ৰাজ্যখনৰ ভিতৰতে শীৰ্ষ মেধাৱী ছাত্ৰী শ্বেতা আগৰৱালাৰ জীৱন প্ৰেমৰ উমাল অনুভৱৰ বাটেৰে গৈ গৈ কৰুণ মৃত্যু পাইছিলগৈ। শ্বেতাই কেতিয়াও কল্পনাও কৰিব পৰা নাছিল প্ৰিয়জনেই তেওঁৰ মৃত্যুৰ দূত। আহক সমগ্ৰ ঘটনাক্ৰমৰ ওপৰত চকু ফুৰাওঁ-
- মেধাৱী শ্বেতাই ২০১৫ বর্ষত উচ্চতৰ মাধ্যমিক চূড়ান্ত বর্ষত বাণিজ্যিক শাখাত অসমৰ ভিতৰতে প্ৰথম স্থান লাভ কৰিছিল।
- গুৱাহাটীৰ কমাৰ্চ কলেজৰ পৰা তেওঁ এই সফলতা পাইছিল।
- তাৰপিছত কে চি দাস কমাৰ্চ কলেজত নাম ভৰ্তি।
- ২০১৭ চনৰ ৪ ডিচেম্বৰ, শ্বেতাৰ জীৱনলৈ নামি আহে অমানিশা।
- উক্ত দিনা শ্বেতাই বি-কমৰ পঞ্চম ষান্মাসিকৰ পৰীক্ষা শেষ কৰি কে চি দাস কমাৰ্চ কলেজৰ পৰা গৈছিল প্রেমিক গোৱিন্দ সিংঘালৰ ভৰলুমুখৰ ভাড়াঘৰলৈ।
- প্রেমিক গোবিন্দ সিংঘালে মেধাৱী শ্বেতাক বিবাহৰ প্ৰস্তাৱ আগ বঢ়ায়।
- গোবিন্দই এই কথাও কৈছিল যে বিয়াৰ পিছত গুৱাহাটী এৰি পশ্চিমবংগৰ শিলিগুৰিত তেওঁলোক পিতৃৰ সৈতে থাকিবগৈ।
- কিন্তু প্রেমিক গোবিন্দৰ বিবাহৰ আকস্মিক প্ৰস্তাৱক শ্বেতাই প্ৰত্যাখান কৰি কৈছিল প্ৰথমে তাই বি-কম সম্পূৰ্ণ কৰি ল’ব।
- সেই কথাতে ক্ৰোধান্বিত হৈ গোবিন্দই শ্বেতাৰ মূৰটো দেৱালত খুন্দিয়াই দিছিল। ফলত শ্বেতা থিতাতে অচেতন হৈ পৰি ৰৈছিল আৰু মৃত্যুক আঁকোৱালি লৈছিল।
- তাৰ পিছত ঘটনাটো লুকুৱাই ৰখাৰ বাবে গোবিন্দই শ্বেতাৰ নিথৰ দেহটো বস্তাত ভৰাই ভৰলু নদীত পেলাই দিবলৈ নিয়ে আৰু ঘটনাটোক এটা আত্মহত্যাৰ ৰূপ দিবলৈ চেষ্টা কৰে।
- কিন্তু বস্তাত ভৰাই লৈ যাওঁতে ৰাস্তাত বহুতো মানুহে দেখা পায়।
- পিছত ব্ৰহ্মপুত্ৰত নিথৰ দেহটো উদ্ধাৰ হ’লে হত্যাত অভিযুক্ত হোৱাৰ ভয়ত গোবিন্দই পুনৰ নিথৰ দেহটো ভৰলুমুখৰ নিজা ভাড়াঘৰলৈ লৈ আহে।
- তাৰ পিছত শ্বেতাৰ নিথৰ দেহটো কেৰাচিন ঢালি ভাড়াঘৰৰ বাথৰূমত গোবিন্দই জ্বলাই দিছিল।
- গোবিন্দক সেই কামত সহায় কৰিছিল মাক কমলা দেৱী আৰু বায়েক ভৱানী সিংঘালে।
- ভাড়াঘৰৰ বাথৰূমত ধোঁৱা দেখা পাই স্থানীয় ৰাইজে আৰক্ষীক খবৰ দিয়াত ঘটনাস্থলীত আৰক্ষী উপস্থিত হৈ আধা পোৰা অৱস্থাত শ্বেতা আগৰৱালাৰ নিথৰ দেহ উদ্ধাৰ কৰে।
- ভৰলুমুখ আৰক্ষীয়ে ঘটনাৰ দিনাই অভিযুক্ত গোবিন্দক গ্ৰেপ্তাৰ কৰি জেৰা চলায়।
- আৰক্ষীৰ জেৰাত গোবিন্দই শ্বেতা আগৰৱালাক হত্যা কৰাৰ কথা স্বীকাৰ কৰে।
- জেৰাতে গোবিন্দই প্ৰকাশ কৰে যে মাক আৰু ভনীয়েকৰ ঘটনাৰ সময়ত উপস্থিত আছিল আৰু জ্বলাই দিয়াৰ সময়তো তেওঁলোক সাক্ষী আছিল।
- তদন্তকাৰী আৰক্ষীয়ে যোৱা বছৰৰ ফেব্ৰুৱাৰিত আদালতক অভিযোগনামাত গোবিন্দ সিংঘাল, মাক কমলা দেৱী আৰু বায়েক ভৱানী সিংঘালৰ বিৰুদ্ধে প্ৰতিবেদন দাখিল কৰে।
- যোৱা ৩০ জুলাইত কামৰূপ জিলা সত্ৰ ন্যায়াধীশৰ আদালতত গোচৰটোৰ চূড়ান্ত শুনানি হয় আৰু গোবিন্দৰ লগতে মাক কমলা দেৱী আৰু বায়েক ভৱানী সিংঘালক দোষী সাব্যস্ত কৰে।
- ৩ আগষ্টত আদালতে মূল অভিযুক্ত গোবিন্দ সিংহালক আজি ফাঁচি আৰু মাক কমলা দেৱী আৰু বায়েক ভৱানী সিংঘালক যাৱজ্জীৱন কাৰাদণ্ডৰ ৰায় দিয়ে।
- ঘটনাটোৰ ১৯ মাহৰ অন্তত শ্বেতাৰ পৰিয়ালে ন্যায় পায়।