ক’ৰ’না প্ৰতিৰোধৰ বাবে হঠাতে দেশজুৰি বলৱৎ কৰা ল’কডাউনৰ ফলত ট্ৰাকতে ৪৭ দিন আতবাহিত কৰিলে এজন ট্ৰাক চালকে।
উত্তৰাখণ্ডৰ চাম্পাৱট জিলাৰ ট্ৰাক চালকজনে ট্ৰাকত একেহাৰে ৪৭ দিন অতিবাহিত কৰাৰ পিছত শনিবাৰে নিজ গৃহত উপস্থিত হয়।
সুনীল কুমাৰ নামৰ চমাপাৱট জিলাৰ মাঞ্চৰ চালকজনে যোৱা ছবছৰ দিন ধৰি দিল্লীস্থ এটা পৰিবহণ প্ৰতিষ্ঠানত চালক ৰূপে কৰ্মৰত।
সুনীলে জানিবলৈ দিয়ে যে দিল্লী আৰু ৰাজস্থান সীমান্তত তেওঁ ল’কডাউনৰ বাবে ৪৭ টাকৈ ৰাতি ট্ৰাকতে অতিবাহিত কৰে।
“মই ২২ মাৰ্চত দিল্লীৰ পৰা হায়দৰাবাদ অভিমুখে ৰাওনা হৈছিলো। ২৩ মাৰ্চত দিল্লী আৰু ৰাজস্থান সীমান্তৰ চাফাপুৰাত পাইছিলোগৈ, আৰু ল’কডাউনৰ বাবে মই তাতে থাকিব লগা হ’ল।” সুনীলে কয়।
“ৰাজস্থান আৰক্ষীয়ে মোক আগবাঢ়িবলৈ আৰু দিল্লী আৰক্ষীয়ে মোক উভতিবলৈ নিদিলে। মই ক’লৈকো যাব নোৱাৰিলো। গতিকে মই তাতে থকাৰ সিদ্ধান্ত ল’লো। ট্ৰাকত কিছুদিনৰ বাবে হোৱাকৈ ৰেচন আৰু এটা ষ্ট’ভ আছিল। তাতে ৰান্ধিছিলো আৰু ওচৰৰ গোলামালৰ দোকানৰ পৰা ৰেচন আনিছিলো।” তেওঁ কয়।
সুনীলৰ মতে সেয়া অতি কষ্টকৰ অভিজ্ঞতা আছিল।
“ৰাতিবোৰ তৰা গণি গণি পাৰ কৰিছিলো। আশা কৰিছিলো ২৪ এপ্ৰিলত ল’কডাউন শেষ হ’ব আৰু মই ঘৰ বা হায়দৰবাদলৈ যাব পাৰিম। কিন্তু ম্যাদ বৃদ্ধি কৰি দিয়াৰ ফলত পৰিস্থিত কঠিন হৈ পৰিছিল।” চালক সুনীলৰ মন্তব্য।
“কেনেবাকৈ দিনবোৰ তাতে অতিবাহিত কৰি পাৰ কৰিলো। দুঃচিন্তা হৈছিল। ঘৰত গৰ্ভৱতী পত্নী আছে। ম’বাইলত ৰিচাৰ্জ কৰিব পৰা নাছিলো। পৰিয়ালৰ অভাৱ বৰকৈ অনুভৱ কৰিছিলো।” এইদৰে অভিজ্ঞতাৰ বৰ্ণনা কৰে সুনীলে।
অৱশেষত ৩ মে’ত বাণিজ্যিক বাহনবোৰ চলাৰ অনুমতি দিয়াৰ ফলত সুনীলে উভতি আহি ৫ মে’ত দিল্লীত উপস্থিত হয়।
দিল্লীৰ পৰিবহণ কাৰ্যালয়ত ট্ৰাকখন চমজাই দি অনলাইনেৰে টিকট বুকিং কৰি উত্তৰাখণ্ডলৈ আহে সুনীল।
উত্তৰাখণ্ডৰ স্বাস্থ্য বিভাগে তেওঁৰ স্বাস্থ্য স্ক্ৰীনিং কৰাৰ পিছত ৯ এপ্ৰিলত নিজ ঘৰ উপস্থিত হয় চালক সুনীল।
অৱশ্যে তেওঁক এতিয়া প্ৰশাসনে ১৪ দিনৰ বাবে কোৱাৰান্টেইনত ৰাখিছে।
“অৱশেষত ঘৰ আহি পালোহি, মই এতিয়া সুখী। পত্নীৰ সন্তান প্ৰসৱৰ পাছতে মই দিল্লীৰ কৰ্মস্থলীলৈ উভতি যাম। এতিয়াও শুই থাকিলে মই ট্ৰাকতে শুই থকা যেন অনুভৱ কৰো।” সুনীল কুমাৰে কয়।
