ৰাষ্ট্ৰীয় নাগৰিকপঞ্জীৰ চূড়ান্ত পৰ্য্যায়ৰ কাম চলি থকাৰ মাজতেই একাংশ লোকৰ ভুৱা আপত্তিৰ বাবে হাৰাশাস্তিৰ সন্মুখীন হ’বলগীয়া হৈছে বহু নিৰীহ নাগৰিক। একাংশ ধৰ্মীয় আৰু ভাষিক সংখ্যালঘু লোকৰ উপৰিও অসমীয়াভাষী আৰু সত্ৰাধিকাৰৰ পৰিয়ালৰ বিৰুদ্ধেও নাগৰিকত্বক লৈ আপত্তি উত্থাপিত হৈছে।
কিন্তু ভুৱা আপত্তিৰ ভিত্তিত এনে লোকসকলক শুনানিৰ বাবে মাতি অনা কাৰ্য্যত ক্ষোভ ব্যক্ত কৰিছে প্ৰাক্তন মুখ্য মন্ত্ৰী তৰুণ গগৈয়ে। প্ৰাক্তন মুখ্য মন্ত্ৰীগৰাকীয়ে মঙলবাৰে গুৱাহাটীৰ ৰাজীৱ ভৱনত অনুষ্ঠিত এখন সংবাদমেলত এই ক্ষেত্ৰত এন আৰ চিৰ ৰাজ্যিক সমন্বয়ক প্ৰতীক হাজেলা আৰু প্ৰক্ৰিয়াটোৰ লগত জড়িত বিষয়াসকলক দোষাৰোপ কৰে।
উল্লেখ্য যে, অসমৰ বিভিন্ন প্ৰান্তত বহুলোকৰ বিৰূদ্ধে ভিত্তিহীন আপত্তি দাখিল হোৱা ঘটনাই অঞ্চলবিশেষে ৰাইজৰ মাজত শংকা আৰু অশান্তিকৰ পৰিৱেশৰ সূচনা কৰাৰ সময়তে ৰাজ্যৰ সমাজ জীৱনত বিশেষ অৱদান থকা কেইবাটাও পৰিয়ালৰ বিৰুদ্ধে আপত্তি দাখিল হোৱা বিষয়টোৱে বিশেষভাৱে চৰ্চা লাভ কৰিছে।
আপত্তি দাখিল হোৱা তালিকাখনত সোমাইছে মৰিগাঁৱৰ মুক্তিযোদ্ধা মহানন্দ দেৱগোস্বামী, জখলাবন্ধাৰ সত্ৰাধিকাৰ যুগল চন্দ্ৰ গোস্বামীৰ পৰিয়াল, নগাঁৱৰ শিক্ষা-সংস্কৃতিৰ ক্ষেত্ৰত অৱদান আগবঢ়োৱা তথা প্ৰাক্-স্বাধীনতা কালৰ বিধায়ক ওচমান আলী সদাগৰৰ পৰিয়াল, অসমীয়া সাহিত্য পৰিষদৰ সভাপতি হাফিজ আহমেদৰ পৰিয়াল ইত্যাদি।
এনে ধৰণৰ বহু প্ৰকৃত ভাৰতীয় পৰিয়ালৰ বিৰুদ্ধে দাখিল হোৱা আপত্তি সন্দৰ্ভত তৰুণ গগৈয়ে কয়, ‘ভাৰতীয় মানুহক হাৰাশাস্তি কৰিবলৈ হাজেলাই অধিকাৰ ক’ত পালে, দৰকাৰ হ’লে আমি হাজেলাৰ বিৰূদ্ধে কে’চ কৰিম’।
ইয়াৰ বাবে গগৈয়ে এন আৰ চিৰ বিষয়াসকলকো জগৰীয়া কৰি তেওঁলোককো শাস্তি বিহিব লাগে বুলি মন্তব্য কৰে।
‘মহানন্দ দেৱ গোস্বামীৰ দৰে পৰিয়ালৰ বিষয়ে অফিচাৰসকলে নাজানে নেকি? কিয় তেওঁলোকৰ বিৰুদ্ধে আপত্তি ল’বলগীয়া হ’ল? কিয় তেওঁলোকক শুনানিত মাতিবলগীয়া হ’ল?’ প্ৰাক্তন মুখ্য মন্ত্ৰী গৰাকীৰ প্ৰশ্ন।
ইপিনে এন আৰ চি প্ৰক্ৰিয়াটো লেহেমীয়া হোৱা বুলি উল্লেখ কৰি সৰ্বানন্দ সোণোৱাল নেতৃত্বাধীন বিজেপি চৰকাৰকো সমালোচনা কৰে তৰুণ গগৈয়ে। এন আৰ চিৰ বিষয়টো ত্ৰিপাক্ষিক বুলি মন্তব্য কৰি গগৈয়ে কয় যে এইক্ষেত্ৰত অসম চৰকাৰ, কেন্দ্ৰীয় চৰকাৰ আৰু আছুৰ প্ৰতিনিধিৰ মাজত ত্ৰিপাক্ষিক আলোচনাৰ প্ৰয়োজন আছে যদিও বিজেপি চৰকাৰে ত্ৰিপাক্ষিক বৈঠক অনুষ্ঠিত কৰা নাই।
