‘‘হাগ্ৰামা যদি বাঘ, মই সিংহ। হাগ্ৰামা মহিলাৰীয়ে এইবাৰ বিটিচি দখলৰ বাবে মদ-মাংস খুৱাই নাইবা টকা পইচা বিলাই ভোট আদায় কৰিব নোৱাৰে। এইবাৰ নিশ্চিত ভাবে দেৱৰগাঁৱত হাগ্ৰামা পৰাজিত হব,’’ বিটিচি নিৰ্বাচনৰ ১০ নং দেৱৰগাঁও পৰিষদীয় সমষ্টিৰ নৱ কুমাৰ শৰণীয়া নেতৃত্বাধীন গণ সুৰক্ষা পাৰ্টীৰ প্ৰাৰ্থী মনোজ কুমাৰ ৰাভাই এইদৰে কয়।
অহা ৪ এপ্ৰিলত অনুস্থিত হ’ব লগা বিটিচি পৰিষদীয় নিৰ্বাচনৰ বাবে প্ৰস্তুতি চলাই হাগ্ৰামা মহিলাৰীৰ বিৰুদ্ধে সোচ্চাৰ হৈ পৰে মনোজ কুমাৰ ৰাভা।
নিৰ্বাচনী অধিসূচনা জাৰি হোৱাৰ পিছতেই বিটিচি পৰিষদ দখল কৰিবলৈ তৎপৰ হৈ পৰিছে বিজেপি-বিপিএফ-অগপ মিত্ৰজোট, ইউপিপিএলৰ লগতে সাংসদ নৱকুমাৰ শৰনীয়া নেতৃত্বাধীন গণ সুৰক্ষা পাৰ্টী৷
বিটিচি নিৰ্বাচনক লৈ সাংসদ নৱ কুমাৰ শৰণীয়া নেতৃত্বাধীন গণ সুৰক্ষা পাৰ্টীয়ে ব্যাপক নিৰ্বাচনী কুচকাৱাজ আৰম্ভ কৰিছে।
ইতিমধ্যে গণ সুৰক্ষা পাৰ্টীয়ে কালি প্ৰথমখন প্ৰাৰ্থীৰ তালিকা ঘোষণা কৰিছে। এই তালিকাত ৫ টা ভিন্ন সমষ্টিত তামুলপুৰৰ ৫ জন যুৱ নেতাক প্ৰাৰ্থীত্ব প্ৰদান কৰিছে।
ইয়াৰ ভিতৰত বি টি চি প্ৰধান হাগ্ৰামা মহিলাৰীৰ দখলত থকা ১০ নং দেৱৰগাঁও সমষ্টিত সাংসদ নৱ কুমাৰ শৰণীয়া নেতৃত্বাধীন গণ সুৰক্ষা পাৰ্টীয়ে যুৱ নেতা তথা তামুলপুৰৰ বাসিন্দা মনোজ কুমাৰ ৰাভাক প্ৰক্ষেপ কৰিছে ।
প্ৰাৰ্থী হিচাপে নাম ঘোষণা কৰাৰ পাছতে আজি তামুলপুৰ মহকুমাৰ নতুন হাউলীৰ বাসিন্দা যুৱনেতা মনোজ কুমাৰ ৰাভাক যথেষ্ট উৎফুল্লিত হৈ পৰা দেখা যায়।
আজি তামুলপুৰত সাংবাদিকেৰে হোৱা এক আছুতীয়া সাক্ষাৎকাৰত তেওঁ দেৰগাঁৱত বিপুল ভোটত জয়লাভ কৰিব বুলি দাবী কৰে।
বিটিচি প্ৰধান মহিলাৰীক পৰাজিত কৰিবলৈ গণ সুৰক্ষা পাৰ্টীয়ে সমষ্টিটোত ব্যাপক তৎপৰতা অৱলম্বন কৰিছে বুলিও ৰাভাই সাংবাদিকৰ আগত মত প্ৰকাশ কৰে৷
সমষ্টিটোৰ চুকে-কোনে গৈ বিভিন্ন জাতি-জনগোষ্ঠীৰ সমৰ্থন লাভ কৰিবলৈ সক্ষম হোৱা বুলি দাবী কৰা মনোজ ৰাভাই সমষ্টিটোৰ পৰা এইবাৰ হাগ্ৰামা মহিলাৰীয়ে বিদায় লব লাগিব বুলিও তাৎপৰ্যপূৰ্ণ মন্তব্য কৰে৷
বিগত পোন্ধৰ বছৰে হাগ্ৰামা মহিলাৰীয়ে নিজৰ সমষ্টিৰ কোনো ধৰণৰ চকুত লগা উন্নয়ন কৰিবলৈ সক্ষম নহ’ল বুলি অভিযোগ তুলি সমষ্টিটোৰ ৰাইজে পৰিবৰ্তন বিচাৰি গণ সুৰক্ষা পাৰ্টীলৈ বিপুল সমৰ্থন আগবঢ়াইছে বুলিও ৰাভাই লগতে কয়।