গুজৰাটৰ আহমেদাবাদত সংঘটিত হোৱা এক বৃহৎ চাইবাৰ জালিয়াতিৰ গোচৰত আইচিআইচিআই বেংক আৰু ভোডাফোন-আইডিয়াক তথ্য প্ৰযুক্তি আইনৰ অধীনত কঠোৰ শাস্তি বিহা হৈছে।
চাইবাৰ ক্ৰাইম ব্ৰাঞ্চৰ তদন্তত এইটো প্ৰকাশ পাইছে যে আহমেদাবাদত ভোডাফোন-আইডিয়াৰ ছিম শ্ব‘প (SIM Swap) জালিয়াতিৰ এক বিশাল চক্ৰ পোহৰলৈ আহিছে। ইয়াৰ পূৰ্বে কমেও ২০টা এনে প্ৰৱঞ্চনা সংঘটিত হৈছিল, তথাপিও কোম্পানীটোৱে এই সন্দৰ্ভত কোনো ব্যৱস্থা গ্ৰহণ কৰা নাছিল।
বাণিজ্যিক প্ৰতিষ্ঠান এখনে অনলাইন জালিয়াতিৰ বাবে ১ কোটি ১৯ লাখ টকাৰ লোকচানৰ সন্মুখীন হোৱাৰ পিছত আইচিআইচিআই বেংকক ১০ লাখ টকাৰ জৰিমনা আৰু ভোডাফোন-আইডিয়াক ৫ লাখ টকাৰ জৰিমনা এই জৰিমনা বিহা হয়।
সূত্ৰ অনুসৰি, ২০২৩ চনত গুজৰাটস্থিত এই বাণিজ্যিক প্ৰতিষ্ঠান এখনে অনলাইন জালিয়াতিত ধন হেৰুৱাই আইচিআইচিআই বেংক আৰু ভোডাফোন-আইডিয়াৰ বিৰুদ্ধে আইনি ব্যৱস্থা গ্ৰহণ কৰিছিল। কোম্পানীটোৰ সঞ্চালক প্ৰকাশ মেহতা ভিয়েটনামলৈ যোৱাৰ সময়ত এই ঘটনা সংঘটিত হয়। ১১ মাৰ্চত তেওঁ ছিম শ্ব’প (SIM Swap) কৰাৰ বাবে ইমেইল লাভ কৰিছিল। এই নম্বৰটো বেংক একাউণ্টৰ সৈতে লিংক কৰা আছিল আৰু ইয়াত আগতে অ’টিপি (OTP) লাভ কৰিছিল।
ভোডাফোন-আইডিয়াই কোনো ধৰণৰ পৰীক্ষণ অবিহনে ছিম শ্ব‘পৰ অনুৰোধ প্ৰক্ৰিয়াকৰণ কৰি সেইদিনা বিয়লি ৪:৩০ বজাৰ ভিতৰত নতুন চিম সক্ৰিয় কৰে।
দেওবাৰে, কাৰ্যালয়টো বন্ধ হৈ থকাৰ সুযোগ লৈ প্ৰৱঞ্চকসকলে ভুৱা ছিম ব্যৱহাৰ কৰি ২২টা লেনদেন সম্পন্ন কৰে। আৰ টি জি এছ (RTGS) আৰু এন ই এফ টি (NEFT) ৰ জৰিয়তে আই চি আই চি আই বেংক একাউণ্টৰ পৰা মুঠ ১.১৯ কোটি ৩৭ লাখ টকা উলিয়াই নিয়ে।
পিছদিনা ব্যক্তিজনে এই জালিয়াতিৰ কথা জানিব পাৰি বেংকৰ সৈতে যোগাযোগ কৰি চাইবাৰ ক্ৰাইম থানাত এজাহাৰ দাখিল কৰে। তথ্য প্ৰযুক্তি আইন, ২০০০ৰ ৪৩ আৰু ৪৩এ ধাৰাত গোচৰ ৰুজু কৰা হয়। আৰক্ষীৰ তদন্তত প্ৰকাশ পাইছে যে অপৰাধীকেইটাই ছিম শ্ব’প পদ্ধতি ব্যৱহাৰ কৰি অ’টিপি লাভ কৰিছিল, কিন্তু মূল গ্ৰাহকে কোনো অ’টিপি লাভ কৰা নাছিল।
ইফালে, আইচিআইচিআই বেংকে যুক্তি দৰ্শাইছে যে ৰিজাৰ্ভ বেংকৰ নিৰ্দেশনা অনুসৰি সকলো লেনদেন ভেৰিফাইড পাছৱৰ্ড, অ’টিপি, আৰু এমপিন ব্যৱহাৰ কৰি কৰা হৈছিল, গতিকে কোনো সন্দেহ নাছিল। পিছত বেংকে আভ্যন্তৰীণ তদন্ত কৰি ধন ট্ৰেন্সফাৰ কৰা গ্ৰাহকৰ একাউণ্ট বন্ধ কৰি দিয়ে বুলি জানিবলৈ দিয়ে।
ভোডাফোনেও দাবী কৰিছে যে তেওঁলোকে পঞ্জীয়নভুক্ত ইমেইলৰ পৰা অহা অনুৰোধৰ ভিত্তিত কৰ্পৰেট মালিকানাধীন সংযোগৰ নিৰ্দেশনা অনুসৰণ কৰি ক্ল‘ন চিম জাৰি কৰিছিল আৰু কোনো TRAI নিয়ম উলংঘা কৰা হোৱা নাছিল।
চাইবাৰ ক্ৰাইম ব্ৰাঞ্চৰ তদন্তত এইটোও প্ৰকাশ পাইছে যে আহমেদাবাদত ভোডাফোন-আইডিয়াৰ ছিম শ্ব‘প জালিয়াতিৰ এক বিশাল চক্ৰ পোহৰলৈ আহিছে। পূৰ্বে কমেও ২০টা এনে প্ৰৱঞ্চনা সংঘটিত হৈছিল, তথাপিও কোম্পানীটোৱে কোনো ব্যৱস্থা গ্ৰহণ কৰা নাছিল। সেয়ে এই গাফিলতিৰ বাবেই দুয়োটা পক্ষক জৰিমনা বিহা হয়।
