প্ৰাক্তন মুখ্য মন্ত্ৰী তৰুণ গগৈৰ অৱস্থা বৰ্তমান কেনে আছে? সেই বিষয়ে সকলোৱে জানিবলৈ নিশ্চয়কৈ ইচ্ছুক হৈ আছে।
সেয়েহে আজি তৰুণ গগৈৰ সৈতে ছাঁৰ দৰে থকা এক ঘনিষ্ঠ সূত্ৰৰ সৈতে কথা পাতি খবৰ লোৱাৰ প্ৰয়াস কৰিছিলো প্ৰাক্তন মুখ্যমন্ত্ৰীগৰাকীৰ।
ইতিমধ্যে, মুখ্যমন্ত্ৰী সৰ্বানন্দ সোণোৱাল, স্বাস্থ্যমন্ত্ৰী ড০ হিমন্ত বিশ্ব শৰ্মা, ৰাজ্যিক বিজেপিৰ সভাপতি ৰঞ্জিত দাস, প্ৰদেশ কংগ্ৰেছৰ তত্বাবধায়ক জীতেন্দ্ৰ সিং, কংগ্ৰেছী সাংসদ প্ৰদ্যুত বৰদলৈ, বিধায়ক ৰকিবুল হুছেইনকে ধৰি বহু ৰাজনৈতিক নেতা তথা শুভাকাংক্ষীয়ে খবৰ লৈছে প্ৰাক্তন মুখ্যমন্ত্ৰীগৰাকীৰ।
গগৈৰ ঘনিষ্ঠ সুত্ৰটোৱে জনোৱা অনুসৰি গগৈক সাক্ষাৎ কৰিবলৈ যোৱা প্ৰত্যেককে গগৈয়ে ধন্যবাদ জ্ঞাপন কৰাৰ লগতে প্ৰৱেশদ্বাৰত তেওঁক সাক্ষাৎ কৰিবলৈ অহা লোকৰ চহী ৰখাৰো ব্যৱস্থা কৰি লৈছে।
নিশা সেই বহী চাই গগৈয়ে আনন্দ লাভ কৰে বুলি সুত্ৰটোৱে জনায়।
বুধবাৰৰ সন্ধিয়াৰ পৰা কাৰোবাৰ সহায় লৈ আইচিয়ুৰ বাহিৰৰ বাৰাণ্ডাত খোজ কাঢ়িবলৈ আৰম্ভ কৰিছে গগৈয়ে।
যোৱা ৪ নবেম্বৰৰ দিনা থুকা-থুকি মাতৰে এক অডিঅ’ বাৰ্তাৰ জৰিয়তে অসমবাসী ৰাইজক ধন্যবাদ জ্ঞাপন কৰাৰ লগতে সমাজ সেৱাত ব্ৰতী যাব বুলি উল্লেখ কৰিছিল। সংবাদমেল দিয়াটো অভ্যাসত পৰিণত হোৱা গগৈয়ে বাৰ্তাটোৰ আৰম্ভণিতে সাংবাদিকক সম্বোধন কৰি প্ৰথমখন সংবাদমেল সম্বোধন কৰা বুলি উল্লেখ কৰিছিল।
এতিয়া পুৰ্বৰ তুলনাত গগৈৰ মাতটো স্পষ্ট হৈছে। প্ৰদেশ কংগ্ৰেছৰ তত্বাবধায়ক জীতেন্দ্ৰ সিঙৰ সৈতে ইংৰাজী ভাষাত স্পষ্টকৈ গগৈয়ে বাৰ্তালাপ কৰা বুলি সুত্ৰটোৱে জনায়।
ইপিনে, সুস্থ অৱস্থাত সপ্তাহত ২-৩ খনকৈ সংবাদমেল সম্বোধন কৰা গগৈৰ এতিয়াও সংবাদমেল সম্বোধন কৰাৰ প্ৰবল ইচ্ছা। গগৈৰ সোঁৱে-বাঁৱে থকা সকলোকে সাংবাদিকক মাতিবলৈ অনুৰোধ জনায় বুলি সুত্ৰটোৱে কয়।
অডিঅ’ বা ভিডিঅ’ বাৰ্তাৰ জৰিয়তে ৰাজ্যবাসীলৈ দিপাৱলীৰ শুভেচ্ছা জনাব প্ৰাক্তন মুখ্যমন্ত্ৰীগৰাকীয়ে।
তদুপৰি, হুইল চেয়াৰত বহি হাতত এটা টেবলেটৰ জৰিয়তে বিহাৰৰ প্ৰতি মুহূৰ্তৰ ফলাফল লৈ আছিল গগৈয়ে।
গগৈৰ আইচিয়ুৰ কোঠাত থকা টেলিভিছনটোৰ জৰিয়তেও দেশ-বিদেশ তথা আঞ্চলিকৰ ৰাজনৈতিক বা-বাতৰি লৈ আছে বুলি সুত্ৰটোৱে জনায়।
বৰ্তমান গগৈৰ দেহত অক্সিজেনৰ মাত্ৰা ৯৮-১০০ লৈ বৃদ্ধি পাইছে আৰু কাৰ্বন ডাই অক্সাইডৰ পৰিমাণ ৫৬ লৈ হ্ৰাস পাইছে।
উল্লেখযোগ্য যে, ২ নবেম্বৰৰ নিশা প্ৰায় ১০:৩০ বজাত দেহত অক্সিজেন ৰ পৰিমাণ হ্ৰাস পোৱাৰ লগতে বৃদ্ধি পাইছিল এম’নিয়া আৰু কাৰ্বন ডাই অক্সাইড।
তাৰ পাছতে তেওঁক চিকিৎসাৰ বাবে নিয়া হৈছিল GMCH লৈ। GMCH ৰ NON INVANSIVE VENTILATION ত ৰখা হৈছিল গগৈক।
দীৰ্ঘদিনৰ মূৰত ২৫ অক্টোৱৰৰ বিয়লি চিকিৎসালয়ৰ পৰা বাসগৃহলৈ উভতিছিল প্ৰাক্তন মুখ্যমন্ত্ৰী তৰুণ গগৈ।
উল্লেখযোগ্য যে, তৰুণ গগৈ যোৱা ২৬ আগষ্টৰ পৰা কৰোনাত আক্ৰান্ত হৈ GMCH ত চিকিৎসাধীন হৈ আছিল। কৰোনাৰ পৰা মুক্ত হোৱাৰ পাছতো দেহত অক্সিজেনৰ অভাৱ ঘটিছিল বাবে ICU ত চিকিৎসাধীন হৈ থাকিবলগীয়া হৈছিল।