আজি অৰিয়েণ্টেল বেংকে তেওঁলোকৰ এজন ঋণ গ্ৰাহকে ঋণ ঘূৰাব নোৱৰা বাবে গ্ৰাহকজনৰ গুৱাহাটী মহানগৰীৰ দক্ষিণ শৰণীয়াত থকা ঘৰটো নিজৰ দখললৈ আনিবলৈ প্ৰশাসনৰ সহযোগত চলোৱা অভিযানৰ সময়তে ঘৰটোৰ ভিতৰত ৬টাকৈ বন্দুক আৰু ৭৭০টা সক্ৰিয় গুলী উদ্ধাৰ হোৱা ঘটনাই এক প্ৰকাৰৰ চাঞ্চল্যৰ সৃষ্টি কৰে।
জানিব পৰামতে, বন্দুককেইটা আৰু গুলীসমূহ ঘৰটোৰ এটা কোঠাৰ বিছনাৰ তলত পোৱা গৈছে। এই বন্দুক আৰু গুলীবোৰ ঘৰটোৰ মালিক নিৰোদ ডেকাই ৰখা বুলি জানিবলৈ পোৱা গৈছে। ডেকা এজন কয়লা ব্যৱসায়ী। অভিযানৰ সময়ত উপস্থিত থকা পল্টন বজাৰ আৰক্ষীয়ে বন্দুক আৰু গুলী সমূহ জব্দ কৰাৰ লগতে সোধা-পোছাৰ বাবে নিৰোদ ডেকাকো আটক কৰে।
নৰ্থ-ইষ্ট নাওৰ আগত পল্টন বজাৰ আৰক্ষীয়ে জনোৱামতে, ৬টা বন্দুকৰ ৪টা এয়াৰ গান আৰু আন ২টাৰ এটা পইণ্ট টু-টু আৰু এটা দুনলীয়া (ডবল বেৰেল) বন্দুক। আৰক্ষীয়ে জনোৱা মতে পইণ্ট টু-টু আৰু দুনলীয়া বন্দুককেইটাৰ লাইচেন্স আছে আৰু এয়াৰগানকেইটাৰ লাইচেন্সৰ দৰকাৰ নহয়।
পল্টনবজাৰ থানাৰ উপ-পৰিদৰ্শকজনে জনোৱামতে বন্দুককেইটা আৰু গুলীবোৰ থানাত ৰাখি নিৰোদ ডেকাক ইতিমধ্যে যাবলৈ দিয়া হৈছে। তেওঁ কয়, “সকলো মানুহৰে কিছুমান চখ থাকে। কিছুমানে ল’ৰা-ছোৱালী ভাল পায়। মানুহজনৰ হয়তো বন্দুক ভাল পোৱাৰ চখ আছে।”
উল্লেখযোগ্য যে কয়লা ব্যৱসায়ী নিৰোদ ডেকাই অৰিয়েণ্টেল বেংক অব কমাৰ্চৰ পৰা লোৱা ঋণৰ ৪০ লাখ টকা ঘূৰাই দিবলৈ আছে। কিন্তু যোৱা বহুকেইটা প্ৰয়াসৰ পিছতো ডেকাৰ পৰা ঋণৰ কিস্তি ঘূৰাই নোপোৱাত বেংক কৰ্তৃপক্ষই আজি গুৱাহাটী মেট্ৰ’ৰ উপায়ুক্তৰ পৰা অনুমতি লৈ আৰক্ষী প্ৰশাসনৰ সহযোগত আৰু জিলা দণ্ডাধীশৰ উপস্থিতিত ঘৰটো নিজৰ দখললৈ নিয়ে।
