ইউটিউবত ধৰ্মীয় কথা শুনাই ভক্তৰ দল গঢ়ি তুলিছিল এজন যুৱকে। নিজকে আধ্যাত্মিক গুৰু হিচাপে দেখুৱাই তেওঁ বহু যুৱক-যুৱতীৰ বিশ্বাস জয় কৰিছিল। কিন্তু ধৰ্মৰ এই মুখাখনৰ আঁৰত চলি আছিল এক ভয়ংকৰ অপৰাধ। উত্তৰ প্ৰদেশ আৰক্ষীয়ে আইআইটি ৰুৰকীৰ প্ৰাক্তন ছাত্ৰ অভিষেক মিশ্ৰক গ্ৰেপ্তাৰ কৰিছে। তেওঁৰ বিৰুদ্ধে কেইবাগৰাকীও যুৱতীক জালত পেলাই যৌন নিৰ্যাতন চলোৱা, ব্লেকমেইল কৰা আৰু পৰিয়ালৰ পৰা ধন দাবী কৰাৰ দৰে গুৰুতৰ অভিযোগ উত্থাপন হৈছে।
আৰক্ষীৰ সূত্ৰই জনোৱা মতে ওড়িশাৰ বাসিন্দা ২৯ বছৰীয়া অভিষেক মিশ্ৰই ২০২১ চনত আইআইটি ৰুৰকীৰ পৰা মেকানিকেল ইঞ্জিনিয়াৰিং পাছ কৰিছিল। ইয়াৰ পিছত তেওঁ মথুৰালৈ আহে আৰু নিজকে আদিকৰ্তা নাৰায়ণ দাস নামৰ এজন ধৰ্মগুৰু হিচাপে পৰিচয় দিবলৈ আৰম্ভ কৰে। যোৱা প্ৰায় চাৰি বছৰ ধৰি তেওঁ মথুৰাৰ ৰাধাকুঞ্জ অঞ্চলত বাস কৰি আছিল। ভক্তসকলক আকৰ্ষণ কৰিবলৈ অভিষেকে ৰাধা কৃপা অমৃত নামৰ এটা ইউটিউব চেনেল চলাইছিল। তাত তেওঁ হিন্দী আৰু ইংৰাজী ভাষাত ধৰ্মীয় আলোচনা আৰু ভাষণ দিছিল। ইয়াৰ উপৰিও তেওঁ ভুৱা পৰিচয়েৰে লিংকডইনতো সক্ৰিয় আছিল। এই অনলাইন প্লেটফৰ্মসমূহৰ জৰিয়তে তেওঁ বিশেষকৈ শিক্ষিত আৰু ইঞ্জিনিয়াৰিং পঢ়ি থকা যুৱতীসকলৰ সৈতে যোগাযোগ গঢ়ি তুলিছিল।
অভিযোগ অনুসৰি তেওঁ লাহে লাহে যুৱতীসকলক নিজৰ পৰিয়ালৰ পৰা আঁতৰাই আনি আশ্ৰমৰ দৰে ঘৰত থাকিবলৈ উৎসাহিত কৰিছিল। আৰক্ষীয়ে জনোৱা মতে এসময়ত তাত প্ৰায় ২৪ গৰাকী যুৱক-যুৱতী একেলগে বাস কৰিছিল। তদন্তত পোহৰলৈ অহা অনুসৰি অভিষেকে তথাকথিত গান্ধৰ্ব বিবাহৰ কথা কৈ যুৱতীসকলৰ সৈতে সম্পৰ্ক গঢ়ি তুলিছিল। তাৰ পিছত প্ৰসাদৰ নামত ড্ৰাগছ মিহলি গাখীৰ খুৱাই তেওঁলোকৰ ওপৰত যৌন নিৰ্যাতন চলোৱছিল। কেৱল এয়াই নহয়, সেই ঘটনাৰ ছবি আৰু ভিডিঅ’ গোপনে ৰেকৰ্ড কৰি পিছত ব্লেকমেইলৰ সঁজুলি হিচাপে ব্যৱহাৰ কৰিছিল।
ছত্তীশগড়ৰ এগৰাকী যুৱতীৰ অভিযোগৰ ভিত্তিত আৰক্ষীয়ে এই তদন্ত আৰম্ভ কৰে। যুৱতীগৰাকীৰ গোচৰৰ পিছতে আৰক্ষীয়ে অভিষেকক গ্ৰেপ্তাৰ কৰে আৰু তেওঁৰ বিৰুদ্ধে ধৰ্ষণৰ গোচৰ ৰুজু কৰা হয়। তেওঁৰ ম’বাইল ফোনৰ পৰা উদ্ধাৰ হোৱা কেইবাটাও আপত্তিজনক ছবি আৰু ভিডিঅ’ বৰ্তমান তদন্তৰ গুৰুত্বপূৰ্ণ প্ৰমাণ হিচাপে পৰীক্ষা কৰা হৈছে। আৰক্ষীয়ে জনোৱা মতে আশ্ৰমত থকা লোকসকলৰ পৰিয়ালৰ পৰাও নিয়মিতভাৱে ধন সংগ্ৰহ কৰাৰ অভিযোগ উত্থাপন হৈছে। সময়ৰ লগে লগে বহুতে অভিষেকৰ আচৰণত সন্দেহ কৰি তাৰ পৰা ওলাই আহিছিল যদিও আৰম্ভণিতে তেওঁলোকক ব্ৰেইনৱাছ কৰি নিজৰ প্ৰতি অনুগত কৰি ৰখা হৈছিল। এই চক্ৰৰ বলি কিমান মহিলা হৈছে আৰু এই কাৰ্যকলাপ কিমান দিন ধৰি চলি আছিল তাৰ বিশদ তদন্ত চলাইছে আৰক্ষীয়ে। এই ঘটনা পোহৰলৈ অহাৰ পিছতে মথুৰা আৰু ইয়াৰ আশে-পাশে থকা অঞ্চলসমূহত তীব্ৰ চাঞ্চল্যৰ সৃষ্টি হৈছে।
