ডিব্ৰুগড় জিলাৰ মৰাণৰ ‘হাউচফুল টকীজ’ কৰ্তৃপক্ষই জনপ্ৰিয় শিল্পী জুবিন গাৰ্গৰ সপোনৰ ছবি ‘ৰৈ ৰৈ বিনালে’ৰ শুভমুক্তি উপলক্ষে এক ব্যতিক্ৰমী পদক্ষেপ গ্ৰহণ কৰে।
আজি পুৱা ৬ বজাত এই বিশেষ উদ্বোধনী অনুষ্ঠানৰ আয়োজন কৰা হয়।
মৰাণ জনমংগল আদৰ্শ অন্ধ বিদ্যালয়ৰ ছাত্ৰ-ছাত্ৰীৰ উপস্থিতিত বন্তি প্ৰজ্বলনেৰে ‘ৰৈ ৰৈ বিনালে’ৰ প্ৰথম দৰ্শনী আৰম্ভ হয়।
দৰ্শনী আৰম্ভ হোৱাৰ পূৰ্বে জনপ্ৰিয় কণ্ঠশিল্পী বিপিন চাউদাং, নীল আকাশ, কুসুম কৈলাশ, মাধৱ ৰঞ্জনকে ধৰি আন আন শিল্পীসকলে একেলগে জুবিন গাৰ্গৰ জনপ্ৰিয় গীত ‘মায়াবিনী’ পৰিৱেশন কৰি শ্ৰদ্ধাঞ্জলি জনায়।
‘হাউচফুল টকীজ’ কৰ্তৃপক্ষই মৰাণ জনমংগল আদৰ্শ অন্ধ বিদ্যালয়ৰ ৪০ গৰাকী দিব্যাংগ ছাত্ৰ-ছাত্ৰীক ছবিখন উপভোগ কৰাৰ বিনামূলীয়া ব্যৱস্থা কৰি দিয়ে।
ছবিগৃহটোৰ কৰ্তৃপক্ষই লগতে জনাই যে ‘ৰৈ ৰৈ বিনালে’ৰ লাভৰ টকাৰে মৰাণ অঞ্চলৰ এগৰাকী দৰিদ্ৰ কৰ্কট ৰোগীৰ চিকিৎসা সেৱা আগবঢ়োৱা হ’ব।
উল্লেখ্য যে ছবিগৃহটোত জুবিন গাৰ্গৰ প্ৰতিচ্ছবিৰ কাষত এখন বিশেষ খালী আসন ৰখা হৈছে।
ছবিখন চলি থকালৈকে এই আসনখন জুবিন গাৰ্গৰ বাবে খালী থাকিব আৰু তেওঁৰ সন্মানত অক্ষয়বন্তি জ্বলি থাকিব।
অনুষ্ঠানত উপস্থিত থাকি কন্ঠশিল্পী কুসুম কৈলাশে কয়, “জুবিন গাৰ্গে বিচৰা ধৰণেৰে আজিৰ দিনটোত ছবিখন শুভমুক্তি দিয়া হৈছে। আশা কৰিছোঁ এইখন ছবিয়ে অসমীয়া ছবি জগতত নতুন দিগন্তৰ সূচনা কৰিব। এই ছবিখনৰ জৰিয়তে অসমৰ ৰাইজে জুবিন দালৈ ভালপোৱা যাচিব বিচাৰিছে।”
কন্ঠশিল্পী নীল আকাশে কয়, “দাদা কায়িকভাৱে আমাৰ মাজত নাই যদিও তেওঁৰ সৃষ্টিৰাজি সদায় আমাৰ লগত থাকিব। ছবিখনক ৰাইজে যিদৰে আদৰি লৈছে, এয়া অসমীয়া ছবিৰ বাবে শুভ লক্ষণ।”
বিপিন চাউদাঙে কয়, “প্ৰিয় শিল্পীগৰাকীক হেৰুৱাই গোটেই অসমবাসী শোকত ভাগি পৰিছে। দুখৰ মাজতো আজি আনন্দৰ দিনটো আহিল। জুবিন গাৰ্গৰ শেষৰ ছবি ‘ৰৈ ৰৈ বিনালে’ৰ বাবে সকলো আশাৰে ৰৈ আছিল।”
এনেদৰে, ৰাজ্যৰ বিভিন্ন প্ৰান্তৰ দৰে ডিব্ৰুগড় জিলাৰ মৰাণতো প্ৰাণৰ শিল্পী জুবিন গাৰ্গলৈ শ্ৰদ্ধাঞ্জলি জনাই এক আৱেগিক আৰু ব্যতিক্ৰমী ৰূপত ‘ৰৈ ৰৈ বিনালে’ৰ দৰ্শনী আৰম্ভ হয়।
