কোভিড-১৯ক লৈ ডিমা হাছাও জিলা প্রশাসনৰ সামগ্রিক ভূমিকাত ক্ষুব্ধ হাফলঙৰ সচেতন ৰাইজ। এখন অভিভাৱকহীন চহৰত পৰিণত হৈ পৰা হাফলং পৌৰসভা কৰ্তৃপক্ষৰ ভূমিকাও সন্তোষজনক নহয়।
পাহাৰীয়া জিলাত যোৱা ১৬ মার্চ তাৰিখে উত্তৰ কাছাৰ পার্বত্য স্বায়ত্ব শাসিত পৰিষদে সাপ্তাহিক হাট-বজাৰ বন্ধ ৰখাৰ বাবে নির্দেশ দিছিল।
সেই নিৰ্দেশ অনুসৰি জিলাৰ প্ৰতিখন বজাৰ-হাট বন্ধ হৈ যায়। এই ব্যৱস্থা হাফলঙতো আছিল। বন্ধ আছিল হাফলঙৰ শনিবাৰৰ সাপ্তাহিক বজাৰ।
কিন্তু শনিবাৰে হাফলং লালফিল্ডত চৰকাৰী নিৰ্দেশ আৰু ল’ক ডাউন আইন অমান্য কৰি বিভিন্ন প্ৰান্তৰ পৰা ব্যবসায়ী সকল শাক-পাচলিৰ দোকান মেলি দিয়াৰ উপৰি সাধাৰণ ৰাইজো গোট খায়।
ইয়াত ন্যুনতম সামাজিক ব্যৱধান পালন কৰাও পৰিলক্ষিত নহ’ল। কিন্তু কোনে বাধা দিব ? আৰক্ষী যেন নীৰব দর্শক। দেখিও নেদেখাৰ ভাও ধৰি হাতত লাঠি ডাল লৈ থিয় হৈ থকাৰ বাহিৰে আন একো কৰা নাই।
আনহাতে, বজাৰৰ দৃশ্যই যেন প্ৰমাণ কৰিলে যে ল’ক ডাউন প্ৰত্যাহাৰ কৰাৰ উপৰি ক’ৰনা মুক্ত হৈছে দেশ তথা অসম।
যিসময়ত ৰাজধানী মহানগৰী গুৱাহাটী বা ৰাজ্যৰ আন ঠাইত এজনৰ পাছত আনজনৰ শৰীৰত কোভিড-১৯ পজিটিভ ধৰা পৰিছে সেই সময়ত হাফলং চহৰৰ এই দৃশ্য সঁচাকৈয়ে দুৰ্ভাগ্যজনক।
সচেতন ৰাইজৰ প্ৰশ্ন হ’ল হাফলঙতে যদি এই অবস্থা তেনেহ’লে জিলাখনৰ আন ঠাইত কি হ’ব ?
ইপিনে জিলাৰ বাহিৰত কর্মৰত যুৱক-যুৱতী বা আৱদ্ধ হৈ থকা বাসিন্দাসকল নিজ নিজ গৃহ জিলাত প্ৰৱেশ কৰিও বিপাঙত পৰিব লগা হৈছে।
শনিবাৰে অনুৰূপ একাধিক ঘটনা পোহৰলৈ আহে। গুৱাহাটীৰ এখন বেচৰকাৰী চিকিৎসালয়ত কর্মৰত নাৰ্ছ হাফলঙত উপস্থিত হৈ সমস্যাৰ সম্মুখীন হ’ব লগা হয়।
জিলাৰ প্ৰৱেশদ্বাৰ মান্দাৰদিচাত অকল নাম ঠিকনা লিপিৱদ্ধ কৰি এওঁলোকক এৰি দিয়া হয়। এতিয়া তেওঁলোকে কি কৰিব ? ক’ত যাব ? এওঁলোকৰ ঘৰ চহৰৰ পৰা কেইবা কিলোমিটাৰ নিলগৰ গাঁৱত।
বাছৰ পৰা নামি দুই-তিনি ঘন্টা বহি থাকিব লগা হ’ল। কোনো অ’টৰিক্সা এওঁলোকক লৈ যোৱাৰ বাবে সাজু নাছিল।
অৱশ্যে পাছত এগৰাকী সাংবাদিকে আগুৱাই আহি প্রশাসন তথা স্বাস্থ্য বিভাগৰ সৈতে কথা পাতে আৰু এখন গাড়ীৰ বন্দোবস্ত কৰি পঠিওৱাৰ ব্যৱস্থা কৰে।
স্বাস্থ্য বিভাগে জানিবলৈ দিয়ে যে মেডিকেল ছাৰ্ভাইলেন্স টিম বহিৰ্জিলাৰ পৰা অহা ব্যক্তি সকলৰ ঘৰত উপস্থিত হৈ হ’ম কোৱাৰেন্টাইন কৰিব।
এই ঘটনাৰ পৰা এটা বিষয় স্পষ্ট হৈ পৰে যে জিলা প্ৰশাসন, স্বাস্থ্য বিভাগ আৰু কোভিড-১৯ প্ৰতিৰোধৰ কাৰণে কাম কৰা চৰকাৰী টিমৰ মাজত সমন্বয়ৰ অভাৱ ঘটিছে।
