শেহতীয়া নিৰ্বাচনৰ ফলাফলক বিনম্ৰতাৰে স্বীকাৰ কৰি লৈ অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে ৰাজীৱ ভৱনত এখন সংবাদমেল সম্বোধন কৰে। সভাপতি হিচাপে পৰাজয়ৰ নৈতিক দায়িত্ব স্বীকাৰ কৰি তেওঁ বিজয়ী বিজেপি দল আৰু তেওঁলোকৰ নেতৃত্বক শুভেচ্ছা জ্ঞাপন কৰে। যোৱা পাঁচ বছৰত বিজেপিয়ে যিবোৰ সমস্যা সমাধান কৰিব নোৱাৰিলে, সেইবোৰ নতুন চিন্তাৰে সমাধান কৰিব বুলি আশা প্ৰকাশ কৰাৰ লগতে পূৰ্বৰ ভুলৰ পুনৰাবৃত্তি নকৰিবলৈ তেওঁ আহ্বান জনায়। ইয়াৰ উপৰিও নিৰ্বাচনত সহায় কৰা সকলো নিষ্ঠাৱান কৰ্মী, সমৰ্থক, সামাজিক মাধ্যমৰ দল আৰু কেন্দ্ৰীয় নেতৃত্বক তেওঁ আন্তৰিক ধন্যবাদ জ্ঞাপন কৰে।
নিৰ্বাচনত আশা কৰা ধৰণে আসন লাভ নকৰিলেও মানসিকভাৱে হাৰ মনা নাই বুলি স্পষ্ট কৰি দি গগৈয়ে কয় যে পৰৱৰ্তী সময়ত কংগ্ৰেছে এক সৱল বিৰোধী দলৰ ভূমিকা পালন কৰি যাব। চৰকাৰে যেতিয়াই ৰাইজক ভয়-ভাবুকি দি বিপদত পেলাবলৈ চেষ্টা কৰিব, তেতিয়াই কংগ্ৰেছ সাধাৰণ নাগৰিকৰ কাষত থিয় দিব। চৰকাৰৰ দুৰ্নীতি আৰু গাফিলতিৰ ওপৰত দলৰ তীক্ষ্ণ নজৰ থাকিব বুলি উল্লেখ কৰি তেওঁ কয় যে বিৰোধী অবিহনে লোকতন্ত্ৰ জীয়াই নাথাকে। সেয়েহে, ৰাইজৰ সুৰক্ষা কৱচ আৰু লোকতান্ত্ৰিক অস্ত্ৰ হিচাপে কংগ্ৰেছে কাম কৰি যাব। ফলাফলৰ পৰ্যালোচনাৰ বাবে আগন্তুক ৯ মে’ত সকলো বিধায়ক আৰু প্ৰাৰ্থীক লৈ এখন বিশেষ বৈঠকৰ আহ্বান কৰা হৈছে বুলিও তেওঁ জনায়।
আনহাতে, সংবাদমেলত গৌৰৱ গগৈয়ে কেন্দ্ৰীয় নিৰ্বাচন আয়োগৰ ভূমিকা আৰু ইভিএমক লৈ গভীৰ সন্দেহ প্ৰকাশ কৰে। তেওঁ অভিযোগ কৰে যে বৰ্তমানৰ বিজেপি নেতৃত্বই গণতন্ত্ৰতকৈ ‘এক দেশ এক দল’ নীতিতহে বিশ্বাস কৰে, যাৰ বাবে নিৰ্বাচনী প্ৰক্ৰিয়া আৰু সংস্থাসমূহৰ নিৰপেক্ষতা শেষ কৰাৰ প্ৰয়াস চলিছে। ৰাইজে এই অভাবনীয় ভোটৰ ব্যৱধানক সহজভাৱে ল’ব পৰা নাই বুলি উল্লেখ কৰি তেওঁ কয় যে সমগ্ৰ দেশতে নিৰ্বাচনী স্বচ্ছতাক লৈ প্ৰশ্ন উত্থাপন হৈছে। নিৰ্বাচন নিজৰ নিয়ন্ত্ৰণলৈ নিবলৈ আইন আনি মেম’ৰি নথকাৰ দোহাই দি চিচিটিভি ফুটেজ সংৰক্ষণৰ সময়সীমা হ্ৰাস কৰা কাৰ্যকো তেওঁ তীব্ৰ সমালোচনা কৰে।
যোৰহাট সমষ্টিৰ পৰাজয় সন্দৰ্ভত প্ৰতিক্ৰিয়া ব্যক্ত কৰি গগৈয়ে কয় যে দলৰ সভাপতি হিচাপে সমগ্ৰ ৰাজ্যত সময় দিবলগীয়া হোৱাৰ বাবে তেওঁ যোৰহাটত পৰ্যাপ্ত প্ৰচাৰ চলাব নোৱাৰিলে। তেওঁ যোৰহাটৰ বিজয়ী প্ৰাৰ্থী হিতেন্দ্ৰনাথ গোস্বামীক শুভেচ্ছা জ্ঞাপন কৰে। অনাগত দিনত কংগ্ৰেছ দুৰ্বল হোৱাৰ পৰিৱৰ্তে অধিক শক্তিশালী ৰূপত ৰাইজৰ মাজলৈ যাব বুলি তেওঁ দৃঢ়তাৰে প্ৰকাশ কৰে। মুখ্যমন্ত্ৰীৰ ব্যক্তিগত সমালোচনাৰ প্ৰতি গুৰুত্ব নিদি চৰকাৰৰ ভুল-ক্ৰটিসমূহ আঙুলিয়াই দিয়াৰ লগতে ‘নতুন বৰ অসম’ৰ সংকল্প ৰূপায়নৰ বাবে দল প্ৰতিশ্ৰুতিবদ্ধ বুলি গগৈয়ে উল্লেখ কৰে। উক্ত সংবাদমেলত ৰাজ্যসভাৰ প্ৰাক্তন সাংসদ ৰিপুন বৰা, প্ৰদেশ মহিলা কংগ্ৰেছৰ সভাপতি মীৰা বৰঠাকুৰ আৰু বিধায়ক আব্দুৰ ৰহিম আহমেদ উপস্থিত থকাৰ বিপৰীতে মিডিয়া বিভাগৰ অধ্যক্ষ বেদব্ৰত বৰাই অনুষ্ঠানটোৰ আঁত ধৰে।
