সদৌ অসম ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদকে ধৰি অন্যান্য বিভিন্ন জাতীয় দল-সংগঠনে অসমত আন্তৰ্জাতিক পাৰ পত্ৰ চমুকৈ আই এল পি দাবী কৰি অহাৰ সময়তে ইয়াৰ এক প্ৰকাৰ বিৰোধিতা কৰিছে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই।
আজি গুৱাহাটীৰ গণেশগুৰিস্থিত হোটেল অম্বৰীশত এক সংবাদমেল সম্বোধন কৰি মহন্ত আই এল পিৰ সমৰ্থক নহয় বুলি উল্লেখ কৰাৰ লগতে তেওঁ কিয় আই এল পি হোৱাটো নিবিচাৰে তাকো বৰ্ণনা কৰে।
‘মই অসমত আই এল পিৰ সমৰ্থক নহয়। কিন্তু আই এল পি দিলে সেইটো প্ৰযোজ্য কৰাৰ সুবিধাটো আছে নে নাই চাব লাগিব। মেঘালয়ৰ পৰা অসমত সোমোৱাৰ লগে লগে মেচিনেৰীভাৱে অসম চৰকাৰে আই এল পিটো দিব পাৰিব নে নোৱাৰে।‘ মহন্তৰ দিনত কিয় আই এল পি প্ৰয়োগ কৰা নহ’ল বুলি সাংবাদিকে সোধাত তেওঁ এইদৰে কয়।
ইপিনে, ‘ILP হ’লে কি উপকাৰ হ’ব সেয়া চাব লাগিব অপকাৰ কি হয় সেয়াও চাব লাগিব‘ বুলি মন্তব্য কৰি মহন্তই ইয়াৰ অপকাৰিতা বৰ্ণনা কৰি কয়, ‘অসমত আই এল পি প্ৰয়োগ হ’লে তেলৰ কোম্পানী বা অন্য বহিৰাগত কোম্পানীত কাম কৰিবলৈ শ্ৰমিক অহাটো বন্ধ হৈ যাব। এতিয়া অন্ধ্ৰ আৰু কৰ্ণাটকত দুয়োখন ৰাজ্যত অসমৰ মানুহ প্ৰায় ৫ লাখ আছে, যদি সেই দুখন ৰাজ্যত আই এল পি হৈ যায় তেতিয়া অসমৰ নিবনুৱা সমস্যা কেনেকৈ নাইকিয়া হ’ব’?
ইয়াৰ উপৰি উক্ত সংবাদমেলতে নাগৰিকত্ব সংশোধনী আইন ২০১৯ ৰ এক প্ৰসংগ উত্থাপন কৰি মহন্তই কয়, ‘বাংলাদেশৰ বৈদেশিক মন্ত্ৰীয়ে হিন্দু মানুহৰ পূজাৰ সংখ্যা কিমান বাঢ়িছে তাৰ হিচাপ দিছে। আনকি কোন মন্ত্ৰী কোন পূজালৈ গৈছে সেই হিচাপো দিছে। গতিকে গুৱাহাটীত বহি হিন্দুসকল অত্যাচাৰ হোৱা বুলি কৈ থাকিলে নহ’ব। উচ্চতম ন্যায়ালয়ে কি কৰে সেইটো আমি চাম বা জনসাধাৰণে চাব লাগিব।‘
মহন্তৰ মতে ‘এই আইনৰ সুৰুঙা লৈ যিসকল লোক আহিব সেইসকল ভাৰতৰ অন্য ৰাজ্যলৈ নাযায়, অসমলৈ আহিব।‘
ইপিনে, পূৰ্বতে উচ্চতম ন্যায়ালয়ৰ কাষ চাপিম বুলি উল্লেখ কৰা মহন্ত কিয় ‘কা’ৰ বিৰুদ্ধে উচ্চতম ন্যায়ালয়ৰ দ্বাৰস্থ নহ’ল বুলি এজন সাংবাদিকে সোধাত তেওঁ কয়, ‘অইন সংগঠন যদি উচ্চতম ন্যায়ালয়ৰ কাষ নাচাপিল হেঁতেন তেতিয়া আমি কাষ চাপিলোহেঁতেন। কংগ্ৰেছৰ নিজৰ উকীল আছে, আমাৰটো নাই। ১ লাখ টকা এপিয়াৰেঞ্চ লাগিব, আমি ক’ত পাম।‘
পূৰ্বতে এনেধৰণৰ কথা ভবা নাছিল নেকি বুলি কৰা প্ৰশ্নৰ উত্তৰত মহন্তই কয়, ‘আন দল-সংগঠন উচ্চতম ন্যায়ালয়ৰ কাষ চাপিছে গতিকে আমি চপা নাই। পাৰ্টী কিয় হ’ব লাগে? কাৰণটো কি, যুক্তি কি? অসমক ভাল পোৱা যিসকলে আবেদন জনাইছে সেইসকলক আমি সমৰ্থন জনাম।‘