পঞ্চায়ত নিৰ্বাচনত কেইটামান ভোটৰ লালসাত ৰাজ্যৰ চৰকাৰী মহিলা কৰ্মচাৰী আৰু আইমাতৃসকলক অপমান কৰিবলৈকো কুণ্ঠাবোধ নকৰা মুখ্যমন্ত্ৰী ড০ হিমন্ত বিশ্ব শৰ্মাক ওভতি ধৰিছে প্ৰদেশ কংগ্ৰেছৰ সভাপতি ভূপেন কুমাৰ বৰাই। ২৪ ঘণ্টাৰ ভিতৰত অসমৰ আইমাতৃসকলৰ ওচৰত ক্ষমা খুজিবলৈ কোৱাক লৈ আজি মুখ্যমন্ত্ৰীগৰাকীয়ে কৰা বিৰূপ মন্তব্যৰো তীক্ষ্ন প্ৰত্যুত্তৰ দিয়ে প্ৰদেশ কংগ্ৰেছৰ সভাপতিগৰাকীয়ে।
হোজাইৰ বিন্নাকান্দিৰ মোৰাঝাৰত অনুষ্ঠিত এখন নিৰ্বাচনী সভাত সভাপতি বৰাই মুখ্যমন্ত্ৰীয়ে ‘মই মাৰ গাখীৰ খাই ডাঙৰ-দীঘল হৈছো’ বুলি কৰা মন্তব্য সন্দৰ্ভত কয় যে তেওঁৱো মাকৰ গাখীৰ খাইয়েই ডাঙৰ হৈছে। তেওঁ কয়, ”মুখ্যমন্ত্ৰীয়ে কৈছে যে তেওঁ মাকৰ গাখীৰ খাই ডাঙৰ হৈছো। মই কৈছো যে মইয়ো আমূল তাজা খাই ডাঙৰ-দীঘল হোৱা নাই। আমিও মাৰ গাখীৰ খাইয়েই ডাঙৰ হৈছো। গতিকে আমি কালৈকো ভয় কৰা মানুহ নহয়।’’ মুখ্যমন্ত্ৰীৰ মন্তব্যক ওভতি ধৰা ভূপেন কুমাৰ বৰাই এআইইউডিএফৰ বিধায়ক ছিৰাজুদ্দিন আজমলকো তীব্ৰ সমালোচনা কৰে।
সমষ্টিত থকাৰ পৰিৱৰ্তে বিধায়কগৰাকী বিদেশতহে বেছিদিন থাকে বুলিও কয় বৰাই। বদৰুদ্দিন আজমলৰ এআইইউডিএফ দলক বিজেপিৰ ‘বি’ টীম আখ্যা দি তেওঁ কয়, ”আজমলৰ দলৰ সৈতে থকা ভিতৰুৱা বুজা-পৰাৰে হিমন্ত চৰকাৰ টিকি আছে। বি-টীম দলটোক আঁতৰাই দিলে হিমন্ত চৰকাৰো শেষ হৈ যাব।’’ বিজেপিৰ চৰকাৰৰ দিনত এটা বিশেষ পৰিয়ালৰ লগতে আজমলৰ পৰিয়ালৰো উন্নতি হৈছে বুলিও তেওঁ কয়। বিজেপিৰ ‘বি’ টীম এআইইইডিএফক উৎখাত কৰি হিমন্ত চৰকাৰকো শিক্ষা দিবৰ বাবে পঞ্চায়ত নিৰ্বাচনেই উপযুক্ত সময় বুলিও কয় প্ৰদেশ কংগ্ৰেছৰ সভাপতিগৰাকীয়ে।
