হাইস্কুল শিক্ষান্ত পৰীক্ষাৰ ইংৰাজীৰ প্ৰশ্নকাকত ফাদিল; প্ৰথম দিনটোতে ছেবাৰ ‘নিকা আৰু স্বচ্ছ’ পৰীক্ষাৰ স্বৰূপ উদং
ছেবাৰ নিকা আৰু স্বচ্ছ পৰীক্ষা পতাৰ প্ৰচেষ্টাক অসাৰত পৰিণত কৰি ফাদিল হ’ল আজিৰ পৰা অনুষ্ঠিত হোৱা হাইস্কুল শিক্ষান্ত পৰীক্ষাৰ ইংৰাজী বিষয়ৰ পৰীক্ষাৰ প্ৰশ্নকাকত।সূত্ৰৰ পৰা লাভ কৰা খবৰ অনুসৰি নগাঁও জিলাৰ জাজৰি পৰীক্ষা কেন্দ্ৰত সংঘটিত হৈছে এই ঘটনা।
পৰীক্ষা গৃহত ম’বাইল ফোন নিষিদ্ধ কৰাৰ পাছতো পৰীক্ষা আৰম্ভ হোৱাৰ ৩৫ মিনিট পাছতে হোৱাটছ এপ যোগে ফাদিল হ’ল ইংৰাজী বিষয়ৰ প্ৰশ্নকাকতখন।
পৰীক্ষাৰ পহিলা দিনটোতে সংঘটিত এনে ঘটনাই স্বাভাবিকতে হতাশ কৰি তুলিছে ছাত্ৰ-ছাত্ৰী তথা অভিভাৱক সকলক। এতিয়ালৈ ছেবাৰ ফালৰ পৰা ঘটনা সন্দৰ্ভত কোনোধৰণৰ স্পষ্টীকৰণ প্ৰকাশ কৰা নাই।
উল্লেখযোগ্য যে, ৰাজ্যত আজিৰ পৰা আৰম্ভ হোৱা বহু প্ৰত্যাশিত হাইস্কুল শিক্ষান্ত পৰীক্ষাত এইবাৰ ৮৫৭টা পৰীক্ষা কেন্দ্ৰত ৩,৫২, ১৪৩ গৰাকী ছাত্ৰ-ছাত্ৰীয়ে অৱতীৰ্ণ হৈছে। ছেবা কৰ্তৃপক্ষই জনোৱা অনুসৰি ৩,৪২,৭০২গৰাকী পৰীক্ষাৰ্থীয়ে হাইস্কুল শিক্ষান্ত পৰীক্ষা আৰু ৯,৪৪১ গৰাকী পৰীক্ষাৰ্থীয়ে হাইমাদ্ৰাছা পৰীক্ষাত অৱতীৰ্ণ হৈছে।
পৰীক্ষা কেন্দ্ৰসমূহত চিচি টিভিৰ ব্যৱস্থা থকাৰ পিছতো এনে কাণ্ডজ্ঞানহীন ঘটনা কেনেকৈ সংঘটিত হ’বলৈ পালে বুলি বিভিন্ন পক্ষই প্ৰশ্ন উত্থাপন কৰিছে। প্ৰশ্নকাকত ফাদিল হোৱা পৰীক্ষা কেন্দ্ৰটোৰ নিৰীক্ষণৰ দায়িত্বত থকা সংশ্লিষ্ট কৰ্তৃপক্ষৰ বিৰুদ্ধে ঘটনা সন্দৰ্ভত তদন্ত কৰাৰো দাবী জনাইছে কেন্দ্ৰটোৰ বাহিৰত উপস্থিত থকা লোক সকলে।