন যুৱকে তেওঁৰ বিবাহৰ কথা গোপন ৰাখি আন এগৰাকী যুৱতীৰ সৈতে দীৰ্ঘদিন ধৰি প্ৰেমৰ সম্পৰ্ক ৰখাৰ পৰিণাম অতি ভয়াবহ হৈ পৰিল। অভিযোগ অনুসৰি, প্ৰেমিকজনে তেওঁৰ বিয়াৰ সত্য লুকুৱাই ৰখাৰ কথা জানিব পাৰি প্ৰেমিকা আমিনা খাতুনে চৰম পদক্ষেপ গ্ৰহণ কৰে আৰু যুৱকজনৰ যৌনাংগ কাটি পেলায়। এই ঘটনাই সমগ্ৰ অঞ্চলটোতে তীব্ৰ প্ৰতিক্ৰিয়াৰ সৃষ্টি কৰিছে।
আৰক্ষীৰ পৰা লাভ কৰা তথ্য অনুসৰি, এই ঘটনাৰ বলি হোৱা যুৱকজনৰ নাম বিষৰজিৎ আৰু তেওঁ উত্তৰ প্ৰদেশৰ ৰামপুৰ জিলাৰ বাসিন্দা। তেওঁ আমিনা খাতুন নামৰ এগৰাকী যুৱতীৰ সৈতে যোৱা দুবছৰ ধৰি প্ৰেমৰ সম্পৰ্কত আছিল। কেৱল প্ৰেমৰ সম্পৰ্কই নহয়, তেওঁলোকে দিল্লীত একেলগে লিভ-ইন ৰিলেচনশ্বিপত থাকিবলৈও আৰম্ভ কৰিছিল। কিন্তু বিষৰজিৎ যে ইতিমধ্যে বিবাহিত আছিল, সেই কথা তেওঁ আমিনাৰ পৰা সম্পূৰ্ণৰূপে লুকুৱাই ৰাখিছিল। শেহতীয়াকৈ কোনোমতে আমিনাৰ ওচৰত বিষৰজিতৰ বিবাহৰ কথা পোহৰলৈ আহে আৰু ইয়াৰ পিছৰ পৰাই দুয়োৰে মাজত বিবাদৰ সূত্ৰপাত হয়।
ঘটনাৰ সবিশেষ বৰ্ণনা কৰি বিষৰজিতে আৰক্ষীক জনাইছে যে যোৱা ২৪ ফেব্ৰুৱাৰীৰ নিশা আমিনাই এক পৰিকল্পিত ষড়যন্ত্ৰ ৰচনা কৰিছিল। সেইদিনা নিশা আমিনাই তেওঁক খাবলৈ দিয়া গাখীৰৰ গিলাচত কোনো নিচাযুক্ত দ্ৰব্য মিহলাই দিছিল। গাখীৰখিনি খোৱাৰ কিছু সময়ৰ পিছতেই বিষৰজিৎ অচেতন হৈ পৰে। যুৱকজন অচেতন হৈ থকাৰ সুযোগ লৈ আমিনাই এখন চোকা অস্ত্ৰৰে তেওঁৰ যৌনাংগ কাটি পেলায় বুলি গুৰুতৰ অভিযোগ উত্থাপন হৈছে।
জ্ঞান ঘূৰি অহাৰ পিছত বিষৰজিতে নিজৰ অৱস্থা দেখি কোনোমতে ওচৰৰে এখন হাস্পতালত উপস্থিত হয়। বৰ্তমান তেওঁ চিকিৎসালয়ত চিকিৎসাধীন হৈ আছে যদিও তেওঁৰ অৱস্থা সংকটজনক বুলি জানিব পৰা গৈছে। আৰক্ষীয়ে বিষৰজিতৰ ভাষ্যৰ ভিত্তিত এটা গোচৰ ৰুজু কৰি তদন্ত আৰম্ভ কৰিছে। অভিযুক্ত আমিনা খাতুন বিহাৰৰ কাটিহাৰৰ বাসিন্দা বুলি চিনাক্ত কৰা হৈছে। বৰ্তমান তেওঁ পলাতক অৱস্থাত আছে আৰু আৰক্ষীয়ে তেওঁক বিচাৰি অভিযান অব্যাহত ৰাখিছে।
