২০২৪ চনৰ লোকসভা নিৰ্বাচনৰ যুঁজখনত মুছলিম লীগৰ প্ৰসংগ টানি আনি হোৱাই নোহোৱাই কংগ্ৰেছক সমালোচনা কৰিছে নিৰেন্দ্ৰ মোদীকে ধৰি ভাৰতীয় জনতা পাৰ্টিৰ নেতাসকলে।
ইয়াৰ মাজতে বিতৰ্কৰ বিষয় হৈ পৰিছে গহণা আৰু মংগলসূত্ৰ। প্ৰধানমন্ত্ৰী নৰেন্দ্ৰ মোদীয়ে নিৰ্বাচনী সভাত ধাৰাবাহিকভাবে অভিযোগ উত্থাপন কৰি আহিছে কংগ্ৰেছে দেশৰ মহিলাসকলৰ মংগলসূত্ৰ কাঢ়ি ল’ব।
প্ৰধানমন্ত্ৰী মোডীৰ মতে, কংগ্ৰেছৰ ইস্তাহাৰৰ বহু কথাই দেশৰ বাবে ভাবুকি কঢ়িয়াই আনিছে।
প্ৰধানমন্ত্ৰীৰ এই অভিযোগৰ প্ৰতিক্ৰিয়া স্বৰূপে মঙলবাৰে কংগ্ৰেছৰ সাধাৰণ সম্পাদক প্ৰিয়ংকা গান্ধী ভাদ্ৰাই প্ৰত্যুত্তৰ দি কয়, “মোৰ মাতৃ ইন্দিৰা গান্ধীয়ে ১৯৭১ চনত হোৱা ভাৰত-পাকিস্তানৰ যুদ্ধৰ সময়ত দেশৰ বাবে নিজৰ মংগলসূত্ৰ দান কৰিছিল। আজি ৭০ বছৰে কংগ্ৰেছে কাৰোবাৰ মংগলসূত্ৰ কাঢ়ি লোৱা দেখিছে নেকি?”
এই বিষয়ত কংগ্ৰেছ সভাপতি প্ৰধান মল্লিকাৰ্জুন খৰ্গেই কয় যে প্ৰধানমন্ত্ৰী মোদীয়ে সময় দিলে তেওঁ মোদীক কংগ্ৰেছৰ ইস্তাহাৰখন ভালকৈ বুজাই দিব যাতে মোদীৰ ভ্ৰান্তি দূৰ হয়।
চলিত মাহত নিৰ্বাচনী সভাত দিয়া ভাষণত প্ৰধানমন্ত্ৰী মোদীয়ে বাৰে বাৰে কংগ্ৰেছৰ ইস্তাহাৰৰ কথা উল্লেখ কৰি কয় যে কংগ্ৰেছ দলৰ প্ৰতিশ্ৰুতিয়ে স্বাধীনতাৰ পূৰ্বৰ মুছলিম লীগৰ ধাৰণাক সোঁৱৰাই দিয়ে।
দেওবাৰে ৰাজস্থানত অনুষ্ঠিত এক সমাৱেশত প্ৰধানমন্ত্ৰী মোদীয়ে কংগ্ৰেছে মানুহৰ সা-সম্পত্তি জব্দ কৰি মুছলমানৰ মাজত বিতৰণ কৰাৰ উদ্দেশ্য থকা বুলি দাবী কৰি নতুন বিতৰ্কৰ সৃষ্টি কৰে। তেওঁ কৈছিল, “তেওঁলোকে মহিলাসকলৰ ‘মংগলসূত্ৰ’কো এৰি নিদিয়ে”
ইফালে কেৰালাৰ ৱায়ানাদত কংগ্ৰেছ নেতা ৰাহুল গান্ধীৰ সমৰ্থনত অনুষ্ঠিত এক সভাত ভাষণ দি সকলো অভিযোগৰ প্ৰতিক্ৰিয়া প্ৰকাশ কৰে খৰ্গেই। তেওঁ কয়, ” মোদীয়ে কয় যে কংগ্ৰেছৰ ইস্তাহাৰ মুছলিম লীগৰ ইস্তাহাৰ। মই তেওঁক অনুৰোধ কৰিছো, যদি তেওঁ মোক সময় দিয়ে তেন্তে মই তেওঁক আমাৰ ইস্তাহাৰখন বুজাই দিম। আমি আমাৰ ইস্তাহাৰখন কেৱল মুছলমানৰ বাবে বুলি কেতিয়াও উল্লেখ কৰা নাই। ইয়াত সকলোৰে বাবে কাম কৰাৰ কথা কোৱা হৈছে। আমাৰ ইস্তাহাৰ দুখীয়া, কৃষক, যুৱক-যুৱতী, মহিলা আৰু সকলোৰে বাবে। মোদীয়ে এনেবোৰ কথা কৈ কেৱল সমাজখনক বিভাজিত কৰিব বিচাৰে।”
ইয়াৰ লগতে খৰ্গেই প্ৰধানমন্ত্ৰীক আক্ৰমণ কৰি কয় যে মোদীয়ে বিশ্বৰ বহু দেশ ভ্ৰমণ কৰিছে যদিও হিংসাত্মক পৰিস্থিতিত আক্ৰান্ত মণিপুৰ ভ্ৰমণ কৰা নাই। মণিপুৰলৈ ৰাহুল গান্ধীহে গৈছে।
