আই পি এল ২০২০ সম্ভৱ আৰু সফল কৰাৰ বাবে ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ বি চি চি আইৰ সভাপতি সৌৰভ গাংগুলীয়ে প্ৰতিটো দলৰে খেলুৱৈসকলক ধন্যবাদ জ্ঞাপন কৰে।
যোৱা ১৯ ছেপ্টেম্বৰত মুম্বাই ইণ্ডিয়ানছ আৰু চেন্নাই চুপাৰ কিংছৰ মেচৰ মাজেৰে আৰম্ভ হৈছিল আই পি এল।
আৰু মঙলবাৰে মুম্বাই ইণ্ডিয়ানছে দিল্লী কেপিটেলছক পৰাস্ত কৰি তেওঁলোকে পঞ্চমবাৰৰ বাবে আই পি এলৰ খিতাপ দখল কৰাৰ পিছতেই প্ৰতিযোগিতাখনৰ সমাপ্তি হয়।
‘বিচিচিআইৰ আন আন বিষয়া-কৰ্মচাৰীৰ লগতে মই প্ৰতিটো দলৰ খেলুৱৈকে ব্যক্তিগতভাৱে ধন্যবাদ জনাইছো। এয়া মানসিকভাৱে অত্যন্ত কঠিন আছিল।
মুম্বাই ইণ্ডিয়ানছে মঙলবাৰে ডুবাই ইণ্টাৰনেশ্যনেল ষ্টেডিয়ামত অনুষ্ঠিত প্ৰতিযোগিতাখনৰ ফাইনেলত দিল্লী কেপিটেলছক পাঁচটা উইকেটত পৰাস্ত কৰে।
ৰোহিত শর্মা নেতৃত্বাধীন মুম্বাই ইণ্ডিয়ানছৰ আই পি এঞত এইটো পঞ্চম খিতাপ। ইয়াৰ পূৰ্বে ২০১৩, ২০১৫, ২০১৭ আৰু ২০১৯ চনত জয়ী হৈছিল।
ফাইনেলত ৰোহিতে মুম্বাইৰ ৬৮ ৰানৰ বিজয়সূচক ইনিংছ খেলিছিল আৰু দিল্লীৰ এনৰিক নৰ্টজে দুটা উইকেট দখল কৰে।
দিল্লীয়ে প্ৰথমে বেট ধৰি নিৰ্ধাৰিত ২০ অভাৰত ৭টা উইকেট হেৰুৱাই ১৫৬ ৰান সংগ্ৰহ কৰে। দিল্লীৰ হৈ অধিনায়ক শ্ৰেয়াছ আয়াৰে সৰ্বাধিক ৬৫ আৰু ঋষভ পণ্টে ৫৬ ৰানৰ ইনিংছ খেলে।
১৫৭ ৰানৰ লক্ষ্য আগত লৈ বেটিং কৰিবলৈ অহা মুম্বাই ইণ্ডিয়ানছে আঠটা বল বাকী থকা অৱস্থাত ৫টা উইকেট হেৰুৱাই মেচখন নিজৰ নাম কৰি লয়।