আৰজি কৰ কাণ্ডক লৈ দেশত হুলস্থুলৰ সৃষ্টি হোৱা ১৫ আগষ্টত লালকিল্লাৰ পৰা দিয়া ভাষণৰ পাছত পুনৰ মুখ মেলিলে প্ৰধানমন্ত্ৰী নৰেন্দ্ৰ মোদীয়ে। শনিবাৰে এক অনুষ্ঠানত প্ৰধানমন্ত্ৰীয়ে কয় যে মহিলাৰ ওপৰত হোৱা হিংসাৰ ঘটনাটো অতি বেদনাদায়ক আৰু চিন্তাৰ বিষয়। নাৰীৰ বিৰুদ্ধে হোৱা অপৰাধৰ বিৰুদ্ধে ক্ষিপ্ৰতাৰে গোচৰ চলোৱাৰ প্ৰয়োজন।
দিল্লীত অনুষ্ঠিত জিলা ন্যায়পালিকাৰ ৰাষ্ট্ৰীয় সন্মিলনত অংশ লৈ দেশৰ মুখ্য ন্যায়াধীশ ডি ৱাই চন্দ্ৰচূড়ক কাষত বহি মোদীয়ে দেশত নাৰীৰ ওপৰত ক্ৰমাৎ বৃদ্ধি পোৱা অত্যাচাৰক লৈ উদ্বেগ প্ৰকাশ কৰে। তেওঁ কয় যে এনেধৰণৰ অপৰাধ সমাজৰ বাবে অতি চিন্তনীয়। সেয়েহে প্ৰধানমন্ত্ৰীয়ে জোৰ দি কয় যে নাৰী সমাজৰ বিৰুদ্ধে যিকোনো অপৰাধৰ গোচৰ শীঘ্ৰে সমাধান কৰাটো প্ৰয়োজন।
উচ্চতম ন্যায়ালয়ে আয়োজন কৰা এই অনুষ্ঠানত মোদীয়ে কয় যে, যদি নাৰীৰ বিৰুদ্ধে অপৰাধৰ বিচাৰ ক্ষিপ্ৰতাৰে হয়, তেন্তে দেশৰ আধা জনসংখ্যা অৰ্থাৎ ছোৱালীয়ে নিৰাপত্তা অনুভৱ কৰিব। লগতে তেওঁ কয় যে দেশত মহিলাৰ সুৰক্ষাৰ বাবে অসংখ্য আইন আছে। ২০১৯ চনত গৃহীত হৈছিল ফাষ্ট ট্ৰেক ক’ৰ্ট আইন। যাৰ অধীনত প্ৰমাণ সংগ্ৰহ কেন্দ্ৰ স্থাপন কৰা হৈছিল। এই ক্ষেত্ৰত জিলা নিৰীক্ষণ সমিতিসমূহে গুৰুত্বপূৰ্ণ ভূমিকা পালন কৰে। আমি এই সমিতিসমূহ শক্তিশালী কৰাৰ আশ্বাস দিব পাৰোঁ। মই বিচাৰো মহিলা নিৰ্যাতনৰ গোচৰটো যিয়েই নহওক সোনকালে বিচাৰ কৰা হওক। যাতে বাকী মহিলাসকলক অন্ততঃ আশ্বস্ত কৰিব পৰা যায়।
মোদীয়ে জোৰ দি কয় যে দেশত মহিলাৰ সুৰক্ষাৰ বাবে অতি কঠোৰ আইন আছে। কিন্তু আমি সেইবোৰ অধিক সক্ৰিয় বা কাৰ্যকৰী কৰা উচিত। প্ৰসংগক্ৰমে প্ৰধানমন্ত্ৰীয়ে এই কথা কোৱাৰ আগদিনা শুকুৰবাৰে পশ্চিমবংগৰ মুখ্যমন্ত্ৰী মমতা বেনাৰ্জীয়ে মোদীলৈ লিখা দ্বিতীয়খন পত্ৰ যোগে ধৰ্ষণ আৰু হত্যাৰ ক্ষেত্ৰত কঠোৰ আইন প্ৰণয়নৰ দাবী জনায়। চিঠিখনত তেওঁ প্ৰধানমন্ত্ৰীলৈও লিখিছে দৃষ্টান্তমূলক শাস্তি বিচাৰি। পূৰ্বৰ চিঠিখনৰ কোনো সঁহাৰি নোপোৱাৰ অভিযোগো মমতাই প্ৰকাশ কৰে।
অৱশ্যে মমতাৰ চিঠিৰ উত্তৰ দিছে কেন্দ্ৰীয় মহিলা আৰু শিশু কল্যাণ মন্ত্ৰী অন্নপূৰ্ণা দেৱীয়ে। এইবাৰ মুখ্যমন্ত্ৰীৰ নাম নোলোৱাকৈয়ে প্ৰধানমন্ত্ৰীয়ে অভিযোগৰ উত্তৰ নিজৰ ভাষাত দিলে। পৰ্যবেক্ষকৰ মতে কোনো আইন থাকিলেও সময়মতে প্ৰয়োগ কৰি সক্ৰিয়ভাৱে ব্যৱহাৰ কৰাটো গুৰুত্বপূৰ্ণ। ফাষ্ট ট্ৰেক আদালতৰ জৰিয়তে এনে গোচৰৰ ক্ষিপ্ৰতাৰে নিষ্পত্তি কৰাটো গুৰুত্বপূৰ্ণ। যাতে বাৰ্তাটো অপৰাধী আৰু ভুক্তভোগী উভয়ৰে মাজলৈ যায়, চৰকাৰে মহিলা সুৰক্ষাৰ ক্ষেত্ৰত কিমান কঠোৰ হ’ব পাৰে।
