“ইমান বেমেজালিৰ মাজত আপোনাৰ চৰকাৰৰ ওপৰত জনসাধাৰণৰ আস্থা থকাটো কিদৰে আশা কৰিছে?”, অসমৰ দিতেনচন কেম্প সন্দৰ্ভত হোৱা এক শুনানিত মঙলবাৰে চলিচিতৰ জেনেৰেলক এই প্ৰশ্ন কৰিছে দেশৰ মুখ্য ন্যায়াধীশ ৰঞ্জন গগৈয়ে।
বিদেশীৰ সমস্যাই দীৰ্ঘদিন ধৰি অসমৰ ৰাজনীতি নিয়ন্ত্ৰণ কৰি অহাৰ বিপৰীতে এতিয়ালৈকে মাত্ৰ ৫২ হাজাৰ লোককহে বিদেশী ন্যায়াধিকৰণে “বিদেশী” বুলি ঘোষণা কৰা আৰু তাৰো মাত্ৰ ১৬৬ গৰাকীকহে এই পৰ্য্যন্ত বহিষ্কাৰ কৰা বুলি চৰকাৰে দাখিল কৰা শপতনামাক লৈ এই মৌখিক প্ৰশ্ন কৰিছে মুখ্য ন্যায়াধীশে।
“এই ৫২ হাজাৰ ঘোষিত বিদেশীৰ ভিতৰত মাত্ৰ ১৬৬ গৰাকীকহে বিতাড়ণ কৰা হৈছে? ইমান বছৰে আপোনালোকে কি কৰি আছে?… তাৰোপৰি তেওঁলোকৰ ৰাষ্ট্ৰীয়তা নিশ্চিত হোৱাৰ পিছতো কি হৈছে, সংশ্লিষ্ট ৰাষ্ট্ৰই তেওঁলোকক ঘূৰাই ল’বলৈ অস্বীকাৰ কৰিছে?”, অসম চৰকাৰক প্ৰতিনিধিত্ব কৰা ভাৰতৰ চলিচিতৰ জেনেৰেল তুচাৰ মেহতাক প্ৰশ্ন ন্যায়াধীশ গগৈৰ।
অসমৰ দিতেনচন কেম্পসমূহত দশকধৰি বিদেশীসকলক বন্দী কৰি ৰখাক লৈ অসন্তুষ্টি ব্যক্ত কৰে মুখ্য ন্যায়াধীশৰ লগতে ন্যায়াধীশদ্বয় এল নাগেশ্বৰ ৰাও আৰু সঞ্জীৱ খান্নাৰদ্বাৰা গঠিত বিচাৰপীঠখনে।
“এই মানুহখিনিক ইমান বছৰে আটক কৰি ৰখাটোক আপোনালোকে কিদৰে ন্যায্যতা দিছে?…দিতেনচনৰ সময়সীমা ন্যূনতম হ’বই লাগিব—এই কথাটোৰ বাবে আমি এমেৰিকান ৰায় এটা উল্লেখ কৰাৰ কোনো প্ৰয়োজন নাই!”, মুখ্য ন্যায়াধীশৰ মন্তব্যৰ উদ্ধৃতি লাইভ ল-ৰ। অসমৰ দিতেনচন কেম্পত বৰ্তমান মুঠ ৯৩৮ গৰাকী লোকক আটক কৰি ৰখা হৈছে আৰু তাৰে ৮২৩গৰাকী ইতিমধ্যে “বিদেশী”ৰূপে ঘোষিত বুলি সৰ্বোচ্চ ন্যায়ালয়ক জনাইছিল কেন্দ্ৰই।
অসম দিতেনচন কেম্পসমূহে মানৱ অধিকাৰ ঊলংঘন কৰা বুলি সমাজকৰ্মী হৰ্ষ মান্দেৰে দাখিল কৰা লেখ আবেদনখন (Writ Petition (Civil) No. 1045/2018)ৰ বাবে এই শুনানি অনুষ্ঠিত হৈছিল।
অহা ১৩ মাৰ্চত এই সন্দৰ্ভত পুনৰ শুনানি ল’ব সৰ্বোচ্চ ন্যায়ালয়ে।
