সন্মিলিত গণশক্তিৰ নেতা ভুৱন পেগু নাই মিত্ৰ বিজেপিৰ লগত। নাগৰিকত্ব বিধেয়ক উত্থাপনৰ দৰে “বেয়া কাম” কৰাৰ বাবে গেৰুৱা-সংগ এৰিছে জোনাইৰ বিধায়কজনে।
“চৰকাৰৰ ভাল কামত সমৰ্থন দিম, কিন্তু বেয়া কামত চৰকাৰৰ লগত নাই,” ছয় জনগোষ্ঠীৰ জনজাতিকৰণৰ বিৰোধিতাৰে অসমৰ জনজাতি সংগঠন সমন্বয়ৰক্ষী সমিতিৰ এখন জনসভাত বুধবাৰে এই মন্তব্য কৰিছে পেগুৱে।
বিদেশীক নাগৰিকত্ব দি সংস্থাপন দিলে “অসমত জুই জ্বলিব” বুলিও সোণোৱাল চৰকাৰক সকীয়াই পেগুৱে লগতে কয় যে চৰকাৰৰ এনে পদক্ষেপে অসমৰ ভূমিপুত্ৰ জনজাতিসকলকে আটাইতকৈ ক্ষতিগ্ৰস্ত কৰিব।
“অসমত হিন্দুৱে হওক বা মুছলমানেই হওক, বিদেশী সংস্থাপিত হ’লে সকলোতকৈ বেছি ক্ষতি হ’ব জনজাতিসকলৰ,” পেগুৰ মন্তব্য।
অসমৰ প্ৰকৃত বাসিন্দাসকলৰ কথা চৰকাৰখনে এবাৰো ভাবি নাচালে বুলি আক্ষেপ প্ৰকাশ কৰি তেওঁ কয় অসমত কেৱল জনজাতীয় মানুহৰ হাতত থকা মাটিখিনি সুৰক্ষিত হৈ আছে। কিন্তু বিধেয়কখন আইনত পৰিণত হ’লে সেই মাটিও ভূমিপুত্ৰসকলৰ হাতৰ পৰা গুচি যাব বুলি তেওঁ মন্তব্য কৰে।
বিধেয়কখনৰ বিৰুদ্ধে অসমৰ ৰাইজৰ ধাৰাবাহিক আন্দোলনক উপেক্ষা কৰি অটল থকা বিজেপিৰ প্ৰতি তীব্ৰ ক্ষোভ উজাৰে মিত্ৰ বিধায়কজনে।
“সকলোৰে কেৱল সংখ্যাক লৈ ৰাজনীতি। কংগ্ৰেছে বাংলাদেশীমূলৰ মুছলমানক ৰক্ষণাৱেক্ষন দি ভোটবেংকৰ ৰাজনীতি কৰিছিল। এতিয়া বিজেপি চৰকাৰে কংগ্ৰেছৰ লগত ফেৰ মাৰিবলৈ বাংলাদেশী মূলৰ হিন্দুসকলক নাগৰিকত্ব দিয়াৰ প্ৰতিযোগিতাত নামিছে,” ভুৱন পেগুৰ মন্তব্য।
