বিশ্বজুৰি বৃদ্ধি পোৱা ক্ৰিকেটৰ জনপ্ৰিয়তাৰ প্ৰতি লক্ষ্য ৰাখি আইচিচিয়ে ২০২৮ চনত ৩২টা দলৰ টি-২০ বিশ্বকাপ আয়োজনৰ পৰিকল্পনা কৰিছে। ইটালীৰ সফলতাই এই ক্ষেত্ৰত এক নতুন পথৰ ইংগিত বহন কৰিছে। আন্তঃৰাষ্ট্ৰীয় ক্ৰিকেট নিয়ন্ত্ৰণ সংস্থা আইচিচিয়ে ইউৰোপ আৰু আফ্ৰিকাত ক্ৰিকেটৰ জনপ্ৰিয়তা বৃদ্ধিৰ বাবে নতুন পদক্ষেপ গ্ৰহণৰ পৰিকল্পনা কৰিছে। সূত্ৰ অনুসৰি, জয় শ্বাহৰ নেতৃত্বত আইচিচিয়ে টি-২০ বিশ্বকাপত দলৰ সংখ্যা ২০ৰ পৰা ৩২লৈ বৃদ্ধি কৰাৰ পৰিকল্পনা কৰিছে। আইচিচিৰ বাৰ্ষিক সভাত এই বিষয়ে বিস্তৃতভাৱে আলোচনা হোৱা বুলি জানিব পৰা গৈছে।
সূত্ৰ মতে, আইচিচিয়ে এই পৰিকল্পনা বাস্তৱায়িত কৰাৰ বাবে এটা ৬ জনীয়া কাৰ্যনিৰ্বাহক সমিতি গঠন কৰিছে, যাৰ নেতৃত্বত থাকিব নিউজিলেণ্ডৰ ৰজাৰ টছি। এই সমিতিত ভাৰত, ইংলেণ্ড, আৰু অষ্ট্ৰেলিয়াৰ দৰে ক্ৰিকেটৰ শক্তিশালী দেশৰ প্ৰতিনিধিসকলক অন্তৰ্ভুক্ত কৰা হৈছে। শনিবাৰে অনুষ্ঠিত আইচিচিৰ ব’ৰ্ডৰ সভাত ৩২ টা দলৰ বিশ্বকাপৰ প্ৰস্তাৱৰ ওপৰত আলোচনা হৈছে। এই পৰিকল্পনা এতিয়া ৬ জনীয়া সমিতিৰ হাতলৈ প্ৰেৰণ কৰা হৈছে। যদি এই সমিতিয়ে প্ৰস্তাৱত অনুমোদন জনায়, তেন্তে আইচিচিয়ে ৩২ দলৰ টি-২০ বিশ্বকাপৰ পৰিকল্পনাৰে আগবাঢ়িব। অৰ্থাৎ, ২০২৮ চনৰ টি-২০ বিশ্বকাপ কেৱল সৰ্ববৃহৎ নহয়, ক্ৰিকেটৰ ইতিহাসত অন্যতম গুৰুত্বপূৰ্ণ প্ৰতিযোগিতা হিচাপে পৰিগণিত হ’ব পাৰে।
২০২৬ চনত ভাৰত আৰু শ্ৰীলংকাত অনুষ্ঠিত হ’বলগীয়া টি-২০ বিশ্বকাপত ২০টা দলে অংশগ্ৰহণ কৰিব। ইটালীৰ দৰে দলসমূহে ইতিমধ্যে এই বিশ্বকাপৰ বাবে যোগ্যতা অৰ্জন কৰিছে। আইচিচিৰ মতে, ইটালীৰ এই সফলতাই প্ৰমাণ কৰিছে যে ইউৰোপ আৰু আফ্ৰিকাৰ দৰে অঞ্চলত ক্ৰিকেটৰ বিকাশৰ সম্ভাৱনা আছে। সেই কাৰণে ক্ৰিকেটৰ শীৰ্ষ নিয়ন্ত্ৰক সংস্থাটোৱে এই অঞ্চলৰ দেশসমূহক বিশ্বমঞ্চত অধিক সুযোগ প্ৰদান কৰিবলৈ প্ৰতিশ্ৰুতিবদ্ধ বুলি উল্লেখ কৰিছে।
উল্লেখ্য যে ফ্ৰেঞ্চাইজি লীগৰ আগমনৰ পিছত ক্ৰিকেটৰ জনপ্ৰিয়তা ক্ৰমাগতভাৱে বৃদ্ধি পাইছে। যিসমূহ দেশত পূৰ্বতে এই খেলাৰ প্ৰতি আগ্ৰহ কম আছিল, সেই দেশৰ মানুহেও এতিয়া ক্ৰিকেটৰ প্ৰতি আকৰ্ষিত হৈছে। মেজৰ লীগ ক্ৰিকেটৰ সফলতাই আইচিচিকো এই দিশত উৎসাহিত কৰিছে, আৰু তেওঁলোকে ক্ৰিকেটক বিশ্বৰ বিভিন্ন প্ৰান্তত আৰু অধিক জনপ্ৰিয় কৰাৰ লক্ষ্যৰে কাম কৰি আছে বুলি মত প্ৰকাশ কৰিছে।
