ৰাজ্যৰ বিধানসভা নিৰ্বাচনৰ দিন চমু চাপি অহাৰ লগে লগে ক্ৰমাৎ চৰ্চাৰ মূল বিষয় হৈ পৰিছে কংগ্ৰেছ আৰু এআইয়ুডিএফৰ মিত্ৰতা।
বিভিন্ন জনে বিভিন্ন মন্তব্য কৰি অহাৰ সময়তে বৰপেটা লোকসভা সমষ্টিৰ কংগ্ৰেছী সাংসদ আব্দুল খালেকে দুয়োটা দলৰ মিত্ৰতাক লৈ এক তাৎপৰ্যমূলক মন্তব্য আগবঢ়াইছে।
নিৰ্বাচনৰ আগে আগে বদৰুদ্দিন আজমলে কংগ্ৰেছৰ সৈতে মিত্ৰতা কৰিব খোজা বিষয়টো কোনো নতুন কথা নহয় বুলি মন্তব্য কৰিছে আব্দুল খালেকে।
সাংবাদিকৰ আগত মন্তব্য কৰি খালেকে কয়, ‘কেৱল এআইয়ুডিএফৰ সৈতে মিত্ৰতা সন্দৰ্ভত মোৰ আপত্তি আছে, কিন্তু মহাজোঁটৰ বিষয়টো সম্পূৰ্ণ সুকীয়া। মহাজোঁট বন্ধনত এআইয়ুডিএফ আহে নে নাহে সেয়া তেওঁলোকৰ বিষয়’।
ইফালে বিজেপিৰ আক্রমণাত্মক নিৰ্বাচনী প্ৰচাৰ সন্দৰ্ভতো গুৰুত্বপূৰ্ণ মন্তব্য কৰি সাংসদ খালেকে কয় যে কংগ্ৰেছৰ লক্ষ্য আক্রমণাত্মক প্রচাৰ নহয বিজেপিক শাসনৰ পৰা ওফৰোৱাহে।
তেওঁ লগতে ২০২১ চনৰ নিৰ্বাচনত কংগ্ৰেছ দলে ৬৫খনৰো অধিক আসন লাভ কৰি চৰকাৰ গঠন কৰিব বুলি দাবী জনায়।
